ਮੋਗਾ, 1 ਜੁਲਾਈ (ਪੋਸਟ ਬਿਊਰੋ)- ਇਸ ਜ਼ਿਲੇ ਦੀ ਸਬ ਡਵੀਜ਼ਨ ਬਾਘਾ ਪੁਰਾਣਾ ਵਿੱਚ ਕੱਲ੍ਹ ਸ਼ਾਮ ਇੱਕ ਕੋਰੀਅਰ ਦੀ ਦੁਕਾਨ ਉਤੇ ਧਮਾਕਾ ਹੋ ਗਿਆ ਅਤੇ ਇਸ ਪਾਰਸਲ ਧਮਾਕੇ ਵਿੱਚ ਕੋਰੀਅਰ ਕਾਮਾ ਜ਼ਖਮੀ ਹੋ ਗਿਆ। ਘਟਨਾ ਦੀ ਸੂਚਨਾ ਮਿਲਦੇ ਹੀ ਐੱਸ ਐੱਸ ਪੀ ਹਰਮਨਬੀਰ ਸਿੰਘ ਗਿੱਲ, ਐੱਸ ਪੀ (ਆਈ) ਹਰਿੰਦਰਪਾਲ ਸਿੰਘ ਪਰਮਾਰ ਤੇ ਹੋਰ ਅਧਿਕਾਰੀ ਮੌਕੇ 'ਤੇ ਪੁੱਜੇ ਅਤੇ ਜ਼ਖਮੀ ਕਾਮੇ ਤੇ ਹੋਰਾਂ ਤੋਂ ਘਟਨਾ ਦੀ ਜਾਣਕਾਰੀ ਹਾਸਲ ਕੀਤੀ।
ਪਤਾ ਲੱਗਾ ਹੈ ਕਿ ਬਾਘਾਪੁਰਾਣਾ ਵਿੱਚ ਕੋਟਕਪੂਰਾ ਸੜਕ ਉੱਤੇ ਸਟਾਰ ਕੋਰੀਅਰ ਸਰਵਿਸ ਉਤੇ ਦੋ ਨੌਜਵਾਨ ਮੋਗੇ ਤੋਂ ਕੋਰੀਅਰ ਬੈਗ ਲੈ ਕੇ ਪਹੁੰਚੇ ਤਾਂ ਇਕਦਮ ਧਮਾਕਾ ਹੋ ਗਿਆ। ਇਸ ਧਮਾਕੇ ਵਿੱਚ ਕੋਰੀਅਰ ਲਿਆਉਣ ਵਾਲਾ ਨੌਜਵਾਨ ਛੋਟੂ ਰਾਮ ਜ਼ਖਮੀ ਹੋ ਗਿਆ। ਇਹ ਕੋਰੀਅਰ ਡੀ ਟੀ ਡੀ ਸੀ ਕੰਪਨੀ ਵੱਲੋਂ ਬੁਕ ਕੀਤੀ ਗਈ ਹੈ। ਕੁਰੀਅਰ ਉੱਤੇ ਭੇਜਣ ਵਾਲੇ ਦਾ ਪਤਾ ਦੀਪਿਕਾ ਵਾਸੀ ਅਦਰਸ਼ ਮੁਹੱਲਾ, ਨਾਭਾ ਗੇਟ, ਸੰਗਰੂਰ ਵੱਲੋਂ ਨਿਰਭੈ ਸਿੰਘ ਪਿੰਡ ਗੁਲਾਬ ਸਿੰਘ ਵਾਲਾ, ਸਮਾਧ ਰੋਡ, ਮੋਗਾ ਨੂੰ ਭੇਜਣ ਦਾ ਪਤਾ ਲਿਖਿਆ ਹੋਇਆ ਹੈ। ਪਾਰਸਲ ਉੱਤੇ ਦੋਵਾਂ ਦੇ ਮੋਬਾਈਲ ਨੰਬਰ ਵੀ ਲਿਖੇ ਹੋਏ ਹਨ। ਪੁਲਸ ਮੁਤਾਬਕ ਇਹ ਪਾਰਸਲ ਬੰਬ ਜ਼ਿਆਦਾ ਸ਼ਕਤੀਸ਼ਾਲੀ ਨਹੀਂ ਜਾਪਦਾ, ਪਰ ਇਹ ਪਾਰਸਲ ਬੰਬ ਸੀ ਜਿਸ ਵਿੱਚੋਂ ਲੋਹੇ ਦੀਆਂ ਮੇਖਾਂ ਤੇ ਲੋਹੇ ਦਾ ਬੂਰਾ ਬਰਾਮਦ ਹੋਇਆ ਹੈ।
ਕਰੀਬ ਪੌਣੇ ਦੋ ਸਾਲ ਪਹਿਲਾਂ ਵੀ ਇਥੇ ਸੂਦ ਕੋਰੀਅਰ ਸਰਵਿਸ ਉੱਤੇ ਪਾਰਸਲ ਬੰਬ ਧਮਾਕਾ ਹੋਇਆ ਸੀ, ਜਿਸ ਵਿੱਚ ਕੋਰੀਅਰ ਕਾਰੋਬਾਰੀ ਵਿਕਾਸ ਸੂਦ ਜ਼ਖਮੀ ਹੋ ਗਿਆ ਸੀ।