ਟੋਰਾਂਟੋ, 29 ਜੂਨ (ਪੋਸਟ ਬਿਊਰੋ) : ਕੱਲ੍ਹ ਦੁਪਹਿਰੇ ਹਜ਼ਾਰਾਂ ਦੀ ਗਿਣਤੀ ਵਿੱਚ ਲੋਕ ਨਥਾਨ ਫਿਲਿਪਸ ਸਕੁਏਅਰ ਵਿੱਚ ਇੱਕਠੇ ਹੋ ਗਏ ਤੇ ਉਨ੍ਹਾਂ ਪੁਲਿਸ ਸੁਧਾਰਾਂ ਦੀ ਮੰਗ ਕੀਤੀ। ਨੋ ਪ੍ਰਾਈਡ ਇਨ ਪੁਲਿਸਿੰਗ ਕੋਲੀਸ਼ਨ (No Pride in Policing Coalition) ਵੱਲੋਂ ਆਯੋਜਿਤ ਇਸ ਰੈਲੀ ਦਾ ਥੀਮ ਅਬੌਲਿਸ਼ ਪੁਲਿਸ ਇਨ ਕੈਨੇਡਾ : ਅ ਪ੍ਰਾਈਡ ਰੈਲੀ ਐਂਡ ਟੀਚ-ਇਨ (Abolish Police in Canada: A Pride Rally & Teach-in) ਸੀ। ਮੁਜ਼ਾਹਰਾਕਾਰੀਆਂ ਨੇ ਕਈ ਤਰ੍ਹਾਂ ਦੇ ਸਾਈਨ ਬੋਰਡ ਚੱੁਕੇ ਹੋਏ ਸਨ ਜਿਨ੍ਹਾਂ ਵਿੱਚ ਸਾਨੂੰ ਮਾਰਨਾ ਬੰਦ ਕਰੋ ਤੇ ਬਲੈਕ ਲਾਈਵਜ਼ ਮੈਟਰ ਆਦਿ ਮੁੱਖ ਸਨ। ਮੁਜ਼ਾਹਰਾਕਾਰੀਆਂ ਨੇ ਪੁਲਿਸ ਦੇ ਫੰਡ ਬੰਦ ਕਰਨ, ਉਨ੍ਹਾਂ ਤੋਂ ਹਥਿਆਰ ਵਾਪਿਸ ਲੈਣ ਤੇ ਪੁਲਿਸ ਸਿਸਟਮ ਖ਼ਤਮ ਕਰਨ ਦੀ ਮੰਗ ਕੀਤੀ।
ਨੋ ਪ੍ਰਾਈਡ ਇਨ ਪੁਲਿਸਿੰਗ ਕੋਲੀਸ਼ਨ (No Pride in Policing Coalition) ਦੇ ਬੇਵਰਲੀ ਬੇਨ ਨੇ ਆਖਿਆ ਕਿ ਮਹਾਂਮਾਰੀ ਦੀ ਆੜ ਵਿੱਚ ਪੁਲਿਸ ਵੱਲੋਂ ਸਿਆਹ ਨਸਲ, ਮੂਲਵਾਸੀ ਲੋਕਾਂ ਦੇ ਕਤਲ ਕੀਤੇ ਜਾ ਰਹੇ ਹਨ। ਇੱਥੋਂ ਤੱਕ ਕਿ ਸਿਆਹ ਔਰਤਾਂ ਤੇ ਮੂਲਵਾਸੀ ਔਰਤਾਂ ਨੂੰ ਵੀ ਨਹੀਂ ਬਖਸਿ਼ਆ ਜਾ ਰਿਹਾ। ਖਾਸ ਤੌਰ ਉੱਤੇ ਪੁਲਿਸ ਵੱਲੋਂ ਉਸ ਸਮੇਂ ਨੁਕਸਾਨ ਪਹੁੰਚਾਇਆ ਜਾਂਦਾ ਹੈ ਜਦੋਂ ਉਹ ਮੈਂਟਲ ਹੈਲਥ ਚੈੱਕ ਲਈ ਜਾਂਦੀ ਹੈ। ਪ੍ਰਬੰਧਕਾਂ ਨੇ ਆਖਿਆ ਕਿ ਰੈਲੀ ਕਰਵਾਉਣ ਦਾ ਉਨ੍ਹਾਂ ਦਾ ਟੀਚਾ ਟੋਰਾਂਟੋ ਪੁਲਿਸ ਸਰਵਿਸਿਜ਼ ਬਜਟ ਵਿੱਚ 50 ਫੀ ਸਦੀ ਕਟੌਤੀ ਕਰਨਾ ਸੀ। ਇਸ ਹਫਤੇ ਸਿਟੀ ਕਾਉਂਸਲ ਸਾਹਮਣੇ ਕਾਉਂਸਲਰ ਜੋਸ ਮੈਟਲੋਅ ਤੇ ਉਂਸਲਰ ਕ੍ਰਿਸਟੀਨ ਵੌਂਗ-ਟੈਮ ਵੱਲੋਂ ਮਤਾ ਪੇਸ਼ ਕਰਕੇ ਪੁਲਿਸ ਸਰਵਿਸ ਬਜਟ ਵਿੱਚ 10 ਫੀ ਸਦੀ ਕਟੌਤੀ ਕੀਤੇ ਜਾਣ ਦੀ ਮੰਗ ਕੀਤੇ ਜਾਣ ਬਾਰੇ ਵੀ ਜਾਣਕਾਰੀ ਮਿਲੀ ਹੈ। ਇਹ ਰਕਮ 122 ਮਿਲੀਅਨ ਡਾਲਰ ਬਣਦੀ ਹੈ। ਇਹ ਵੀ ਤਜਵੀਜ਼ ਰੱਖੀ ਜਾ ਰਹੀ ਹੈ ਕਿ ਹਾਸ਼ੀਏ ਉੱਤੇ ਮੌਜੂਦ ਹੋਰਨਾਂ ਕਮਿਊਨਿਟੀ ਸਪੋਰਟ ਪ੍ਰੋਗਰਾਮਾਂ ਉੱਤੇ ਇਹ ਰਕਮ ਖਰਚੀ ਜਾਵੇ। ਟੋਰਾਂਟੋ ਦੇ ਮੇਅਰ ਜੌਹਨ ਟੋਰੀ ਵੱਲੋਂ ਵੀ ਇਹ ਪ੍ਰਸਤਾਵ ਪੇਸ਼ ਕੀਤਾ ਜਾ ਰਿਹਾ ਹੈ ਕਿ ਜਿਨ੍ਹਾਂ ਮਾਮਲਿਆਂ ਵਿੱਚ ਹਥਿਆਰਾਂ, ਹਿੰਸਾ ਆਦਿ ਦੀ ਵਰਤੋਂ ਨਹੀਂ ਹੋਈ ਉਨ੍ਹਾਂ ਲਈ ਗੈਰ ਪੁਲਿਸ ਰਿਸਪਾਂਸ ਯੂਨਿਟ ਭੇਜੀ ਜਾਵੇ।