ਓਟਵਾ, 30 ਜੂਨ (ਪੋਸਟ ਬਿਊਰੋ) : ਸਟੈਟੇਸਟਿਕਸ ਕੈਨੇਡਾ ਦਾ ਕਹਿਣਾ ਹੈ ਕਿ ਅਪਰੈਲ ਦੇ ਮਹੀਨੇ ਅਰਥਚਾਰੇ ਵਿੱਚ ਸੱਭ ਤੋਂ ਵੱਧ ਗਿਰਾਵਟ ਦਰਜ ਕੀਤੀ ਗਈ। ਮਹਾਂਮਾਰੀ ਕਾਰਨ ਅਰਥਚਾਰੇ ਵਿੱਚ ਇੱਕ ਤਰ੍ਹਾਂ ਖੜੋਤ ਆਈ ਹੋਈ ਸੀ। ਮਈ ਵਿੱਚ ਕਾਰੋਬਾਰ ਮੁੜ ਖੁੱਲ੍ਹਣ ਕਾਰਨ ਸਥਿਤੀ ਥੋੜ੍ਹੀ ਸੰਭਲਣ ਲੱਗੀ। ਮੰਗਲਵਾਰ ਨੂੰ ਏਜੰਸੀ ਨੇ ਆਖਿਆ ਕਿ ਮਾਰਚ ਵਿੱਚ 7.5 ਫੀ ਸਦੀ ਗਿਰਾਵਟ ਨਾਲ ਗੈਰ ਜ਼ਰੂਰੀ ਕਾਰੋਬਾਰਾਂ ਦੇ ਬੰਦ ਹੋਣ ਨਾਲ ਕੱੁਲ ਘਰੇਲੂ ਉਤਪਾਦ (ਜੀਡੀਪੀ) ਅਪਰੈਲ ਵਿੱਚ 11.6 ਫੀ ਸਦੀ ਤੱਕ ਡਿੱਗ ਗਿਆ। ਸਟੈਟੇਸਟਿਕਸ ਕੈਨੇਡਾ ਨੇ ਆਖਿਆ ਕਿ ਉਨ੍ਹਾਂ ਦੇ ਅੰਦਾਜ਼ੇ ਮੁਤਾਬਕ ਮਈ ਵਿੱਚ ਤਿੰਨ ਫੀ ਸਦੀ ਵਿਕਾਸ ਦਰ ਹੋਣੀ ਚਾਹੀਦੀ ਸੀ। ਇਸ ਅੰਦਾਜ਼ੇ ਨੂੰ ਹੁਣ ਜੁਲਾਈ ਦੇ ਅੰਤ ਵਿੱਚ ਮੁੜ ਵਿਚਾਰਿਆ ਜਾਵੇਗਾ।

ਵਿੱਤ ਮਾਰਕਿਟ ਦੀ ਡਾਟਾ ਫਰਮ ਰੀਫਿਨਿਟਿਵ ਅਨੁਸਾਰ ਅਪਰੈਲ ਦੇ ਮਹੀਨੇ ਲਈ ਅਰਥਸ਼ਾਸਤਰੀਆਂ ਵੱਲੋਂ ਔਸਤ 13 ਫੀ ਸਦੀ ਦੀ ਗਿਰਾਵਟ ਦਾ ਅੰਦਾਜ਼ਾ ਲਾਇਆ ਗਿਆ ਸੀ। ਅਪਰੈਲ ਵਿੱਚ ਕਈ ਫੈਕਟਰੀਆਂ ਦੇ ਬੰਦ ਹੋਣ ਜਾਂ ਕੋਵਿਡ-19 ਦੇ ਪਸਾਰ ਨੂੰ ਰੋਕਣ ਲਈ ਕਈ ਫੈਕਟਰੀਆਂ ਵੱਲੋਂ ਆਪਣੀ ਸਮਰੱਥਾ ਘਟਾਏ ਜਾਣ ਕਾਰਨ ਉਤਪਾਦਨ 22.5 ਫੀ ਸਦੀ ਘੱਟ ਗਿਆ ਸੀ। ਇਸ ਕਦਮ ਨਾਲ ਆਟੋਮੋਟਿਵ ਸੈਕਟਰ ਨੂੰ ਵੀ ਵੱਡੀ ਢਾਹ ਲੱਗੀ। ਮੋਟਰ ਵ੍ਹੀਕਲ ਦੇ ਕਾਰੋਬਾਰ ਵਿੱਚ ਵੀ 97.7 ਫੀ ਸਦੀ ਕਮੀ ਦਰਜ ਕੀਤੀ ਗਈ।

ਇੱਥੋਂ ਤੱਕ ਕਿ ਮਾਰਚ ਵਿੱਚ ਜਿਨ੍ਹਾਂ ਸੈਕਟਰਜ਼ ਨੂੰ ਕੋਈ ਨੁਕਸਾਨ ਨਹੀਂ ਸੀ ਪਹੁੰਚਿਆ ਅਪਰੈਲ ਵਿੱਚ ਉਹ ਵੀ ਨਹੀਂ ਬਚੇ ਜਿਵੇਂ ਕਿ ਫੂਡ ਉਤਪਾਦਨ, ਜਿਸ ਵਿੱਚ 12.8 ਫੀ ਸਦੀ ਦੀ ਗਿਰਾਵਟ ਅਪਰੈਲ ਵਿੱਚ ਰਿਕਾਰਡ ਕੀਤੀ ਗਈ। ਇਸ ਦੌਰਾਨ ਮੀਟ ਪ੍ਰੋਸੈਸਿੰਗ ਪਲਾਂਟਸ ਵਿੱਚ ਆਊਟਬ੍ਰੇਕਸ ਕਾਰਨ ਇਨ੍ਹਾਂ ਨੂੰ ਬੰਦ ਕਰਨਾ ਪਿਆ। ਅਕਮੋਡੇਸ਼ਨ ਤੇ ਫੂਡ ਸਰਵਿਸ ਸੈਕਟਰ ਵਿੱਚ 42.4 ਫੀ ਸਦੀ ਦੀ ਗਿਰਾਵਟ ਅਪਰੈਲ ਵਿੱਚ ਦਰਜ ਕੀਤੀ ਗਈ। ਲੋਕਾਂ ਨੇ ਘਰਾਂ ਵਿੱਚ ਰਹਿਣਾ ਸ਼ੁਰੂ ਕਰ ਦਿੱਤਾ ਤੇ ਬਾਹਰ ਖਾਣਾ ਖਾਣਾ ਬੰਦ ਕਰ ਦਿੱਤਾ ਗਿਆ। ਇਸ ਲਈ ਇਸ ਸੈਕਟਰ ਵਿੱਚ ਮਾਰਚ ਦੇ ਮਹੀਨੇ 37.1 ਫੀ ਸਦੀ ਦੀ ਕਮੀ ਰਿਕਾਰਡ ਕੀਤੀ ਗਈ।

ਬਾਰਜ਼ ਤੇ ਰੈਸਟੋਰੈਂਟ ਦੇ ਕਾਰੋਬਾਰ ਨੇ 40.8 ਫੀ ਸਦੀ ਗੋਤਾ ਖਾਧਾ ਤੇ ਅਕਮੋਡੇਸ਼ਨ ਦੇ ਕੰਮ ਵਿੱਚ 45.7 ਫੀ ਸਦੀ ਨਿਘਾਰ ਆਇਆ। ਖੇਡਾਂ ਦੇ ਖੇਤਰ ਨੂੰ ਵੀ ਢਾਹ ਲੱਗੀ, ਨੈਸ਼ਨਲ ਹਾਕੀ ਲੀਗ ਦਾ ਪੂਰਾ ਸੀਜ਼ਨ, ਨੈਸ਼ਨਲ ਬਾਸਕਿਟਬਾਲ ਐਸੋਸਿਏਸ਼ਨ, ਮੇਜਰ ਲੀਗ ਬੇਸਬਾਲ ਤੇ ਮੇਜਰ ਲੀਗ ਸੌਕਰ, ਗੱਲ ਕੀ ਸਾਰੀਆਂ ਖੇਡਾਂ ਠੱਪ ਪੈ ਗਈਆਂ। ਮਨੋਰੰਜਨ ਦੇ ਖੇਤਰ ਵਿੱਚ 25.6 ਫੀ ਸਦੀ ਦੀ ਕਮੀ ਦਰਜ ਕੀਤੀ ਗਈ। ਕੰਸਟ੍ਰਕਸ਼ਨ ਦਾ ਕੰਮ ਵੀ 22.9 ਫੀ ਸਦੀ ਨਾਲ ਪ੍ਰਭਾਵਿਤ ਹੋਇਆ। ਹੁਣ ਅਰਥਸ਼ਾਸਤਰੀਆਂ ਨੂੰ ਜੂਨ ਵਿੱਚ ਹੋਰ ਕਾਰੋਬਾਰ ਖੱੁਲ੍ਹਣ ਨਾਲ ਸਥਿਤੀ ਸੰਭਲਣ ਦੀ ਕੁੱਝ ਆਸ ਬੱਝੀ ਹੈ।