ਪੈਰਿਸ, 13 ਨਵੰਬਰ (ਪੋਸਟ ਬਿਊਰੋ)- ਯੂਰਪੀ ਦੇਸ਼ਾਂ ਵਿੱਚ ਟੈਕ ਅਤੇ ਇੰਟਰਨੈਟ ਕੰਪਨੀਆਂ ਨੂੰ ਸਾਈਟ ਉੱਤੇ ਨਫਰਤ ਫੈਲਾਉਣ ਵਾਲਾ ਜਾਂ ਅੱਤਵਾਦ ਦਾ ਸਮਰਥਨ ਤੇ ਉਸ ਨੂੰ ਹੱਲਾਸ਼ੇਰੀ ਦੇਣ ਵਾਲਾ ਕਿਸੇ ਵੀ ਤਰ੍ਹਾਂ ਦਾ ਕੰਟੈਂਟ ਹੋਵੇ, ਉਸ ਨੂੰ ਹਟਾਉਣਾ ਪਵੇਗਾ। ਸਾਈਬਰ ਹਮਲੇ, ਹੇਟ ਸਪੀਚ, ਆਨਲਾਈਨ ਸੈਂਸਰਸ਼ਿਪ ਤੇ ਡੇਟਾ ਲੀਕ ਵਰਗੇ ਖਤਰੇ ਤੋਂ ਸੁਰੱਖਿਆ ਲਈ ਯੂਨੈਸਕੋ ਇੰਟਰਨੈਟ ਗਵਰਨੈਂਸ ਫੋਰਮ ਅਤੇ ਫਰਾਂਸੀਸੀ ਰਾਸ਼ਟਰਪਤੀ ਇਮੈਨੂਅਲ ਮੈਕਰੋਂ ਨੇ ਟੈਕ ਮਾਹਰਾਂ ਦੇ ਨਾਲ ਮਿਲ ਕੇ ਇੰਟਰਨੈਟ ਨੂੰ ਰੈਗੂਲੇਟ ਕਰਨ ਦੀ ਇਹ ਪਹਿਲ ਕੀਤੀ ਹੈ। ਇਸ ਐਲਾਨ ਪੱਤਰ ਨੂੰ ‘ਪੈਰਿਸ ਕਾਲ ਫਾਰ ਟਰੱਸਟ ਐਂਡ ਸਕਿਓਰਿਟੀ ਇਨ ਸਾਇਬਰ ਸਪੇਸ’ ਸਿਰਲੇਖ ਨਾਲ ਲਾਂਚ ਕੀਤਾ ਗਿਆ ਹੈ।
ਇਸ ਐਲਾਨ ਪੱਤਰ ਵਿੱਚ ਟੈਕ ਕੰਪਨੀਆਂ ਅਤੇ ਸਰਕਾਰਾਂ ਨੂੰ ਅਪੀਲ ਕੀਤੀ ਗਈ ਹੈ ਕਿ ਉਹ ਚੋਣਾਂ ਦੌਰਾਨ ਦਖਲ ਤੇ ਟ੍ਰੇਡ ਸੀਕ੍ਰੇਟ ਦੀ ਚੋਰੀ ਵਰਗੀਆਂ ਚੀਜ਼ਾਂ ਨੂੰ ਰੋਕਣ ਲਈ ਸੁਰੱਖਿਆ ਮਜ਼ਬੂਤ ਕਰਨ। ਉਂਝ ‘ਪੈਰਿਸ ਕਾਲ’ ਦੀ ਪਹਿਲ ਟੈਕ ਕੰਪਨੀਆਂ ਨੇ ਕੀਤੀ ਸੀ, ਪਰ ਫਰਾਂਸ ਦੇ ਅਧਿਕਾਰੀਆਂ ਨੇ ਇਸ ਨੂੰ ਦੋਬਾਰਾ ਡਰਾਫਟ ਕੀਤਾ ਤੇ ਇਸ ਵਿੱਚ ਯੂ ਐੱਨ ਮਾਹਰਾਂ ਦੀ ਮਦਦ ਲਈ ਹੈ। ਪੈਰਿਸ ਕਾਲ ਦਾ ਇਹ ਦਸਤਾਵੇਜ਼ ਸਾਇਬਰ ਸਪੇਸ ਵਿੱਚ ਅੰਤਰਰਾਸ਼ਟਰੀ ਮਨੁੱਖੀ ਅਧਿਕਾਰ ਕਾਨੂੰਨਾਂ ਨੂੰ ਲਾਗੂ ਕਰਨ ਦੀ ਪੁਸ਼ਟੀ ਕਰਦਾ ਹੈ। ਗੂਗਲ-ਫੇਸਬੁਕ ਵੀ ਇਸ 'ਤੇ ਸਾਈਨ ਲਈ ਤਿਆਰ ਹਨ। ਟੈਕ ਦਿੱਗਜ ਮਾਈਕਰੋਸਾਫਟ ਵੀ ਯੋਗਦਾਨ ਦੇ ਰਹੀ ਹੈ। ਐਲਾਨ ਪੱਤਰ 'ਤੇ ਯੂਰਪ ਦੇ ਸਾਰੇ ਦੇਸ਼ਾਂ ਨੇ ਸਾਈਨ ਕੀਤੇ ਹਨ। ਪੈਰਿਸ ਕਾਲ 'ਤੇ ਕੰਮ ਕਰ ਰਹੇ ਮਾਹਰਾਂ ਦਾ ਕਹਿਣਾ ਹੈ ਕਿ ਸਾਇਬਰ ਸਪੇਸ 'ਤੇ ਅਜੇ ਜ਼ਿਆਦਾ ਕੰਟੋਰਲ ਨਿੱਜੀ ਕੰਪਨੀਆਂ ਦਾ ਹੈ, ਜਦ ਅੱਧੀ ਤੋਂ ਵੱਧ ਮਨੁੱਖਤਾ ਆਨਲਾਈਨ ਹੈ ਤਾਂ ਇੰਟਰਨੈੱਟ ਨੂੰ ਆਰਗੇਨਾਈਜ਼ ਕਰਨ ਦੀ ਜ਼ਰੂਰਤ ਹੈ। ਫਰੀ, ਓਪਨ ਅਤੇ ਸੁਰੱਖਿਅਤ ਇੰਟਰਨੈਟ ਦੇ ਨਾਲ ਕਈ ਖਤਰੇ ਹਨ। ਇਨ੍ਹਾਂ ਨੂੰ ਪਹਿਲੋਂ ਸਮਝ ਕੇ ਸੁਰੱਖਿਆ ਦੇ ਉਪਾਅ ਕਰਨੇ ਜ਼ਰੂਰੀ ਹਨ।