ਮਾਸਕੋ, 1 ਜੁਲਾਈ (ਪੋਸਟ ਬਿਊਰੋ) : ਰੂਸ ਦੇ ਵੋਟਰਾਂ ਨੇ ਉਨ੍ਹਾਂ ਸੰਵਿਧਾਨਕ ਤਬਦੀਲੀਆਂ ਨੂੰ ਮਨਜੂ਼ਰੀ ਦੇ ਦਿੱਤੀ ਹੈ ਜਿਸ ਰਾਹੀਂ 2036 ਤੱਕ ਵਲਾਦੀਮੀਰ ਪੁਤਿਨ ਰਾਸ਼ਟਰਪਤੀ ਬਣੇ ਰਹਿਣਗੇ। ਪਰ ਬੱੁਧਵਾਰ ਨੂੰ ਮੁੱਕੇ ਤੇ ਇੱਕ ਹਫਤੇ ਤੱਕ ਚਲੇ ਜਨਮਤ ਬਾਰੇ ਇਹ ਰਿਪੋਰਟਾਂ ਮਿਲੀਆਂ ਹਨ ਕਿ ਵੋਟਰਾਂ ਉੱਤੇ ਦਬਾਅ ਪਾਇਆ ਗਿਆ ਤੇ ਹੋਰ ਵੀ ਕਈ ਕਿਸਮ ਦੀਆਂ ਬੇਨਿਯਮੀਆਂ ਹੋਈਆਂ।
ਚੋਣ ਅਧਿਕਾਰੀਆਂ ਅਨੁਸਾਰ 77.6 ਫੀ ਸਦੀ ਲੋਕਾਂ ਨੇ ਸੰਵਿਧਾਨਕ ਤਬਦੀਲੀਆਂ ਦੇ ਹੱਕ ਵਿੱਚ ਵੋਟ ਪਾਈ। ਰੂਸ ਵਿੱਚ ਪਹਿਲੀ ਵਾਰੀ ਇੱਕ ਹਫਤੇ ਲਈ ਚੋਣ ਪ੍ਰਕਿਰਿਆ ਚੱਲੀ। ਇਹ ਵੀ ਮੰਨਿਆ ਜਾ ਰਿਹਾ ਹੈ ਕਿ ਕਰੋਨਾਵਾਇਰਸ ਮਹਾਂਮਾਰੀ ਕਾਰਨ ਚੋਣ ਬੂਥ ਉੱਤੇ ਭੀੜ ਤੋਂ ਟਲਣ ਲਈ ਇਹ ਫੈਸਲਾ ਲਿਆ ਗਿਆ। ਆਲੋਚਕਾਂ ਦਾ ਕਹਿਣਾ ਹੈ ਕਿ ਇਹ ਸੱਭ ਨਤੀਜਿਆਂ ਨੂੰ ਇੱਛਾ ਮੁਤਾਬਕ ਢਾਲਣ ਦੀ ਹੀ ਕਵਾਇਦ ਸੀ।
ਜ਼ੋਰ-ਸੋ਼ਰ ਨਾਲ ਕੀਤੇ ਗਏ ਪ੍ਰਚਾਰ ਤੇ ਵਿਰੋਧੀ ਧਿਰ ਵੱਲੋਂ ਕੋਈ ਵੱਡੀ ਚੁਣੌਤੀ ਪੇਸ਼ ਨਾ ਕਰਨ ਕਾਰਨ ਹੀ ਪੁਤਿਨ ਇੱਛਾ ਮੁਤਾਬਕ ਨਤੀਜੇ ਹਾਸਲ ਕਰ ਸਕਣ ਵਿੱਚ ਕਾਮਯਾਬ ਰਹੇ। ਪਰ ਜਨਮਤ ਲਈ ਗੈਰਸੰਵਿਧਾਨਕ ਤਰੀਕਿਆਂ ਦੀ ਕੀਤੀ ਗਈ ਵਰਤੋਂ ਨਾਲ ਪੁਤਿਨ ਦੇ ਅਕਸ ਨੂੰ ਢਾਹ ਵੀ ਲੱਗ ਸਕਦੀ ਹੈ।
ਇੱਥੇ ਦੱਸਣਾ ਬਣਦਾ ਹੈ ਕਿ ਇਨ੍ਹਾਂ ਸੋਧਾਂ ਨਾਲ ਹੁਣ ਪੁਤਿਨ 2024 ਤੇ 2030 ਵਿੱਚ ਛੇ-ਛੇ ਸਾਲ ਦੇ ਕਾਰਜਕਾਲ ਲਈ ਚੋਣਾਂ ਲੜਨ ਦੇ ਯੋਗ ਹੋ ਗਏ ਹਨ। ਇਨ੍ਹਾਂ ਤਬਦੀਲੀਆਂ ਤਹਿਤ ਸਮਲਿੰਗੀ ਵਿਆਹਾਂ ਨੂੰ ਨਿਯਮ ਵਿਰੋਧੀ ਦੱਸਿਆ ਗਿਆ ਅਤੇ ਕੌਮਾਂਤਰੀ ਨਿਯਮਾਂ ਤੋਂ ਰੂਸੀ ਕਾਨੂੰਨ ਨੂੰ ਅਹਿਮੀਅਤ ਉੱਤੇ ਜੋ਼ਰ ਦਿੱਤਾ ਗਿਆ।