ਲੁਧਿਆਣਾ, 13 ਨਵੰਬਰ (ਪੋਸਟ ਬਿਊਰੋ)- ਕਦੇ ਸੁਫਨੇ ਵਿੱਚ ਨਹੀਂ ਸੋਚਿਆ ਸੀ ਕਿ ਆਪਣੀ ਜ਼ਮੀਨ ਕਿਸੇ ਫਿਲਮ ਦੀ ਸ਼ੂਟਿੰਗ ਲਈ ਕਿਰਾਏ 'ਤੇ ਦੇਣ ਤੋਂ ਇੰਨਾ ਪੈਸਾ ਮਿਲੇਗਾ ਕਿ ਘਰ ਦੇ ਹਾਲਾਤ ਸੁਧਰ ਜਾਣਗੇ।
ਦਸ ਦਿਨ ਪਹਿਲਾਂ ਇਸ ਬਾਰੇ ਗੱਲਬਾਤ ਹੋਈ ਤਾਂ ਪਹਿਲਾਂ ਕਿਸਾਨ ਸੋਚੀਂ ਪੈ ਗਿਆ ਕਿ ਕੀ ਕੀਤਾ ਜਾਏ। ਫਿਰ ਦੱਸਿਆ ਗਿਆ ਕਿ ਕਰੀਬ ਤਿੰਨ ਹਫਤੇ ਲਈ ਇੱਕ ਕਿੱਲੇ ਜ਼ਮੀਨ ਦਾ ਕਿਰਾਇਆ 85 ਹਜ਼ਾਰ ਰੁਪਏ ਮਿਲੇਗਾ ਅਤੇ 25 ਨਵੰਬਰ ਤੱਕ ਸਾਢੇ ਚਾਰ ਕਿੱਲੇ ਜ਼ਮੀਨ ਕਿਰਾਏ 'ਤੇ ਦੇਣ ਬਦਲੇ ਤਿੰਨ ਲੱਖ 65 ਹਜ਼ਾਰ ਰੁਪਏ ਕਿਰਾਇਆ ਮਿਲਣ ਦਾ ਸਮਝੌਤਾ ਹੋਇਆ। ਸਾਰੀ ਰਕਮ ਮਿਲਦੇ ਸਾਰ ਇਸ ਵਿੱਚੋਂ ਇੱਕ ਲੱਖ ਰੁਪਏ ਕਰਜ਼ੇ ਮੋੜਨ ਲਈ ਵੱਖ ਕੱਢ ਲਏ। ਬਾਕੀ ਰਕਮ ਘਰ ਦੇ ਜ਼ਰੂਰੀ ਖਰਚਿਆਂ ਤੇ 14 ਸਾਲਾ ਬੇਟੇ ਬਲਕਰਨ ਸਿੰਘ ਤੇ 12 ਸਾਲਾ ਬੇਟੀ ਪ੍ਰਭਜੋਤ ਕੌਰ ਦੀ ਪੜ੍ਹਾਈ ਵਿੱਚ ਖਰਚ ਕਰਨੀ ਹੈ। ਇਹ ਕਿਹਾ ਹੈ ਬੱਲੋਵਾਲ ਪਿੰਡ ਦੇ ਕਿਸਾਨ ਸੁਰਿੰਦਰ ਸਿੰਘ ਨੇ। ਉਸ ਦੀ ਜ਼ਮੀਨ 'ਤੇ ਬਾਲੀਵੁੱਡ ਸਟਾਰ ਸਲਮਾਨ ਖਾਨ ਦੀ ਫਿਲਮ ‘ਭਾਰਤ’ ਦੀ ਸ਼ੂਟਿੰਗ ਹੋ ਰਹੀ ਹੈ। ਸੁਰਿੰਦਰ ਦੇ ਇਲਾਵਾ ਉਸ ਦੇ ਭਰਾ ਚਰਨਜੀਤ ਸਿੰਘ ਦੀ ਛੇ ਕਿੱਲੇ ਅਤੇ ਪਿੰਡ ਦੇ ਕੁਲਦੀਪ ਸਿੰਘ ਦੀ ਸਾਢੇ ਪੰਜ ਕਿੱਲੇ ਜ਼ਮੀਨ 'ਤੇ ਵੀ ਸ਼ੂਟਿੰਗ ਦੇ ਲੇਈ ਸੈਟ ਲੱਗੇ ਹਨ। ਉਨ੍ਹਾਂ ਨੂੰ ਵੀ 85 ਹਜ਼ਾਰ ਕਿੱਲਾ ਕਿਰਾਇਆ ਮਿਲਿਆ ਹੈ।