ਕਈ ਵਾਰ ਜ਼ਿੰਦਗੀ ਦੀਆਂ ਕੁਝ ਘਟਨਾਵਾਂ ਫਿਲਮ ਦੀ ਕਹਾਣੀ ਵਰਗੀ ਹੁੰਦੀਆਂ ਹਨ। ਅਭਿਨੇਤਾ ਅਕਸ਼ੈ ਕੁਮਾਰ ਦੇ ਘਰ ਦੀ ਕਹਾਣੀ ਵੀ ਅਜਿਹੀ ਹੈ। ਰੀਅਲ ਅਸਟੇਟ ਦੀ ਵੈੱਬਸਾਈਟ 'ਤੇ ਸਾਂਝੇ ਕੀਤੇ ਵੀਡੀਓ ਵਿੱਚ ਉਨ੍ਹਾਂ ਨੇ ਆਪਣੇ ਘਰ ਦੀ ਕਹਾਣੀ ਦੱਸੀ ਹੈ। ਅਕਸ਼ੈ ਮੁਤਾਬਕ 32 ਸਾਲ ਪਹਿਲਾਂ ਉਨ੍ਹਾਂ ਨੂੰ ਇਸੇ ਥਾਂ ਤੋਂ ਭਜਾ ਦਿੱਤਾ ਗਿਆ ਸੀ ਅਤੇ ਅੱਜ ਉਹ ਉਸ ਥਾਂ ਦੇ ਮਾਲਕ ਹਨ। ਉਨ੍ਹਾ ਦੱਸਿਆ ਕਿ ਕਰੀਅਰ ਦੇ ਸ਼ੁਰੂ ਵਿੱਚ ਉਨ੍ਹਾਂ ਦੇ ਕੋਲ ਫੋਟੋਸ਼ੂਟ ਲਈ ਪੈਸੇ ਨਹੀਂ ਸਨ। ਇਸ ਲਈ ਫਿਲਮਾਂ ਵਿੱਚ ਆਉਣ ਤੋਂ ਪਹਿਲਾਂ ਉਹ ਮਸ਼ਹੂਰ ਫੋਟੋਗਰਾਫਰ ਜਯੇਸ਼ ਦੇ ਅਸਿਸਟੈਂਟ ਵਜੋਂ ਕੰਮ ਕਰਨ ਲੱਗੇ। ਜਦ ਜਯੇਸ਼ ਤਨਖਾਹ ਦੀ ਗੱਲ ਕਰਦੇ, ਉਹ ਕਹਿੰਦੇ ਕਿ ਤੁਸੀਂ ਰੱਖੋ, ਮੈਂ ਕਿਸੇ ਦਿਨ ਲੈ ਲਵਾਂਗਾ। ਦਰਅਸਲ ਉਹ ਆਪਣੇ ਲਈ ਫੋਟੋ ਸ਼ੂਟ ਦੀ ਉਮੀਦ ਕਰ ਰਹੇ ਸਨ।
ਅਕਸ਼ੈ ਮੁਤਾਬਕ ਇੱਕ ਦਿਨ ਮੈਂ ਜਯੇਸ਼ ਨੂੰ ਕਿਹਾ ਕਿ ਤੁਸੀਂ ਮੇਰਾ ਫੋਟੋਸ਼ੂਟ ਕਰ ਸਕਦੇ ਹੋ। ਮੈਨੂੰ ਤਨਖਾਹ ਦੇਣ ਦੀ ਜ਼ਰੂਰਤ ਨਹੀਂ ਹੈ। ਦੋਵੇਂ ਜੁਹੂ ਬੀਚ 'ਤੇ ਫੋਟੋਸ਼ੂਟ ਲਈ ਗਏ। ਉਥੇ ਇੱਕ ਪੁਰਾਣੇ ਬੰਗਲੇ ਦੀ ਬਾਊਂਡਰੀ ਵਾਲ 'ਤੇ ਅਕਸ਼ੈ ਲੇਟ ਗਏ ਅਤੇ ਫੋਟੋਗਰਾਫਰ ਨੇ ਕਲਿਕ ਕਰਨਾ ਸ਼ੁਰੂ ਕਰ ਦਿੱਤਾ। ਤਦ ਉਸ ਬਿਲਡਿੰਗ ਦਾ ਵਾਚਮੈਨ ਆਇਆ ਅਤੇ ਦੋਵਾਂ ਨੂੰ ਭਜਾ ਦਿੱਤਾ। ਤਦ ਤੱਕ ਤਿੰਨ-ਚਾਰ ਫੋਟੋਆਂ ਕਲਿਕ ਕਰ ਚੁੱਕੇ ਸੀ। ਉਨ੍ਹਾਂ ਦੱਸਿਆ, ‘ਉਸ ਪੁਰਾਣੇ ਬੰਗਲੇ ਦੀ ਜਗ੍ਹਾ 'ਤੇ ਬਿਲਡਿੰਗ ਬਣੀ ਅਤੇ ਮੈਂ ਉਸੇ ਬਿਲਡਿੰਗ ਵਿੱਚ ਰਹਿੰਦਾ ਹਾਂ।” ਇਸ ਮੌਕੇ ਉਨ੍ਹਾਂ ਨੇ ਆਪਣੀਆਂ ਦੋ ਫੋਟੋ ਵੀ ਦਿਖਾਈਆਂ। ਇੱਕ ਫੋਟੋ 32 ਸਾਲ ਪੁਰਾਣੀ ਹੈ, ਜਦ ਕਿ ਦੂਸਰੀ ਤਿੰਨ ਸਾਲ ਪੁਰਾਣੀ। ਦੋਵੇਂ ਉਸੇ ਜਗ੍ਹਾ 'ਤੇ ਖਿੱਚੀਆਂ ਗਈਆਂ ਹਨ।