ਤਹਿਰਾਨ, 30 ਜੂਨ (ਪੋਸਟ ਬਿਊਰੋ)- ਇਰਾਨ ਵਿੱਚ ਬਗਦਾਦ ਵਿੱਚ ਡਰੋਨ ਹਮਲੇ ਦੌਰਾਨ ਇੱਕ ਇਰਾਨੀ ਜਨਰਲ ਦੀ ਮੌਤ ਦੇ ਕੇਸ ਵਿੱਚ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਅਤੇ ਦਰਜਨਾਂ ਹੋਰ ਲੋਕਾਂ ਦੀ ਗ੍ਰਿਫਤਾਰੀ ਲਈ ਵਾਰੰਟ ਜਾਰੀ ਕਰ ਕੇ ਇਸ ਦੇ ਲਈ ਇੰਟਰਪੋਲ ਤੋਂ ਮਦਦ ਮੰਗੀ ਗਈ ਹੈ।
ਇੱਕ ਸਥਾਨਕ ਵਕੀਲ ਨੇ ਕੱਲ੍ਹ ਏਥੇ ਦੱਸਿਆ ਕਿ ਈਰਾਨ ਦੇ ਇਸ ਕਦਮ ਨਾਲ ਟਰੰਪ ਨੂੰ ਗ੍ਰਿਫਤਾਰੀ ਦਾ ਕੋਈ ਖਤਰਾ ਨਹੀਂ, ਪਰ ਇਨ੍ਹਾਂ ਦੋਸ਼ਾਂ ਤੋਂ ਇਰਾਨ ਅਤੇ ਅਮਰੀਕਾ ਵਿਚਾਲੇ ਵਧਦਾ ਤਣਾਅ ਸਾਫ ਹੁੰਦਾ ਹੈ। ਇਰਾਨ ਅਤੇ ਵਿਸ਼ਵ ਦੀ ਪ੍ਰਮੁੱਖ ਸ਼ਕਤੀਆਂ ਨਾਲ ਹੋਏ ਐਟਮੀ ਸਮਝੌਤੇ ਤੋਂ ਟਰੰਪ ਦੇ ਲਾਂਭੇ ਹੋਣ ਦੇ ਬਾਅਦ ਦੋਵਾਂ ਦੇਸ਼ਾਂ ਦਾ ਤਣਾਅ ਵਧ ਗਿਆ ਸੀ। ਤਹਿਰਾਨ ਦੇ ਵਕੀਲ ਅਲੀ ਅਲਕਾਸੀਮਹਰ ਨੇ ਕਿਹਾ ਕਿ ਇਰਾਨ ਨੇ ਤਿੰਨ ਜਨਵਰੀ ਨੂੰ ਬਗਦਾਦ ਵਿੱਚ ਹੋਏ ਹਮਲੇ ਵਿੱਚ ਟਰੰਪ ਅਤੇ ਤੀਹ ਤੋਂ ਵੱਧ ਹੋਰਨਾਂ ਲੋਕਾਂ ਦੇ ਸ਼ਾਮਲ ਹੋਣ ਦਾ ਦੋਸ਼ ਲਾਇਆ ਹੈ। ਉਸੇ ਹਮਲੇ ਵਿੱਚ ਜਨਰਲ ਕਾਸਿਮ ਸੋਲੇਮਾਨੀ ਦੀ ਮੌਤ ਹੋ ਗਈ ਸੀ। ਅਲਕਾਸੀਮਰ ਨੇ ਟਰੰਪ ਦੇ ਇਲਾਵਾ ਕਿਸੇ ਹੋਰ ਕਿਸੇ ਦੀ ਪਛਾਣ ਨਹੀਂ ਕੀਤੀ, ਪਰ ਜ਼ੋਰ ਦਿੱਤਾ ਹੈ ਕਿ ਇਰਾਨ ਟਰੰਪ ਦਾ ਕਾਰਜਕਾਲ ਖਤਮ ਹੋਣ ਪਿੱਛੋਂ ਵੀ ਕੇਸ ਜਾਰੀ ਰੱਖੇਗਾ।
ਫਰਾਂਸ ਦੇ ਲਿਓਨ ਵਿੱਚ ਇੰਟਰਪੋਲ ਨੇ ਇਰਾਨ ਦੀ ਇਸ ਅਪੀਲ 'ਤੇ ਤੁਰੰਤ ਕੋਈ ਜਵਾਬ ਨਹੀਂ ਦਿੱਤਾ। ਅਜਿਹੀ ਸੰਭਾਵਨਾ ਨਹੀਂ ਕਿ ਇੰਟਰਪੋਲ ਇਰਾਨ ਦੀ ਅਪੀਲ ਨੂੰ ਸਵੀਕਾਰ ਕਰੇਗੀ, ਕਿਉਂਕਿ ਉਸ ਦੇ ਦਿਸ਼ਾ-ਨਿਰਦੇਸ਼ ਦੇ ਅਨੁਸਾਰ ਉਹ ਕਿਸੇ ਰਾਜਨੀਤਕ ਪ੍ਰਕ੍ਰਿਤੀ ਦੇ ਮਾਮਲੇ ਵਿੱਚ ਦਖਲ ਨਹੀਂ ਕਰ ਸਕਦਾ ਹੈ।