ਓਨਟਾਰੀਓ, 13 ਨਵੰਬਰ (ਪੋਸਟ ਬਿਊਰੋ) : ਵਿੱਤ ਮੰਤਰੀ ਵਿੱਕ ਫੈਡੇਲੀ ਨੇ ਪਹਿਲਾਂ ਵਿਧਾਨਸਭਾ ਵਿੱਚ ਐਨਡੀਪੀ ਦੀ ਡਿਪਟੀ ਆਗੂ ਨੂੰ ਈਡੀਅਟ ਆਖਿਆ ਤੇ ਫਿਰ ਬਾਅਦ ਵਿੱਚ ਇਸ ਲਈ ਮੁਆਫੀ ਮੰਗੀ।
ਸਾਰਾ ਸਿੰਘ ਵੱਲੋਂ ਦੋ ਵਾਰੀ ਇਹ ਪੁੱਛੇ ਜਾਣ ਉੱਤੇ ਕਿ ਓਨਟਾਰੀਓ ਕੈਨਾਬਿਸ ਸਟੋਰ ਲਈ ਵੇਅਰਹਾਉਸ ਚਲਾਉਣ ਵਾਲੀ ਫਰਮ ਦੇ ਨਾਂ ਦਾ ਖੁਲਾਸਾ ਕੀਤਾ ਜਾਵੇ, ਫੈਡੇਲੀ ਨੇ ਆਖਿਆ ਕਿ ਸਾਡੇ ਵਿੱਚੋਂ ਕੁੱਝ ਪ੍ਰੋਵਿੰਸ਼ੀਅਲ ਪੱਧਰ ਉੱਤੇ, ਕੁੱਝ ਲੋਕਲ ਪੱਧਰ ਉੱਤੇ ਲੋਕਾਂ ਦੀ ਸੇਵਾ ਕਰ ਰਹੇ ਹਾਂ ਤੇ ਸਾਡੇ ਵਿੱਚੋਂ ਕਈਆਂ ਨੂੰ ਬਿਜ਼ਨਸ ਚਲਾਉਣ ਦਾ ਵੀ ਤਜਰਬਾ ਹੈ ਤੇ ਅਸੀਂ ਜਾਣਦੇ ਹਾਂ ਕਿ ਬਿਜ਼ਨਸ ਕਿਵੇਂ ਚੱਲਦਾ ਹੈ। ਉਨ੍ਹਾਂ ਅੱਗੇ ਚੋਭ ਮਾਰਦਿਆਂ ਆਖਿਆ ਕਿ ਹੁਣ ਇਹ ਵੀ ਪਤਾ ਲੱਗ ਗਿਆ ਹੈ ਕਿ ਐਨਡੀਪੀ ਨੂੰ ਇਹ ਸਮਝ ਨਹੀਂ ਆ ਰਹੀ ਕਿ ਬਿਜ਼ਨਸ ਕਿਸ ਤਰ੍ਹਾਂ ਚੱਲਦਾ ਹੈ। ਪਰ ਕਿਉਂਕਿ ਓਸੀਐਸ ਵੇਅਰਹਾਊਸ ਦੀ ਸਕਿਊਰਿਟੀ ਸਾਡੀ ਮੁੱਖ ਤਰਜੀਹ ਹੈ ਤੇ ਇਸ ਲਈ ਅਸੀਂ ਰੋਜ਼ਮੱਰਾ ਦੀ ਕਾਰਵਾਈ ਬਾਰੇ ਸਾਰੀ ਜਾਣਕਾਰੀ ਸਾਂਝੀ ਨਹੀਂ ਕਰ ਸਕਦੇ। ਅਜਿਹਾ ਆਖ ਕੇ ਫੈਡੇਲੀ ਨੇ ਅੱਗੇ ਆਖਿਆ ਕਿ ਬਿਜ਼ਨਸ ਇਸੇ ਤਰ੍ਹਾਂ ਹੀ ਕੰਮ ਕਰਦਾ ਹੈ, ਈਡੀਅਟ।
ਪ੍ਰਸ਼ਨ ਕਾਲ ਤੋਂ ਬਾਅਦ ਸਾਰਾ ਸਿੰਘ ਨੇ ਆਖਿਆ ਕਿ ਇਹ ਬਹੁਤ ਹੀ ਨਿਰਾਸ਼ ਕਰਨ ਵਾਲੀ ਗੱਲ ਹੈ ਕਿ ਕੈਬਨਿਟ ਮੰਤਰੀ ਨੇ ਉਨ੍ਹਾਂ ਦੇ ਸਵਾਲ ਨੂੰ ਰੋਲ ਦਿੱਤਾ ਤੇ ਉਲਟਾ ਉਨ੍ਹਾਂ ਦੀ ਹੀ ਬੇਇੱਜ਼ਤੀ ਵੀ ਕੀਤੀ। ਉਨ੍ਹਾਂ ਅੱਗੇ ਆਖਿਆ ਕਿ ਇਹ ਬਹੁਤ ਹੀ ਮਾੜਾ ਵਿਵਹਾਰ ਹੈ ਪਰ ਅਸੀਂ ਅਜਿਹੀਆਂ ਟਿੱਪਣੀਆਂ ਨਾਲ ਉਹ ਕੰਮ ਕਰਨਾ ਨਹੀਂ ਛੱਡ ਸਕਦੇ ਜਿਸ ਲਈ ਅਸੀਂ ਇੱਥੇ ਆਏ ਹਾਂ। ਬਰੈਂਪਟਨ ਸੈਂਟਰ ਤੋਂ ਐਮਪੀਪੀ ਨੇ ਆਖਿਆ ਕਿ ਇਸ ਤਰ੍ਹਾਂ ਨਿਜੀ ਹਮਲਾ ਕੀਤੇ ਜਾਣ ਤੋਂ ਉਹ ਕਾਫੀ ਨਿਰਾਸ਼ ਹਨ ਪਰ ਸਾਡਾ ਕੰਮ ਸਵਾਲ ਪੁੱਛਣਾ ਹੀ ਹੈ। ਉਨ੍ਹਾਂ ਆਖਿਆ ਕਿ ਜੇ ਉਨ੍ਹਾਂ ਦੀ ਬੇਇੱਜ਼ਤੀ ਕਰਨ ਦੀ ਥਾਂ ਵਿੱਤ ਮੰਤਰੀ ਵੱਲੋਂ ਉਨ੍ਹਾਂ ਦੇ ਸਵਾਲ ਦਾ ਜਵਾਬ ਦਿੱਤਾ ਜਾਂਦਾ ਤਾਂ ਬਿਹਤਰ ਹੁੰਦਾ।
ਬਾਅਦ ਵਿੱਚ ਫੈਡੇਲੀ ਨੇ ਵਿਧਾਨਸਭਾ ਵਿੱਚ ਆਖਿਆ ਕਿ ਉਹ ਆਪਣੇ ਵੱਲੋਂ ਬੋਲੇ ਗਏ ਅਲਫਾਜ਼ ਉੱਤੇ ਸ਼ਰਮਿੰਦਾ ਹਨ ਤੇ ਮੁਆਫੀ ਚਾਹੁੰਦੇ ਹਨ। ਇਸ ਉੱਤੇ ਸਪੀਕਰ ਟੈੱਡ ਆਰਨੌਟ ਨੇ ਹਾਊਸ ਪ੍ਰਤੀ ਸਨਮਾਨ ਵਿਖਾਉਣ ਲਈ ਫੈਡੇਲੀ ਦਾ ਧੰਨਵਾਦ ਕੀਤਾ। ਇੱਥੇ ਦੱਸਣਾ ਬਣਦਾ ਹੈ ਕਿ ਫੈਡੇਲੀ ਨੇ ਨਿਜੀ ਤੌਰ ਉੱਤੇ ਸਾਰਾ ਸਿੰਘ ਤੋਂ ਮੁਆਫੀ ਨਹੀਂ ਮੰਗੀ।