ਮਾਂਟਰੀਅਲ, 28 ਜੂਨ (ਪੋਸਟ ਬਿਊਰੋ) : ਮਾਂਟਰੀਅਲ ਦੇ ਲਿਟਲ ਬਰਗੰਡੀ ਡਿਸਟ੍ਰਿਕਟ ਵਿੱਚ ਸ਼ਨਿੱਚਰਵਾਰ ਸ਼ਾਮ ਨੂੰ ਜ਼ਾਹਰਾ ਤੌਰ ਉੱਤੇ ਕਤਲ ਦੀ ਕੀਤੀ ਗਈ ਕੋਸਿ਼ਸ਼ ਦੇ ਮਾਮਲੇ ਦੀ ਜਾਂਚ ਮਾਂਟਰੀਅਲ ਪੁਲਿਸ (ਐਸਪੀਵੀਐਮ) ਵੱਲੋਂ ਕੀਤੀ ਜਾ ਰਹੀ ਹੈ। ਸੇਂਟ ਮਾਰਟਿਨ ਤੇ ਟੈਰੇਸੇ ਕੋਰਸਲ ਸਟਰੀਟਸ ਨੇੜੇ ਕਈ ਗੋਲੀਆਂ ਚੱਲਣ ਦੀਆਂ ਆਵਾਜ਼ਾਂ ਆਉਣ ਸਬੰਧੀ ਰਾਤੀਂ 10:50 ਦੇ ਨੇੜੇ ਤੇੜੇ 911 ਉੱਤੇ ਕਈ ਕਾਲਜ਼ ਕੀਤੀਆਂ ਗਈਆਂ। ਐਸਪੀਵੀਐਮ ਦੇ ਤਰਜ਼ਮਾਨ ਆਫੀਸਰ ਜੀਨ ਪਿਏਰੇ ਬ੍ਰੈਬੈਂਟ ਨੇ ਆਖਿਆ ਕਿ ਜਦੋਂ ਪੁਲਿਸ ਮੌਕੇ ਉੱਤੇ ਪਹੁੰਚੀ ਤਾਂ ਉਨ੍ਹਾਂ ਨੂੰ 25 ਸਾਲਾ ਵਿਅਕਤੀ ਮਿਲਿਆ ਜਿਸ ਦੇ ਗੋਲੀ ਲੱਗੀ ਸੀ। ਉਸ ਵਿਅਕਤੀ ਨੂੰ ਹਸਪਤਾਲ ਭੇਜ ਦਿੱਤਾ ਗਿਆ, ਜਿੱਥੇ ਉਸ ਦੀ ਹਾਲਤ ਖਤਰੇ ਤੋਂ ਬਾਹਰ ਦੱਸੀ ਗਈ।
ਇੱਕ 13 ਸਾਲਾ ਲੜਕੇ ਨੂੰ ਵੀ ਸ਼ਰੀਰ ਦੇ ਹੇਠਲੇ ਹਿੱਸੇ ਵਿੱਚ ਗੋਲੀ ਲੱਗਣ ਤੋਂ ਬਾਅਦ ਹਸਪਤਾਲ ਲਿਜਾਇਆ ਗਿਆ। ਉਸ ਦੀ ਹਾਲਤ ਵੀ ਸਥਿਰ ਦੱਸੀ ਜਾਂਦੀ ਹੈ। ਇੱਕ ਹੋਰ 31 ਸਾਲਾ ਵਿਅਕਤੀ ਬਾਅਦ ਵਿੱਚ ਹਸਪਤਾਲ ਪਹੁੰਚਿਆ, ਉਸ ਦੇ ਸ਼ਰੀਰ ਦੇ ਵੀ ਹੇਠਲੇ ਹਿੱਸੇ ਵਿੱਚ ਗੋਲੀ ਲੱਗੀ ਸੀ ਤੇ ਉਸ ਦੀ ਹਾਲਤ ਵੀ ਸਥਿਰ ਹੈ। ਇਨ੍ਹਾਂ ਵਿਅਕਤੀਆਂ ਉੱਤੇ ਗੋਲੀਆਂ ਕਿਹੋ ਜਿਹੇ ਹਾਲਾਤ ਵਿੱਚ ਤੇ ਕਿਉਂ ਚਲਾਈਆਂ ਗਈਆਂ, ਅਜੇ ਤੱਕ ਇਹ ਸਪਸ਼ਟ ਨਹੀਂ ਹੋ ਸਕਿਆ ਹੈ। ਐਸਪੀਵੀਐਮ ਜਾਂਚਕਾਰਾਂ ਵੱਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਏਜੰਟ ਬ੍ਰੈਬੈਂਟ ਅਨੁਸਾਰ ਉਨ੍ਹਾਂ ਨੂੰ ਮੌਕੇ ਉੱਤੇ ਗੋਲੀਆਂ ਦੇ ਕਈ ਖੋਲ ਮਿਲੇ। ਫੋਰੈਂਸਿਕ ਮਾਹਿਰਾਂ ਨੂੰ ਵੀ ਮੌਕੇ ਉੱਤੇ ਸੱਦਿਆ ਗਿਆ ਹੈ। ਸੂਹੀਆਂ ਕੱੁਤਿਆਂ ਨੂੰ ਵੀ ਪੁਲਿਸ ਨੇ ਮੌਕੇ ਉੱਤੇ ਲਿਆਂਦਾ। ਅਜੇ ਤੱਕ ਕਿਸੇ ਨੂੰ ਗ੍ਰਿਫਤਾਰ ਨਹੀਂ ਕੀਤਾ ਗਿਆ ਹੈ।