ਅੰਮ੍ਰਿਤਸਰ, 3 ਜੁਲਾਈ (ਪੋਸਟ ਬਿਊਰੋ)- ਕੇਂਦਰੀ ਜਾਂਚ ਏਜੰਸੀ ਸੀ ਬੀ ਆਈ ਨੇ ਬੈਂਕਾਂ ਨਾਲ ਕਰੋੜਾਂ ਰੁਪਏ ਦੇ ਫਰਾਡ ਦੇ ਕੇਸ ਵਿੱਚ ਕੱਲ੍ਹ ਏਥੇ ਪੰਜਾਬ ਬਾਸਮਤੀ ਰਾਈਸ ਮਿਲਜ਼ ਦੇ ਕੰਪਲੈਕਸ ਵਿੱਚ ਛਾਪਾ ਮਾਰਿਆ ਅਤੇ ਇਸ ਮਿੱਲ ਦੇ ਡਾਇਰੈਕਟਰਾਂ ਬਾਰੇ ਵੀ ਜਾਂਚ ਕੀਤੀ ਦੇ ਨਾਲ ਕੰਪਨੀ ਦੇ ਦਫਤਰ ਵਿੱਚ ਵੀ ਜਾਂਚ ਕੀਤੀ। ਮਿਲ ਮਾਲਕਾਂ 'ਤੇ ਦੋਸ਼ ਹੈ ਕਿ ਉਨ੍ਹਾਂ ਨੇ ਬੈਂਕਾਂ ਨਾਲ ਸਾਢੇ ਤਿੰਨ ਸੌ ਕਰੋੜ ਰੁਪਏ ਦੀ ਧੋਖਾਧੜੀ ਕੀਤੀ ਹੈ। ਇਨ੍ਹਾਂ ਵਿੱਚੋਂ 174.89 ਕਰੋੜ ਰੁਪਏ ਸਿਰਫ ਕੇਨਰਾ ਬੈਂਕ ਦੇ ਹਨ। ਸੀ ਬੀ ਆਈ ਨੇ ਮਾਮਲਾ ਦਰਜ ਕਰ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
ਤਰਨ ਤਾਰਨ ਰੋਡ ਦੀ ਪੰਜਾਬ ਬਾਸਮਤੀ ਰਾਈਸ ਮਿਲ ਦੇ ਮਾਲਕਾਂ ਕੁਲਵਿੰਦਰ ਸਿੰਘ, ਜਸਮੀਤ ਕੌਰ ਤੇ ਮਨਜੀਤ ਸਿੰਘ ਨੇ ਕਰੀਬ ਚਾਰ ਸਾਲ ਪਹਿਲਾਂ ਕੇਨਰਾ ਬੈਂਕ, ਆਈ ਡੀ ਬੀ ਆਈ ਬੈਂਕ, ਆਂਧਰਾ ਬੈਂਕ, ਯੂਕੋ ਬੈਂਕ, ਯੂਨੀਅਨ ਬੈਂਕ ਆਫ ਇੰਡੀਆ ਅਤੇ ਓਰੀਐਂਟਲ ਬੈਂਕ ਆਫ ਕਾਮਰਸ ਤੋਂ ਕਰਜ਼ਾ ਲਿਆ ਸੀ। ਧਰਮ ਸਿੰਘ ਮਾਰਕੀਟ ਵਿੱਚ ਕੇਨਰਾ ਬੈਂਕ ਦੇ ਇੱਕ ਅਧਿਕਾਰੀ ਨੇ 31 ਜੁਲਾਈ 2018 ਨੂੰ ਪੁਲਸ ਨੂੰ ਸ਼ਿਕਾਇਤ ਦਿੱਤੀ ਸੀ ਕਿ ਮਿਲ ਮਾਲਕਾਂ ਨੇ ਇੱਕ ਵੀ ਰੁਪਿਆ ਕਰਜ਼ਾ ਨਹੀਂ ਮੋੜਿਆ। ਇਸ ਦੇ ਬਾਅਦ ਸਾਰੇ ਬੈਂਕਾਂ ਨੇ ਪੰਜਾਬ ਬਾਸਮਤੀ ਰਾਈਸ ਮਿਲ ਨੂੰ ਨਾਨ ਪ੍ਰਫਾਰਮੈਂਸ ਅਕਾਊਂਟ ਐਲਾਨ ਕਰ ਦਿੱਤਾ ਸੀ। ਇਸ ਪਿੱਛੋਂ ਬੈਂਕ ਅਧਿਕਾਰੀਆਂ ਨੇ ਪਾਸਪੋਰਟ ਦਫਤਰ ਰਾਹੀਂ ਖੇਤਰੀ ਪਾਸਪੋਰਟ ਅਧਿਕਾਰੀ ਨੂੰ ਮਿਲ ਮਾਲਕਾਂ ਦੇ ਪਾਸਪੋਰਟ ਸਸਪੈਂਡ ਕਰਨ ਦੀ ਅਪੀਲ ਕੀਤੀ ਸੀ। ਉਨ੍ਹਾਂ ਨੂੰ ਸ਼ੱਕ ਸੀ ਕਿ ਮਿਲ ਦੇ ਮਾਲਕ ਵਿਦੇਸ਼ ਦੌੜ ਸਕਦੇ ਹਨ। ਪਾਸਪੋਰਟ ਅਧਿਕਾਰੀ ਨੇ ਕੁਲਵਿੰਦਰ ਸਿੰਘ ਅਤੇ ਜਸਮੀਤ ਕੌਰ ਦੇ ਪਾਸਪੋਰਟ ਸਸਪੈਂਡ ਕਰ ਦਿੱਤੇ ਸਨ।