ਜਲੰਧਰ, 13 ਨਵੰਬਰ (ਪੋਸਟ ਬਿਊਰੋ)- ਨਿੱਜੀ ਹਵਾਬਾਜ਼ੀ ਕੰਪਨੀ ਜੈਟ ਏਅਰਵੇਜ਼ ਨੂੰ ਚਾਲੂ ਸਾਲ ਦੀ ਦੂਸਰੀ ਤਿਮਾਹੀ ਵਿੱਚ 1,261 ਕਰੋੜ ਰੁਪਏ ਦਾ ਘਾਟਾ ਹੋਇਆ ਹੈ। ਇਸ ਨਾਲ ਪਿਛਲੇ ਵਿੱਤ ਸਾਲ ਦੀ ਜੁਲਾਈ ਸਤੰਬਰ ਮਿਆਦ ਵਿੱਚ ਕੰਪਨੀ ਨੇ 71 ਕਰੋੜ ਰੁਪਏ ਦਾ ਲਾਭ ਕਮਾਇਆ ਸੀ।
ਕੀਤੀ ਗਈ ਸਮੀਖਿਆ ਵਿੱਚ ਜੈਟ ਏਅਰਵੇਜ਼ ਦੇ ਨਾਲ ਕੰਪਨੀ ਇੰਡੀਗੋ ਨੂੰ ਵੀ 652.13 ਕਰੋੜ ਘਾਟਾ ਹੋਇਆ ਹੈ। ਇਸ ਤੋਂ ਪਿਛਲੇ ਵਿੱਤ ਸਾਲ ਦੀ ਬਰਾਬਰ ਤਿਮਾਹੀ 'ਚ ਉਸ ਨੂੰ 551.56 ਕਰੋੜ ਰੁਪਏ ਦਾ ਲਾਭ ਹੋਇਆ ਸੀ।
ਹਵਾਬਾਜ਼ੀ ਕੰਪਨੀਆਂ ਈਂਧਨ ਦੀ ਉਚੀ ਲਾਗਤ, ਰੁਪਏ ਵਿੱਚ ਗਿਰਾਵਟ ਅਤੇ ਬਾਜ਼ਾਰ ਦੀ ਮੁਕਾਬਲੇਬਾਜ਼ੀ ਨਾਲ ਜੂਝ ਰਹੀਆਂ ਹਨ। ਇਸ ਨਾਲ ਉਨ੍ਹਾਂ ਦੀ ਚਲਾਉਣ ਦੀ ਲਾਗਤ ਵਧੀ ਹੈ। ਨਕਦੀ ਦੀ ਕਮੀ ਦਾ ਸਾਹਮਣਾ ਕਰ ਰਹੀ ਜੈਟ ਏਅਰਵੇਜ਼ ਨੂੰ ਇਕੱਲੇ ਆਧਾਰ 'ਤੇ 1,297.46 ਕਰੋੜ ਰੁਪਏ ਸ਼ੁੱਧ ਘਾਟਾ ਹੋਇਆ ਹੈ। ਇਸ ਤੋਂ ਪਿਛਲੇ ਵਿੱਤ ਸਾਲ ਦੀ ਇਸ ਮਿਆਦ ਵਿੱਚ ਕੰਪਨੀ ਨੂੰ 49.63 ਕਰੋੜ ਰੁਪਏ ਦਾ ਸਿੰਗਲ ਸ਼ੁੱਧ ਲਾਭ ਹੋਇਆ ਸੀ। ਨਕਦੀ ਦੀ ਕਮੀ ਨਾਲ ਕੰਪਨੀ ਨੂੰ ਆਪਣੇ ਸਟਾਫ ਦੀ ਤਨਖਾਹ ਸਮੇਂ 'ਤੇ ਦੇਣ ਵਿੱਚ ਮੁਸ਼ਕਿਲ ਆ ਰਹੀ ਹੈ।
ਕੰਪਨੀ ਨੇ ਇਕ ਬਿਆਨ ਵਿੱਚ ਦੱਸਿਆ ਕਿ ਸਮੀਖਿਆ ਵਿੱਚ ਉਸ ਦੀ ਕੁੱਲ ਵਿਕਰੀ 6,363 ਕਰੋੜ ਰੁਪਏ ਰਹੀ ਜੋ ਪਿਛਲੇ ਵਿੱਤ ਸਾਲ ਦੀ ਬਰਾਬਰ ਤਿਮਾਹੀ ਦੀ 5952 ਕਰੋੜ ਰੁਪਏ ਦੀ ਆਮਦਨ ਤੋਂ 6.9 ਪ੍ਰਤੀਸ਼ਤ ਵੱਧ ਹੈ। ਕੱਚੇ ਤੇਲ ਦੀਆਂ ਕੀਮਤਾਂ ਵਧਣ ਨਾਲ ਕੰਪਨੀ ਦੇ ਤੇਲ 'ਤੇ ਖਰਚ ਵਿੱਚ ਵਾਧਾ ਦਰਜ ਕੀਤਾ ਗਿਆ ਹੈ। ਸਮੀਖਿਆ ਵਿੱਚ ਕੰਪਨੀ ਦਾ ਤੇਲ 'ਤੇ ਖਰਚ 58.6 ਪ੍ਰਤੀਸ਼ਤ ਵਧ ਕੇ 2,419.76 ਕਰੋੜ ਰੁਪਏ ਰਿਹਾ, ਜੋ ਇਸ ਤੋਂ ਪਿਛਲੇ ਵਿੱਤ ਸਾਲ ਦੀ ਇਸੇ ਮਿਆਦ ਵਿੱਚ 1,525.66 ਕਰੋੜ ਰੁਪਏ ਸੀ। ਕੰਪਨੀ ਦੇ ਮੁੱਖ ਕਾਰਜਕਾਰੀ ਵਿਨੈ ਦੁਬੇ ਨੇ ਕਿਹਾ ਕਿ ਉਨ੍ਹਾਂ ਦਾ ਸਪੱਸ਼ਟ ਟੀਚਾ ਲਾਭ ਕਮਾਉਣ 'ਤੇ ਹੈ। ਅਸੀਂ ਅਜੇ ਬਦਲਾਅ ਦੇ ਦੌਰ ਦੇ ਦਰਮਿਆਨ ਹਾਂ। ਉਹ ਆਪਣੇ ਸਾਰੇ ਸਹਿਯੋਗੀਆਂ ਨਾਲ ਜੁੜੇ ਹਨ ਜੋ ਘਰੇਲੂ ਹਵਾਬਾਜ਼ੀ ਖੇਤਰ ਦੀਆਂ ਚੁਣੌਤੀਆਂ ਨੂੰ ਸਮਝਦੇ ਹਨ ਅਤੇ ਸਹਿਯੋਗੀ ਬਣੇ ਹੋਏ ਹਨ।