ਲਾਕਡਾਊਨ ਦੇ ਕਾਰਨ ਪਿਛਲੇ ਢਾਈ ਮਹੀਨੇ ਤੋਂ ਬੰਦ ਪਈ ਇੰਡਸਟਰੀ ਦਾ ਨੁਕਸਾਨ ਫਿਲਮ ਨਿਰਮਤਾਵਾਂ ਨੂੰ ਉਠਾਉਣਾ ਪਵੇਗਾ। ਇਸ ਨੂੰ ਦੇਖ ਕੇ ‘ਕਮਾਂਡੋ’ ਅਭਿਨੇਤਾ ਵਿਧੁਤ ਜਮਵਾਲ ਦਾ ਮੰਨਣਾ ਹੈ ਕਿ ਇਸ ਮੁਸ਼ਕਲ ਦੌਰ ਵਿੱਚ ਹਰ ਕਿਸੇ ਨੂੰ ਇਕੱਠੇ ਹੋਣਾ ਚਾਹੀਦਾ ਹੈ। ਉਨ੍ਹਾਂ ਨੇ ਮੌਜੂਦਾ ਹਾਲਾਤ ਦੇਖਦੇ ਹੋਏ ਉਮੀਦ ਪ੍ਰਗਟਾਈ ਹੈ ਕਿ ਸਿਤਾਰੇ ਆਪਣੀ ਫੀਸ ਘੱਟ ਕਰ ਸਕਦੇ ਹਨ। ਉਨ੍ਹਾਂ ਕਿਹਾ, ਲੋੜ ਪਈ ਤਾਂ ਹਰ ਕਲਾਕਾਰ ਨਿਰਮਾਤਾ ਨੂੰ ਸਪੋਰਟ ਕਰਨ ਲਈ ਆਪਣੀ ਫੀਸ ਬਾਰੇ ਸਮਝੌਤਾ ਕਰੇਗਾ। ਅਸੀਂ ਇੰਨੇ ਪੈਸੇ ਉਨ੍ਹਾਂ ਲੋਕਾਂ ਦੀ ਵਜ੍ਹਾ ਨਾਲ ਹੀ ਕਮਾਉਂਦੇ ਹਾਂ, ਜੋ ਸਾਡੇ ਆਸਪਾਸ ਹਨ।
ਖੁਦ ਦੀ ਫੀਸ ਨਾਲ ਸਮਝੌਤਾ ਕਰਨ ਬਾਰੇ ਵਿਧੁਤ ਕਹਿੰਦੇ ਹਨ ਕਿ ਨਿਰਮਾਤਾ ਅਤੇ ਮੈਂ ਮਿਲ ਕੇ ਫੈਸਲਾ ਲਵਾਂਗੇ। ਜੇ ਮੈਨੂੰ ਲੱਗੇਗਾ ਕਿ ਮੇਰੇ ਫੀਸ ਘੱਟ ਕਰਨ ਨਾਲ ਫਿਲਮ ਨੂੰ ਫਾਇਦਾ ਹੋਵੇਗਾ ਤਾਂ ਇੱਕ ਹਜ਼ਾਰ ਫੀਸਦੀ ਮੈਂ ਆਪਣੀ ਫੀਸ ਘੱਟ ਕਰਾਂਗਾ। ਇਸ ਲਈ ਕਿ ਅਸੀਂ ਜਦ ਨਿਰਮਾਤਾ ਨਾਲ ਫਿਲਮ ਕਰਦੇ ਹਾਂ, ਤਾਂ ਮਨ ਵਿੱਚ ਵੱਡੇ ਸੁਫਨੇ ਹੁੰਦੇ ਹਨ। ਕਈ ਵਾਰ ਘੱਟ ਬਜਟ ਵਿੱਚ ਕੰਮ ਕਰਨਾ ਪੈਂਦਾ ਹੈ, ਤਾਂ ਕਿ ਦੂਸਰੇ ਕੰਮ ਚਲਦੇ ਰਹਿਣ। ਕੋਰੋਨਾ ਸੰਕਟ ਨਾਲ ਪੂਰੀ ਦੁਨੀਆ ਦੀ ਅਰਥ ਵਿਵਸਥਾ ਉੱਤੇ ਅਸਰ ਪਿਆ ਹੈ। ਅਜਿਹੇ ਵਿੱਚ ਮਿਲਜੁਲ ਕੇ ਚੱਲਣ ਨਾਲ ਹੀ ਅਸੀਂ ਸੰਕਟ 'ਚੋਂ ਨਿਕਲ ਸਕਾਂਗੇ। ਵਿਧੁਤ ਦੀ ਆਉਣ ਵਾਲੀ ਫਿਲਮ ‘ਖੁਦਾ ਹਾਫਿਜ਼’ ਹੈ।