ਸੋਨੀਪਤ, 1 ਜੁਲਾਈ (ਪੋਸਟ ਬਿਊਰੋ)- ਹਰਿਆਣਾ ਦੇ ਸੋਨੀਪਤ ਵਿੱਚ ਬਦਮਾਸ਼ਾਂ ਨੇ ਕੱਲ੍ਹ ਰਾਤ ਪੁਲਸ ਚੌਕੀ ਵਿੱਚ ਦੋ ਪੁਲਸ ਵਾਲਿਆਂ ਦੀ ਚਾਕੂ ਮਾਰ ਕੇ ਹੱਤਿਆ ਕਰ ਦਿੱਤੀ। ਕੱਲ੍ਹ ਸਵੇਰੇ ਬੁਟਾਨਾ ਪੁਲਸ ਚੌਕੀ ਤੋਂ ਸਿਰਫ 800 ਕਿਲੋਮੀਟਰ ਦੂਰ ਦੋਵਾਂ ਦੀਆਂ ਲਾਸ਼ਾਂ ਸੜਕ ਕਿਨਾਰੇ ਮਿਲੀਆਂ। ਉਨ੍ਹਾਂ ਦੀ ਮੋਟਰ ਸਾਈਕਲ ਨੇੜੇ ਖੜ੍ਹੀ ਸੀ। ਪੁਲਸ ਨੇ ਦੋਵਾਂ ਦੀ ਹੱਤਿਆ ਵਿੱਚ ਦੋਸ਼ੀਆਂ ਦੀ ਤਲਾਸ਼ ਸ਼ੁਰੂ ਕੀਤੀ ਤਾਂ ਜੀਂਦ ਵਿੱਚ ਇੱਕ ਬਦਮਾਸ਼ ਮੁਕਾਬਲੇ ਵਿੱਚ ਮਾਰਿਆ ਗਿਆ।
ਇਸ ਬਾਰੇ ਪੁਲਸ ਟੀਮ ਨੂੰ ਜਾਣਕਾਰੀ ਮਿਲੀ ਸੀ ਕਿ ਪੁਲਸ ਮੁਲਾਜ਼ਮਾਂ ਦੀ ਹੱਤਿਆ ਵਿੱਚ ਸ਼ਾਮਲ ਚਾਰ ਬਦਮਾਸ਼ ਜੀਂਦ ਵਿੱਚ ਰੋਹਤਕ ਰੋਡ ਉੱਤੇ ਬਣੇ ਇੱਕ ਮਕਾਨ ਵਿੱਚ ਛਿਪੇ ਬੈਠੇ ਹਨ। ਜੀਂਦ ਵਿੱਚ ਰੋਹਤਕ ਰੋਡ 'ਤੇ ਸਟੇਟ ਬੈਂਕ ਆਫ ਇੰਡੀਆ ਦੇ ਨੇੜੇ ਭਗਵਾਨ ਨਗਰ ਵਿੱਚ ਉਸ ਮਕਾਨ ਨੂੰ ਘੇਰ ਕੇ ਪੁਲਸ ਨੇੜੇ ਗਈ ਤਾਂ ਓਥੇ ਛਿਪੇ ਬਦਮਾਸ਼ਾਂ ਨੇ ਪੁਲਸ ਟੀਮ 'ਤੇ ਚਾਕੂਆਂ ਨਾਲ ਹਮਲਾ ਕਰ ਦਿੱਤਾ। ਇਸ ਵਿੱਚ ਸੋਨੀਪਤ ਸੀ ਆਈ ਏ ਦੇ ਇੰਸਪੈਕਟਰ ਅਨਿਲ ਕੁਮਾਰ ਅਤੇ ਸਾਈਬਰ ਕਰਾਈਮ ਦੇ ਇੰਸਪੈਕਟਰ ਪ੍ਰਸ਼ਾਂਤ ਗੰਭੀਰ ਜ਼ਖਮੀ ਹੋ ਗਏ ਅਤੇ ਏ ਐੱਸ ਆਈ ਮਨਦੀਪ ਤੇ ਸਿਪਾਹੀ ਰਾਜੇਸ਼ ਨੂੰ ਵੀ ਹਮਲੇ ਵਿੱਚ ਕਾਫੀ ਸੱਟਾਂ ਲੱਗੀਆਂ। ਬਦਮਾਸ਼ਾਂ ਦੇ ਨਾਲ ਪੁਲਸ ਦੀ ਮੁੱਠਭੇੜ ਵਿੱਚ ਪੁਲਸ ਨੂੰ ਵੀ ਫਾਇਰਿੰਗ ਕਰਨੀ ਪਈ। ਇਸ ਵਿੱਚ ਅਮਿਤ ਨਾਂਅ ਦੇ ਇੱਕ ਬਦਮਾਸ਼ ਦੀ ਪੁਲਸ ਦੀ ਗੋਲੀ ਲੱਗਣ ਨਾਲ ਮੌਤ ਹੋ ਗਈ।