ਓਟਵਾ, 3 ਜੁਲਾਈ (ਪੋਸਟ ਬਿਊਰੋ) : ਯੂਥ ਮੰਤਰੀ ਬਰਦੀਸ਼ ਚੱਗੜ ਦਾ ਕਹਿਣਾ ਹੈ ਕਿ ਇਨ੍ਹਾਂ ਗਰਮੀਆਂ ਵਿੱਚ ਵੁਈ ਆਰਗੇਨਾਈਜ਼ੇਸ਼ਨ ਵਾਲੰਟੀਅਰ ਕੰਮ ਲਈ ਵਿਦਿਆਰਥੀਆਂ ਤੇ ਨਵੇਂ ਬਣੇ ਗ੍ਰੈਜੂਏਟਸ ਲਈ ਫੈਡਰਲ ਸਰਕਾਰ ਦੇ 900 ਮਿਲੀਅਨ ਡਾਲਰ ਦੇ ਪ੍ਰੋਗਰਾਮ ਨੂੰ ਮੈਨੇਜ ਨਹੀਂ ਕਰ ਸਕੇਗੀ।

ਅੱਜ ਸਵੇਰੇ ਚੱਗੜ ਨੇ ਆਖਿਆ ਕਿ ਇਹ ਆਪਸੀ ਸਹਿਮਤੀ ਨਾਲ ਲਿਆ ਗਿਆ ਫੈਸਲਾ ਹੈ। ਇਹ ਚੈਰਿਟੀ ਕ੍ਰੇਗ ਤੇ ਮਾਰਕ ਕੇਲਬਰਗਰ ਭਰਾਵਾਂ ਵੱਲੋਂ ਸ਼ੁਰੂ ਕੀਤੀ ਗਈ ਸੀ ਤੇ ਪਿਛਲੇ ਹਫਤੇ ਇਸ ਚੈਰਿਟੀ ਨੂੰ ਪ੍ਰੋਗਰਾਮ ਦਾ ਮੈਨੇਜਰ ਥਾਪਿਆ ਗਿਆ ਸੀ। ਇਸ ਤਰ੍ਹਾਂ ਇੱਕ ਚੈਰਿਟੀ ਨੂੰ ਇਸ ਪ੍ਰੋਗਰਾਮ ਦਾ ਮੈਨੇਜਰ ਥਾਪੇ ਜਾਣ ਕਾਰਨ ਫੈਡਰਲ ਸਰਕਾਰ ਦੀ ਕਾਫੀ ਨੁਕਤਾਚੀਨੀ ਹੋ ਰਹੀ ਸੀ ਕਿਉਂਕਿ ਇਸ ਗਰੱੁਪ ਨਾਲ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦਾ ਨੇੜਲਾ ਸਬੰਧ ਹੈ।

ਟਰੂਡੋ ਤੇ ਚੱਗੜ ਕਈ ਵਾਰੀ ਇਹ ਆਖ ਚੱੁਕੇ ਹਨ ਕਿ ਇਸ ਕੰਮ ਲਈ ਵੁਈ ਸਰਵਿਸ ਦੀ ਵਰਤੋਂ ਕਰਨ ਦੀ ਸਿਫਾਰਸ਼ ਸਿਆਸਤਦਾਨਾਂ ਵੱਲੋਂ ਨਹੀਂ ਸਗੋਂ ਪਬਲਿਕ ਸਰਵਿਸ ਵੱਲੋਂ ਆਈ ਸੀ। ਇਸ ਵਾਲੰਟੀਅਰ ਪ੍ਰੋਗਰਾਮ ਤਹਿਤ 500 ਘੰਟੇ ਵਾਲੰਟੀਅਰ ਵਜੋਂ ਕੰਮ ਕਰਨ ਵਾਲੇ ਵਿਦਿਆਰਥੀਆਂ ਨੂੰ ਸਕੂਲਿੰਗ ਲਈ 5000 ਡਾਲਰ ਦਿੱਤੇ ਜਾਣੇ ਹਨ। ਫੈਡਰਲ ਸਰਕਾਰ ਵੱਲੋਂ ਵੁਈ ਚੈਰਿਟੀ ਨੂੰ ਪਹਿਲਾਂ ਹੀ ਦਿੱਤੀ ਜਾ ਚੁੱਕੀ ਰਕਮ ਨੂੰ ਚੈਰਿਟੀ ਵੱਲੋਂ ਮੋੜਿਆ ਜਾਵੇਗਾ।