ਬਰੈਂਪਟਨ, 14 ਜੂਨ (ਪੋਸਟ ਬਿਊਰੋ) : ਮੇਅਰ ਪੈਟ੍ਰਿਕ ਬ੍ਰਾਊਨ ਵੱਲੋਂ ਕਾਉਂਸਲ ਦੇ ਪੱਖ ਉੱਤੇ ਇਹ ਐਲਾਨ ਕੀਤਾ ਗਿਆ ਹੈ ਕਿ ਬਰੈਂਪਟਨ ਟਰਾਂਜਿ਼ਟ 22 ਜੂਨ ਨੂੰ ਸ਼ੁਰੂ ਹੋਣ ਜਾ ਰਹੇ ਹਫਤੇ ਵਿੱਚ ਆਪਣੇ ਰਾਈਡਰਜ਼ ਨੂੰ 100,000 ਨੌਨ ਮੈਡੀਕਲ ਮਾਸਕਸ ਵੰਡੇਗੀ। ਇਹ ਮਾਸਕਸ ਉਦੋਂ ਤੱਕ ਵੰਡੇ ਜਾਣਗੇ ਜਦੋਂ ਤੱਕ ਇਨ੍ਹਾਂ ਦੀ ਸਪਲਾਈ ਬਣੀ ਰਹੇਗੀ। ਇਹ ਸਿਟੀ ਆਫ ਬਰੈਂਪਟਨ ਵੱਲੋਂ ਰੀਓਪਨਿੰਗ ਤੇ ਰਿਕਵਰੀ ਪਲੈਨ ਤਹਿਤ ਚੱੁਕਿਆ ਜਾਣ ਵਾਲਾ ਪਹਿਲਾ ਕਦਮ ਹੈ।

ਇਹ ਨੌਨ ਮੈਡੀਕਲ ਮਾਸਕਸ ਬਰੈਂਪਟਨ ਟਰਾਂਜਿ਼ਟ ਦੇ ਬ੍ਰਾਮੇਲੀਆ, ਬਰੈਂਪਟਨ ਗੇਟਵੇਅ ਤੇ ਡਾਊਨਟਾਊਨ ਟਰਮੀਨਲਜ਼ ਉੱਤੇ ਵੰਡੇ ਜਾਣਗੇ। ਇਸ ਸਬੰਧੀ ਹੋਰ ਵੇਰਵੇ ਆਉਣ ਵਾਲੇ ਹਫਤਿਆਂ ਵਿੱਚ ਐਲਾਨੇ ਜਾਣਗੇ। ਪੀਲ ਪਬਲਿਕ ਹੈਲਥ ਅਤੇ ਓਨਟਾਰੀਓ ਸਰਕਾਰ ਵੱਲੋਂ ਪਬਲਿਕ ਟਰਾਂਜਿ਼ਟ ਵਿੱਚ ਮਾਸਕ ਪਾਉਣ ਦੀ ਕੀਤੀ ਗਈ ਸਿਫਾਰਿਸ਼ ਤੋਂ ਬਾਅਦ ਬਰੈਂਪਟਨ ਟਰਾਂਜਿ਼ਟ ਰਾਈਡਰਜ਼ ਨੂੰ
ਬੱਸਾਂ ਤੇ ਟਰਮੀਨਲਜ਼ ਉੱਤੇ ਨੌਨ ਮੈਡੀਕਲ ਮਾਸਕਸ ਪਾਉਣ ਦੀ ਸਿਫਾਰਿਸ਼ ਕੀਤੀ ਗਈ ਹੈ।
2 ਜੁਲਾਈ ਤੋਂ ਬਰੈਂਪਟਨ ਟਰਾਂਜਿ਼ਟ ਰਾਈਡਰਜ਼ ਤੇ ਆਪਰੇਟਰਜ਼ ਲਈ ਨੌਨ ਮੈਡੀਕਲ ਮਾਸਕਸ ਪਾਉਣਾ ਲਾਜ਼ਮੀ ਹੋਵੇਗਾ। ਹਾਲਾਂਕਿ ਮਾਸਕਸ ਸਾਰਿਆਂ ਲਈ ਲਾਜ਼ਮੀ ਹੋਣਗੇ ਪਰ ਦੋ ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਜਾਂ ਫਿਰ ਅਪਾਹਜ ਅਤੇ ਹੋਰਨਾਂ ਮੈਡੀਕਲ ਕੰਡੀਸ਼ਨਜ਼ ਵਾਲਿਆਂ, ਜਿਸ ਕਾਰਨ ਉਨ੍ਹਾਂ ਨੂੰ ਮਾਸਕ ਪਾਉਣ ਵਿੱਚ ਦਿੱਕਤ ਹੋਵੇ, ਲਈ ਇਹ ਮਾਸਕ ਪਾਉਣ ਤੋਂ ਛੋਟ ਹੋਵੇਗੀ।