ਬਰੈਂਪਟਨ, 25 ਜੂਨ (ਪੋਸਟ ਬਿਊਰੋ) : ਏਅਰ ਕੈਨੇਡਾ ਦੀ ਫਲਾਈਟ 621 ਦੇ ਹਾਦਸਾਗ੍ਰਸਤ ਹੋਣ ਦੇ 50 ਸਾਲ ਪੂਰੇ ਹੋਣ ਜਾ ਰਹੇ ਹਨ। ਇਸ ਸਬੰਧ ਵਿੱਚ ਐਤਵਾਰ 5 ਜੁਲਾਈ ਨੂੰ ਸਵੇਰੇ 11:00 ਵਜੇ ਸਿਟੀ ਆਫ ਬਰੈਂਪਟਨ ਵੱਲੋਂ ਇਸ ਤ੍ਰਾਸਦੀ ਦਾ ਸਿ਼ਕਾਰ ਹੋਏ ਲੋਕਾਂ ਨੂੰ ਆਨਲਾਈਨ ਵੀਡੀਓ ਸ਼ਰਧਾਂਜਲੀ ਵਿੱਚ ਚੇਤੇ ਕੀਤਾ ਜਾਵੇਗਾ ਤੇ ਸਿਟੀ ਆਫ ਬਰੈਂਪਟਨ ਦੀਆਂ ਸਾਰੀਆਂ ਫੈਸਿਲਿਟੀਜ਼ ਉੱਤੇ ਝੰਡੇ ਅੱਧੇ ਝੁਲਾਏ ਜਾਣਗੇ।
ਇਸ ਸੈਰੇਮਨੀ ਨੂੰ www.brampton.ca/bramptonremembers ਅਤੇ @CityBrampton ਯੂ ਟਿਊਬ, ਟਵਿੱਟਰ ਤੇ ਫੇਸਬੁੱਕ ਉੱਤੇ ਉਪਲਬਧ ਕਰਵਾਇਆ ਜਾਵੇਗਾ। ਕਮਿਊਨਿਟੀ ਆਪਣੇ ਸੁਨੇਹੇ, ਯਾਦਾਂ ਤੇ ਸ਼ੋਕ www.brampton.ca/bramptonremembers ਉੱਤੇ ਆਨਲਾਈਨ ਗੈਸਟਬੁੱਕ ਵਿੱਚ ਦਰਜ ਕਰਵਾ ਸਕੇਗੀ।
ਇਸ ਘਟਨਾ ਦੇ 50 ਸਾਲ ਪੂਰੇ ਹੋਣ ਤੇ ਇਸ ਹਾਦਸੇ ਦਾ ਸਿ਼ਕਾਰ ਲੋਕਾਂ ਨੂੰ ਸ਼ਰਧਾਂਜਲੀ ਦੇਣ ਲਈ ਹਾਦਸੇ ਵਾਲੀ ਥਾਂ 72 ਡੀਗ੍ਰੇਅ ਡਰਾਈਵ ਉੱਤੇ ਸਥਿਤ ਪਰਪਲ ਲਾਇਲੈਕ ਪਾਰਕ ਦਾ ਨਾਂ ਬਦਲ ਕੇ ਪਰਪਲ ਲਾਇਲੈਕ ਮੈਮੋਰੀਅਲ ਪਾਰਕ ਕਰ ਦਿੱਤਾ ਗਿਆ ਹੈ। ਇਸ ਪਾਰਕ ਵਿਚ ਹਾਦਸੇ ਦਾ ਸਿ਼ਕਾਰ ਹਰ ਵਿਅਕਤੀ ਦੀ ਯਾਦ ਵਿੱਚ 109 ਗ੍ਰੇਨਾਈਟ ਪੱਥਰ ਲਾਏ ਗਏ ਹਨ ਤੇ ਸਾਰਿਆਂ ਦੇ ਨਾਂ ਵੀ ਇੱਥੇ ਉੱਕਰੇ ਹੋਏ ਹਨ। ਇਸ ਤੋਂ ਇਲਾਵਾ ਸਿਟੀ ਵੱਲੋਂ ਓਨਟਾਰੀਓ ਹੈਰੀਟੇਜ ਐਕਟ ਤਹਿਤ ਇਸ ਪਾਰਕ ਨੂੰ ਕਲਚਰਲ ਹੈਰੀਟੇਜ ਬਣਾਏ ਜਾਣ ਦੀ ਪ੍ਰਕਿਰਿਆ ਵੀ ਜਾਰੀ ਹੈ।
ਜਿ਼ਕਰਯੋਗ ਹੈ ਕਿ 5 ਜੁਲਾਈ, 1970 ਨੂੰ ਏਅਰ ਕੈਨੇਡਾ ਦੀ ਫਲਾਈਟ 621, ਜੋ ਕਿ ਡਗਲਸ ਡੀਸੀ-8 ਜਹਾਜ਼ ਸੀ, ਕੈਸਲਮੋਰ ਪਿੰਡ ਦੇ ਖੇਤਾਂ ਵਿਚ ਹਾਦਸਾਗ੍ਰਸਤ ਹੋ ਗਈ ਸੀ। ਹੁਣ ਇਹ ਥਾਂ ਕੈਸਲਮੋਰ ਰੋਡ ਤੇ ਮੈਕਵੀਨ ਡਰਾਈਵ ਵਜੋਂ ਜਾਣੀ ਜਾਂਦੀ ਹੈ। ਇਹ ਜਹਾਜ਼ ਲਾਸ ਏਂਜਲਸ ਇੰਟਰਨੈਸ਼ਨਲ ਏਅਰਪੋਰਟ ਵੱਲ ਜਾਂਦੇ ਸਮੇਂ ਟੋਰਾਂਟੋ ਦੇ ਇੰਟਰਨੈਸ਼ਨਲ ਏਅਰਪੋਰਟ ਉੱਤੇ ਲੈਂਡ ਕਰਨ ਦੀ ਕੋਸਿ਼ਸ਼ ਕਰ ਰਿਹਾ ਸੀ ਜਦੋਂ ਇਸ ਨੂੰ ਹਾਦਸਾ ਪੇਸ਼ ਆਇਆ। ਇਸ ਹਾਦਸੇ ਵਿੱਚ ਜਹਾਜ਼ ਵਿੱਚ ਸਵਾਰ 109 ਵਿਅਕਤੀ, ਜਿਨ੍ਹਾਂ ਵਿੱਚ 100 ਯਾਤਰੀ ਤੇ ਅਮਲੇ ਦੇ ਨੌਂ ਮੈਂਬਰ ਵੀ ਸ਼ਾਮਲ ਸਨ, ਮਾਰੇ ਗਏ ਸਨ। ਉਸ ਸਮੇਂ ਇਹ ਹਾਦਸਾ ਏਅਰ ਕੈਨੇਡਾ ਦੇ ਇਤਿਹਾਸ ਦੀ ਦੂਜੀ ਵੱਡੀ ਤ੍ਰਾਸਦੀ ਸੀ।