ਬਰੈਂਪਟਨ, 15 ਜੂਨ (ਪੋਸਟ ਬਿਊਰੋ) : ਪ੍ਰੋਵਿੰਸ ਵੱਲੋਂ ਇਜਾਜ਼ਤ ਮਿਲਣ ਤੋਂ ਬਾਅਦ ਰੀਓਪਨਿੰਗ ਦੀ ਤਿਆਰੀ ਕਰ ਰਹੇ ਲੋਕਲ ਰੈਸਟੋਰੈਂਟਸ ਅਤੇ ਬਾਰਜ਼ ਦਾ ਸਮਰਥਨ ਕਰਨ ਲਈ ਬੀਤੇ ਹਫਤੇ ਬਰੈਂਪਟਨ ਸਿਟੀ ਕਾਉਂਸਲ ਵੱਲੋਂ ਨਵੀਆਂ ਯੋਜਨਾਂਵਾਂ ਨੂੰ ਮਨਜ਼ੂਰੀ ਦਿੱਤੀ ਗਈ। ਰੀਜਨਲ ਕਾਉਂਸਲਰ ਪੈਟ ਫੋਰਟਿਨੀ ਵੱਲੋਂ ਮਤਾ ਪੇਸ਼ ਕਰਕੇ ਲੋਕਲ ਰੈਸਟੋਰੈਂਟਸ ਤੇ ਬਾਰਜ਼ ਨੂੰ ਆਊਟਡੋਰ ਸਪੇਸਿਜ਼ ਦਾ ਪਸਾਰ ਕਰਨ ਦੀ ਇਜਾਜ਼ਤ ਦੇਣ ਦੀ ਮੰਗ ਕੀਤੀ ਗਈ ਤਾਂ ਕਿ ਉਹ ਆਪਣੇ ਹੋਏ ਨੁਕਸਾਨ ਦੀ ਕਿਸੇ ਹੱਦ ਤੱਕ ਪੂਰਤੀ ਕਰ ਸਕਣ। ਉਨ੍ਹਾਂ ਵੱਲੋਂ ਇਹ ਮਤਾ ਜੈਕ ਐਸਟਰਜ਼ ਬਾਰ ਐਂਡ ਗ੍ਰਿੱਲ ਅਤੇ ਓਸਕਰਜ਼ ਰੋਡਹਾਊਸ ਬਾਰ ਐਂਡ ਗ੍ਰਿੱਲ ਨਾਲ ਗੱਲਬਾਤ ਕਰਨ ਤੋਂ ਬਾਅਦ ਲਿਆਂਦਾ ਗਿਆ। ਕਾਉਂਸਲ ਵੱਲੋਂ ਇਹ ਮਤਾ ਸਰਬਸੰਮਤੀ ਨਾਲ ਪਾਸ ਕਰ ਦਿੱਤਾ ਗਿਆ।
ਬਰੈਂਪਟਨ ਵਿਚਲੇ ਰੈਸਟੋਰੈਂਟਸ ਤੇ ਬਾਰਜ਼ ਨੂੰ ਸਾਈਡਵਾਕਸ ਤੇ ਪ੍ਰਾਈਵੇਟ ਪਾਰਕਿੰਗ ਏਰੀਆਜ਼ ਵਿੱਚ ਆਪਣੇ ਪੈਟੀਓਜ਼ ਦਾ ਪਸਾਰ ਕਰਨ ਦੀ ਇਜਾਜ਼ਤ ਦਿੱਤੀ ਜਾਵੇਗੀ। ਇਹ ਸਭ ਪ੍ਰੋਵਿੰਸ ਵੱਲੋਂ ਆਊਟਡੋਰ ਡਾਈਨ ਇਨ ਸਰਵਿਸਿਜ਼ ਦੇ ਸ਼ੁਰੂ ਹੋਣ ਦੀ ਇਜਾਜ਼ਤ ਦਿੱਤੇ ਜਾਣ ਤੋਂ ਬਾਅਦ ਕੀਤਾ ਜਾਵੇਗਾ। ਹਾਲ ਦੀ ਘੜੀ ਓਨਟਾਰੀਓ ਸਰਕਾਰ ਵੱਲੋਂ ਪੀਲ ਰੀਜਨ ਦੇ ਰੈਸਟੋਰੈਂਟਸ, ਬਾਰਜ਼ ਅਤੇ ਹੋਰ ਅਸਟੈਬਲਿਸ਼ਮੈਂਟਸ (restaurants, bars and other establishments) ਨੂੰ ਖੋਲ੍ਹਣ ਦੀ ਇਜਾਜ਼ਤ ਨਹੀਂਂ ਦਿੱਤੀ ਗਈ ਹੈ। 2020 ਲਈ ਆਊਟਡੋਰ ਪੈਟੀਓ ਅਤੇ ਸਾਈਡਵਾਕ ਪਰਮਿਟ ਫੀਸ ਵੀ ਵਸੂਲੀ ਜਾਵੇਗੀ।