ਕ੍ਰੈਮਲਿਨ, 29 ਜੂਨ (ਪੋਸਟ ਬਿਊਰੋ) : ਨੌਰਵੇਅ, ਸਵੀਡਨ ਤੇ ਫਿਨਲੈਂਡ ਵਿੱਚ ਜੂਨ ਦੇ ਪਹਿਲੇ ਅੱਧ ਵਿੱਚ ਆਮ ਨਾਲੋਂ ਜਿ਼ਆਦਾ ਪ੍ਰਮਾਣੂ ਰੇਡੀਏਸ਼ਨ ਪਾਏ ਜਾਣ ਤੋਂ ਬਾਅਦ ਰੂਸ ਨੇ ਆਪਣੇ ਦੋ ਪ੍ਰਮਾਣੂ ਪਾਵਰ ਪਲਾਂਟਸ ਉੱਤੇ ਕਿਸੇ ਵੀ ਤਰ੍ਹਾਂ ਦੀ ਲੀਕੇਜ ਤੋਂ ਇਨਕਾਰ ਕੀਤਾ ਹੈ।

ਦ ਡਚ ਨੈਸ਼ਨਲ ਇੰਸਟੀਚਿਊਟ ਫੌਰ ਪਬਲਿਕ ਹੈਲਥ ਐਂਡ ਦ ਐਨਵਾਇਰਮੈਂਟ (ਆਰਆਈਵੀਐਮ) (The Dutch National Institute for Public Health and the Environment) ਨੇ ਕੱਲ੍ਹ ਆਖਿਆ ਕਿ ਇਨ੍ਹਾਂ ਤਿੰਨ ਦੇਸ਼ਾਂ ਵਿੱਚ ਮਨੁੱਖ ਵੱਲੋਂ ਤਿਆਰ ਰੇਡੀਓਐਕਟੀਵਿਟੀ ਦਾ ਬਹੁਤ ਘੱਟ ਪੱਧਰ ਪਾਇਆ ਗਿਆ ਹੈ। ਇਸ ਦੌਰਾਨ ਇਹ ਵੀ ਆਖਿਆ ਗਿਆ ਕਿ ਵਾਤਾਵਰਣ ਜਾਂ ਮਨੱੁਖੀ ਸਿਹਤ ਉੱਤੇ ਇਸ ਦਾ ਕੋਈ ਅਸਰ ਨਹੀਂ ਪਾਇਆ ਗਿਆ।

ਆਰਆਈਵੀਐਮ ਨੇ ਇਸ ਰੇਡੀਓਐਕਟੀਵਿਟੀ ਬਾਰੇ ਅਧਿਐਨ ਕਰਨ ਤੋਂ ਬਾਅਦ ਆਖਿਆ ਹੈ ਕਿ ਉਨ੍ਹਾਂ ਦੇ ਹਿਸਾਬ ਨਾਲ ਨਿਊਕਲਾਈਡਜ਼ (nuclides) ਪੱਛਮੀ ਰੂਸ ਵੱਲੋਂ ਆਏ ਹਨ। ਇਹ ਵੀ ਆਖਿਆ ਗਿਆ ਕਿ ਸੀਮਤ ਡਾਟਾ ਉਪਲਬਧ ਹੋਣ ਕਾਰਨ ਇਨ੍ਹਾਂ ਨਿਊਕਲਾਈਡਜ਼ ਦੀ ਅਸਲ ਲੋਕੇਸ਼ਨ ਲੱਭ ਪਾਉਣਾ ਸੰਭਵ ਨਹੀਂ ਹੈ। ਇਹ ਜਾਣਕਾਰੀ ਆਰਆਈਵੀਐਮ ਵੱਲੋਂ ਆਪਣੀ ਵੈਬਸਾਈਟ ਉੱਤੇ ਦਿੱਤੀ ਗਈ। ਇਹ ਵੀ ਆਖਿਆ ਗਿਆ ਕਿ ਇਸ ਵੇਲੇ ਇਹ ਆਖ ਪਾਉਣਾ ਸੰਭਵ ਨਹੀਂ ਹੈ ਕਿ ਇਹ ਕਿਹੜੇ ਦੇਸ਼ ਵੱਲੋਂ ਆ ਰਹੇ ਹਨ।

ਇਸ ਦੌਰਾਨ ਰੂਸ ਨੇ ਆਖਿਆ ਕਿ ਦੇਸ਼ ਦੇ ਪੱਛਮੀ ਹਿੱਸੇ ਵਿੱਚ ਸਥਿਤ ਦੋ ਪ੍ਰਮਾਣੂ ਪਲਾਂਟਸ ਵਿੱਚੋਂ ਕਿਸੇ ਤਰ੍ਹਾਂ ਦੇ ਰਿਸਾਅ ਦੀ ਕੋਈ ਘਟਨਾ ਨਹੀਂ ਵਾਪਰੀ ਹੈ। ਕ੍ਰੈਮਲਿਨ ਦੇ ਬੁਲਾਰੇ ਦਮਿਤਰੀ ਪੈਸਕੋਵ ਨੇ ਵੀ ਕਿਸੇ ਤਰ੍ਹਾਂ ਦੀ ਘਟਨਾ ਵਾਪਰਨ ਤੋਂ ਇਨਕਾਰ ਕਰ ਦਿੱਤਾ।