ਓਨਟਾਰੀਓ, 13 ਨਵੰਬਰ (ਪੋਸਟ ਬਿਊਰੋ) : ਪੇਡ ਸਿੱਕ ਡੇਅਜ਼ ਤੇ ਘੱਟ ਤੋਂ ਘੱਟ ਉਜਰਤਾਂ 14 ਡਾਲਰ ਪ੍ਰਤੀ ਘੰਟਾ ਉੱਤੇ ਕਾਇਮ ਰੱਖਣ ਸਮੇਤ ਹੋਰਨਾਂ ਲੇਬਰ ਸੁਧਾਰਾਂ ਬਾਰੇ ਫੈਸਲੇ ਨੂੰ ਬਦਲੀ ਜਾਣ ਕਾਰਨ ਪ੍ਰੀਮੀਅਰ ਡੱਗ ਫੋਰਡ ਦੀ ਮਕਬੂਲੀਅਤ ਘੱਟ ਰਹੀ ਹੈ। ਇਸ ਦਾ ਖੁਲਾਸਾ ਨਵੇਂ ਪੋਲ ਨਤੀਜਿਆਂ ਤੋਂ ਹੋਇਆ।
ਦ ਕੈਂਪੇਨ ਰਿਸਰਚ ਸਰਵੇਅ ਵਿੱਚ ਪਾਇਆ ਗਿਆ ਕਿ ਫੋਰਡ ਦੀ ਪ੍ਰੋਗਰੈਸਿਵ ਕੰਜ਼ਰਵੇਟਿਵ ਪਾਰਟੀ, ਜਿਸ ਨੇ 7 ਜੂਨ ਨੂੰ ਹੋਈਆਂ ਚੋਣਾਂ 40.5 ਫੀ ਸਦੀ ਵੋਟਾਂ ਨਾਲ ਜਿੱਤੀਆਂ ਸਨ, ਦੀ ਮਕਬੂਲੀਅਤ ਘੱਟ ਕੇ 34 ਫੀ ਸਦੀ ਰਹਿ ਗਈ ਹੈ। ਅੰਤਰਿਮ ਆਗੂ ਜੌਹਨ ਫਰੇਜ਼ਰ ਦੀ ਅਗਵਾਈ ਵਾਲੀ ਲਿਬਰਲ ਪਾਰਟੀ ਨੂੰ ਇਸ ਸਰਵੇਖਣ ਵਿੱਚ 32 ਫੀ ਸਦੀ, ਐਂਡਰੀਆ ਹੌਰਵਥ ਦੇ ਨਿਊ ਡੈਮੋਕ੍ਰੈਟਸ ਨੂੰ 25 ਫੀ ਸਦੀ ਤੇ ਮਾਈਕ ਸ਼ਰੇਨਰ ਦੀ ਗ੍ਰੀਨ ਪਾਰਟੀ ਨੂੰ 7 ਫੀ ਸਦੀ ਵੋਟਾਂ ਹਾਸਲ ਹੋਈਆਂ। ਪਿਛਲੀ ਬਹਾਰ ਵਿੱਚ ਸਾਬਕਾ ਪ੍ਰੀਮੀਅਰ ਕੈਥਲੀਨ ਵਿੰਨ ਦੀ ਅਗਵਾਈ ਵਿੱਚ ਲਿਬਰਲਾਂ ਨੂੰ 19.6 ਫੀ ਸਦੀ ਵੋਟਾਂ ਹਾਸਲ ਹੋਈਆਂ ਸਨ ਜਦਕਿ ਐਂਡਰੀਆ ਹੌਰਵਥ ਦੀ ਅਗਵਾਈ ਵਿੱਚ ਐਨਡੀਪੀ 33.6 ਫੀ ਸਦੀ ਵੋਟਾਂ ਨਾਲ ਦੂਜੇ ਸਥਾਨ ਉੱਤੇ ਸੀ ਤੇ ਗ੍ਰੀਨ ਪਾਰਟੀ ਨੂੰ 4.6 ਫੀ ਸਦੀ ਵੋਟਾਂ ਮਿਲੀਆਂ ਸਨ।
ਕੈਂਪੇਨ ਰਿਸਰਚ ਦੇ ਸੀਈਓ ਐਲੀ ਯੂਫੈਸਟ ਨੇ ਮੰਗਲਵਾਰ ਨੂੰ ਆਖਿਆ ਕਿ ਇੰਜ ਲੱਗ ਰਿਹਾ ਹੈ ਕਿ ਫੋਰਡ ਸਰਕਾਰ ਦਾ ਅਸਲ ਚਿਹਰਾ ਲੋਕਾਂ ਸਾਹਮਣੇ ਆਉਣ ਲੱਗਿਆ ਹੈ। ਇਸ ਤੋਂ ਇਲਾਵਾ ਕੈਥਲੀਨ ਵਿੰਨ ਦੀਆਂ ਯਾਦਾਂ ਧੁੰਦਲਾ ਜਾਣ ਕਾਰਨ ਲਿਬਰਲ ਇੱਕ ਵਾਰੀ ਫਿਰ ਆਪਣੀ ਮਜ਼ਬੂਤ ਸਥਿਤੀ ਵਿੱਚ ਆਉਣ ਲੱਗੇ ਹਨ। ਉਨ੍ਹਾਂ ਆਖਿਆ ਕਿ ਵੋਟਰ ਲਿਬਰਲਾਂ ਨੂੰ ਇੱਕ ਸੁਨੇਹਾ ਦੇਣਾ ਚਾਹੁੰਦੇ ਸਨ ਤੇ ਉਨ੍ਹਾਂ ਅਜਿਹਾ ਕਰ ਵਿਖਾਇਆ। ਉਨ੍ਹਾਂ ਆਖਿਆ ਕਿ ਵਿੰਨ ਦੀ ਘੱਟ ਸਮਝ ਨੇ ਹੀ ਕੰਮ ਵਾਲੀ ਥਾਂ ਉੱਤੇ ਵਰਕਰਾਂ ਦੀ ਹਿਫਾਜ਼ਤ ਤੇ ਵੱਧ ਤੋਂ ਵੱਧ ਮਿਨੀਮਮ ਭੱਤਿਆਂ ਵਰਗੀਆਂ ਲਿਬਰਲ ਪੇਸ਼ਕਦਮੀਆਂ ਦੇ ਬਾਵਜੂਦ ਲਿਬਰਲਾਂ ਦਾ ਬੇੜਾ ਡੁਬਾਇਆ।
ਫੋਰਡ ਨੂੰ ਤਬਦੀਲੀਆਂ ਲਿਆਉਣ ਤੋਂ ਪਹਿਲਾਂ ਲੋਕਾਂ ਨੂੰ ਇਹ ਸਮਝਾਉਣਾ ਚਾਹੀਦਾ ਹੈ ਕਿ ਇਨ੍ਹਾਂ ਮਾਪਦੰਡਾਂ ਤੋਂ ਛੁਟਕਾਰਾ ਪਾਇਆ ਜਾਣਾ ਕਾਰੋਬਾਰਾਂ ਤੇ ਕਾਮਿਆਂ ਲਈ ਕਿਸ ਤਰ੍ਹਾਂ ਚੰਗਾ ਹੈ ਪਰ ਉਨ੍ਹਾਂ ਅਜਿਹਾ ਕੁੱਝ ਨਹੀਂ ਕੀਤਾ। ਇਸੇ ਲਈ 77 ਫੀ ਸਦੀ ਓਨਟਾਰੀਓ ਵਾਸੀ ਦੋ ਪੇਡ ਸਿੱਕ ਡੇਅਜ਼ ਖਤਮ ਕਰਨ ਦੇ ਫੋਰਡ ਦੇ ਫੈਸਲੇ ਦੇ ਖਿਲਾਫ ਹਨ ਜਦਕਿ 17 ਫੀ ਸਦੀ ਇਸ ਦੇ ਪੱਖ ਵਿੱਚ ਵੀ ਹਨ ਤੇ 6 ਫੀ ਸਦੀ ਇਸ ਸਬੰਧ ਵਿੱਚ ਸਪਸ਼ਟ ਨਹੀਂ ਹਨ। ਪਹਿਲੀ ਜਨਵਰੀ ਤੋਂ ਘੱਟ ਤੋਂ ਘੱਟ ਉਜਰਤਾਂ 15 ਡਾਲਰ ਪ੍ਰਤੀ ਘੰਟਾ ਕੀਤੇ ਜਾਣ ਦੇ ਸਾਬਕਾ ਲਿਬਰਲ ਸਰਕਾਰ ਦੇ ਫੈਸਲੇ ਉੱਤੇ ਫੋਰਡ ਸਰਕਾਰ ਵੱਲੋਂ ਰੋਕ ਲਾਏ ਜਾਣ ਦਾ ਇਸ ਸਰਵੇਖਣ ਵਿੱਚ ਹਿੱਸਾ ਲੈਣ ਵਾਲੇ 52 ਫੀ ਸਦੀ ਲੋਕਾਂ ਵੱਲੋਂ ਵਿਰੋਧ ਕੀਤਾ ਗਿਆ ਹੈ। ਫੋਰਡ ਸਰਕਾਰ ਅਨੁਸਾਰ ਹੁਣ ਇਹ ਉਜਰਤਾਂ ਅਕਤੂਬਰ 2020 ਤੱਕ 14 ਡਾਲਰ ਪ੍ਰਤੀ ਘੰਟਾ ਹੀ ਰਹਿਣਗੀਆਂ। ਇਸ ਫੈਸਲੇ ਨੂੰ 42 ਫੀ ਸਦੀ ਵੋਟਰਾਂ ਵੱਲੋਂ ਸਮਰਥਨ ਦਿੱਤਾ ਗਿਆ ਤੇ 6 ਫੀ ਸਦੀ ਲੋਕ ਇਸ ਬਾਬਤ ਸਪਸ਼ਟ ਰਾਇ ਨਹੀਂ ਰੱਖਦੇ।