ਮੈਕਸਿਕੋ ਸਿਟੀ, 2 ਜੁਲਾਈ (ਪੋਸਟ ਬਿਊਰੋ) : ਕੇਂਦਰੀ ਮੈਕਸਿਕੋ ਦੇ ਇੱਕ ਨਸ਼ਾ ਛੁਡਾਊ ਕੇਂਦਰ ਵਿੱਚ ਗੰਨਮੈਨ ਨੇ ਦਾਖਲ ਹੋ ਕੇ ਅੰਨ੍ਹੇਵਾਹ ਗੋਲੀਆਂ ਚਲਾਉਣੀਆਂ ਸ਼ੁਰੂ ਕਰ ਦਿੱਤੀਆਂ। ਇਸ ਘਟਨਾ ਵਿੱਚ 24 ਵਿਅਕਤੀਆਂ ਦੀ ਮੌਤ ਹੋ ਗਈ ਤੇ ਸੱਤ ਹੋਰ ਜ਼ਖ਼ਮੀ ਹੋ ਗਏ। ਇਹ ਜਾਣਕਾਰੀ ਅਧਿਕਾਰੀਆਂ ਨੇ ਦਿੱਤੀ।

ਗੁਆਨਾਜੁਆਤੋ ਦੇ ਨੌਰਥ ਸੈਂਟਰਲ ਸਟੇਟ ਦੀ ਪੁਲਿਸ ਨੇ ਦੱਸਿਆ ਕਿ ਇਹ ਘਟਨਾ ਇਰਾਪੁਆਤੋ ਸਿਟੀ ਵਿੱਚ ਵਾਪਰੀ। ਜ਼ਖ਼ਮੀ ਹੋਏ ਸੱਤ ਵਿਅਕਤੀਆਂ ਵਿੱਚੋਂ ਤਿੰਨ ਦੀ ਹਾਲਤ ਨਾਜੁ਼ਕ ਦੱਸੀ ਜਾਂਦੀ ਹੈ। ਜ਼ਾਹਿਰਾ ਤੌਰ ਉੱਤੇ ਹਮਲਾਵਰ ਨੇ ਇਸ ਨਸ਼ਾ ਛੁਡਾਊ ਕੇਂਦਰ ਉੱਤੇ ਹਰ ਕਿਸੇ ਨੂੰ ਹੀ ਗੋਲੀ ਮਾਰੀ। ਸਟੇਟ ਪੁਲਿਸ ਨੇ ਦੱਸਿਆ ਕਿ ਕਿਸੇ ਨੂੰ ਵੀ ਅਗਵਾ ਨਹੀਂ ਕੀਤਾ ਗਿਆ। ਇਸ ਘਟਨਾ ਦੀਆਂ ਜਾਰੀ ਕੀਤੀਆਂ ਗਈਆਂ ਤਸਵੀਰਾਂ ਵਿੱਚ ਨਜ਼ਰ ਆ ਰਿਹਾ ਹੈ ਕਿ ਗੋਲੀਆਂ ਚੱਲਦੇ ਸਮੇਂ ਲੋਕ ਜ਼ਮੀਨ ਉੱਤੇ ਪਏ ਹਨ।

ਗੁਆਨਾਜੁਆਤੋ ਵਿੱਚ ਜੈਲਿਸਕੋ ਕਾਰਟਲ ਤੇ ਲੋਕਲ ਗੈਂਗ ਦਰਮਿਆਨ ਵਾਰ ਵੀ ਚੱਲ ਰਹੀ ਹੈ। ਮੈਕਸਿਕੋ ਦੇ ਇਸ ਸਟੇਟ ਵਿੱਚ ਹਿੰਸਾ ਕਾਫੀ ਜਿ਼ਆਦਾ ਹੈ। ਹਮਲੇ ਦਾ ਕੋਈ ਕਾਰਨ ਨਹੀਂ ਦੱਸਿਆ ਗਿਆ। ਪਰ ਗਵਰਨਰ ਡਿਏਗੋ ਸਿਨਹੁਏ ਰੌਡਰਿਗਜ਼ ਵਾਲੇਜੋ ਨੇ ਆਖਿਆ ਕਿ ਇਹ ਘਟਨਾ ਨਸਿ਼ਆ ਕਰਕੇ ਹੋਣ ਵਾਲੀ ਗੈਂਗ ਵਾਰ ਦਾ ਹੀ ਹਿੱਸਾ ਲੱਗਦੀ ਹੈ। ਗਵਰਨਰ ਨੇ ਆਖਿਆ ਕਿ ਇਸ ਘਟਨਾ ਦਾ ਉਨ੍ਹਾਂ ਨੂੰ ਬੇਹੱਦ ਅਫਸੋਸ ਹੈ ਤੇ ਇਸ ਤਰ੍ਹਾਂ ਦੀ ਵਾਰਦਾਤ ਦੀ ਉਹ ਸਖ਼ਤ ਨਿਖੇਧੀ ਕਰਦੇ ਹਨ।