ਵਾਸ਼ਿੰਗਟਨ, 14 ਨਵੰਬਰ, (ਪੋਸਟ ਬਿਊਰੋ)- ਅਮਰੀਕੀ ਨਿਊਜ਼ ਚੈਨਲ ਸੀ ਐਨ ਐਨ ਨੇ ਮੰਗਲਵਾਰ ਨੂੰ ਡੋਨਾਲਡ ਟਰੰਪ ਤੇ ਪ੍ਰਸ਼ਾਸਨ ਦੇ ਖਿਲਾਫ ਕੇਸ ਦਾਇਰ ਕੀਤਾ ਹੈ। ਇਸ ਵਿੱਚ ਦੋਸ਼ ਲਾਇਆ ਗਿਆ ਹੈ ਕਿ ਵ੍ਹਾਈਟ ਹਾਊਸ ਨੇ ਅਮਰੀਕਾ ਦੇ ਰਾਸ਼ਟਰਪਤੀ ਨਾਲ ਬਹਿਸ ਤੋਂ ਬਾਅਦ ਰਿਪੋਰਟਰ ਜਿਮ ਐਕੋਸਟਾ ਦਾ ਪ੍ਰੈਸ ਕਾਰਡ ਰੱਦ ਕਰਨ ਵੇਲੇ ਸੰਵਿਧਾਨ ਤਹਿਤ ਮਿਲੇ ਹੋਏ ਪੱਤਰਕਾਰਾਂ ਦੇ ਸੁਤੰਤਰ ਅਧਿਕਾਰਾਂ ਦਾ ਉਲੰਘਣ ਕੀਤਾ ਹੈ।
ਸੀ ਐਨ ਐਨ ਨੇ ਕੇਸ ਦਾ ਐਲਾਨ ਕਰਦੇ ਹੋਏ ਇਕ ਬਿਆਨ ਵਿੱਚ ਕਿਹਾ ਕਿ ਇਨ੍ਹਾਂ ਦਸਤਾਵੇਜ਼ਾਂ ਨੂੰ ਗਲਤ ਢੰਗ ਨਾਲ ਰੱਦ ਕਰਨਾ ਪ੍ਰੈਸ ਦੀ ਆਜ਼ਾਦੀ ਦੇ ਸੀ ਐਨ ਐਨ ਅਤੇ ਐਕੋਸਟਾ ਦੇ ਪਹਿਲੇ ਅਧਿਕਾਰ ਅਤੇ ਪ੍ਰਸਤਾਵਿਤ ਪ੍ਰਕਿਰਿਆ ਦੇ 5ਵੇਂ ਸੋਧ ਦੇ ਅਧਿਕਾਰ ਦਾ ਉਲੰਘਣ ਹੈ। ਬਿਆਨ ਮੁਤਾਬਕ ਅਸੀਂ ਅਦਾਲਤ ਨੂੰ ਆਦੇਸ਼ `ਤੇ ਤੁਰੰਤ ਰੋਕ ਲਾਉਣ ਅਤੇ ਜਿਮ ਦਾ ਕਾਰਡ ਵਾਪਸ ਕਰਨ ਲਈ ਕਿਹਾ ਹੈ ਅਤੇ ਅਸੀਂ ਇਸ ਪ੍ਰਕਿਰਿਆ ਦੌਰਾਨ ਸਥਾਈ ਰਾਹਤ ਮੰਗਾਂਗੇ।
ਵਰਨਣ ਯੋਗ ਹੈ ਕਿ ਵ੍ਹਾਈਟ ਹਾਊਸ ਨੇ ਸੀ ਐਨ ਐਨ ਦੇ ਉਸ ਰਿਪੋਰਟਰ ਦਾ ਪ੍ਰੈਸ ਸਕੱਤਰ ਰੱਦ ਕਰ ਦਿੱਤਾ ਸੀ, ਜਿਸ ਨੇ ਪ੍ਰੈਸ ਕਾਨਫਰੰਸ ਵਿੱਚ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨਾਲ ਬਹਿਸ ਕੀਤੀ ਸੀ। ਇਸ ਕੇਸ ਬਾਰੇ ਵਿਵਾਦ ਵਧਣ ਉੱਤੇ ਵ੍ਹਾਈਟ ਹਾਊਸ ਦੀ ਪ੍ਰੈਸ ਸਕੱਤਰ ਸਾਰਾ ਸੈਂਡਰਸ ਨੇ ਕਿਹਾ ਕਿ ਸੀ ਐਨ ਐਨ ਦੇ ਰਿਪੋਰਟਰ ਦੀ ਮਾਨਤਾ ਇਸ ਲਈ ਰੱਦ ਕੀਤੀ ਗਈ ਕਿ ਉਸ ਨੇ ਪ੍ਰੈਸ ਕਾਨਫਰੰਸ ਵਿੱਚ ਇਕ ਮਹਿਲਾ ਇੰਟਰਨ ਉੱਤੇ ਹੱਥ ਰੱਖ ਦਿੱਤੇ ਸਨ। ਪ੍ਰੈਸ ਕਾਨਫਰੰਸ ਦੌਰਾਨ ਟਰੰਪ ਨੇ ਇਸ ਰਿਪੋਰਟਰ ਨੂੰ ਅੜੀਅਲ ਅਤੇ ਅਜੀਬ ਇਨਸਾਨ ਕਿਹਾ ਸੀ। ਟਰੰਪ ਪ੍ਰਸ਼ਾਸਨ ਨੇ ਸੀ ਐਨ ਐਨ ਦੇ ਰਿਪੋਰਟਰ ਦਾ ਪ੍ਰੈੱਸ ਕਾਰਡ ਰੱਦ ਕਰਨ ਦੇ ਫੈਸਲੇ ਦਾ ਬੁੱਧਵਾਰ ਅਦਾਲਤ `ਚ ਬਚਾਅ ਕੀਤਾ ਤੇ ਦਲੀਲ ਦਿੱਤੀ ਕਿ ਕਿਸੇ ਵੀ ਪੱਤਰਕਾਰ ਨੂੰ ਸੰਵਿਧਾਨ ਦੇ ਪਹਿਲੇ ਸੋਧ ਦੇ ਤਹਿਤ ਵ੍ਹਾਈਟ ਹਾਊਸ `ਚ ਦਾਖਲ ਹੋਣ ਦਾ ਅਧਿਕਾਰ ਨਹੀਂ। ਸੀ ਐਨ ਐਨ ਨੇ ਡੋਨਾਲਡ ਟਰੰਪ ਤੇ ਉਨ੍ਹਾਂ ਦੇ ਕਈ ਸਹਿਯੋਗੀਆਂ ਦੇ ਖਿਲਾਫ ਕੇਸ ਦਾਇਰ ਕਰ ਕੇ ਨੈਟਵਰਕ ਦੇ ਪੱਤਰਕਾਰ ਜਿਮ ਐਕੋਸਟਾ ਦੇ ਵ੍ਹਾਈਟ ਹਾਊਸ ਦੇ ਪ੍ਰੈੱਸ ਕਾਰਡ ਦੀ ਤੁਰੰਤ ਬਹਾਲੀ ਦੀ ਮੰਗ ਕੀਤੀ ਹੈ। ਕਾਨੂੰਨ ਮੰਤਰਾਲੇ ਨੇ ਅਦਾਲਤ ਨੂੰ ਕਿਹਾ ਕਿ ਕਿਸੇ ਵੀ ਪੱਤਰਕਾਰ ਨੂੰ ਸੰਵਿਧਾਨ ਦੇ ਪਹਿਲੇ ਸੋਧ ਹੇਠ ਵ੍ਹਾਈਟ ਹਾਊਸ `ਚ ਦਾਖਲੇ ਦਾ ਅਧਿਕਾਰ ਨਹੀਂ ਹੈ।