ਟੋਕੀਓ, 13 ਨਵੰਬਰ (ਪੋਸਟ ਬਿਊਰੋ)- ਜਾਪਾਨ ਦੇ ਸਾਫਟਬੈਂਕ ਗਰੁੱਪ ਕਾਰਪ ਨੇ ਆਪਣੀ ਟੈਲੀਕਾਮ ਕੰਪਨੀ ਸਾਫਟਬੈਂਕ ਕਾਰਪ ਦਾ ਇਕ ਵੱਡਾ ਮੁੱਢਲਾ ਪਬਲਿਕ ਆਫਰ (ਆਈ ਪੀ ਓ) ਲਿਆਉਣ ਦੀ ਤਿਆਰੀ ਕੀਤੀ ਹੈ। ਇਹ ਆਈ ਪੀ ਓ 2.4 ਲੱਖ ਕਰੋੜ ਯੇਨ (2104 ਅਰਬ ਡਾਲਰ) ਦਾ ਹੋਵੇਗਾ। ਇਸ ਗਰੁੱਪ ਨੂੰ ਆਈ ਪੀ ਓ ਲਿਆਉਣ ਦੀ ਮਨਜ਼ੂਰੀ ਮਿਲ ਗਈ ਹੈ। ਇਹ ਦੁਨੀਆ ਦੇ ਸਭ ਤੋਂ ਵੱਡੇ ਆਈ ਪੀ ਓ ਵਿੱਚੋਂ ਇਕ ਹੋਵੇਗਾ। ਇਸ ਦੇ ਨਾਲ ਇਹ ਜਾਪਾਨ 'ਚ ਅੱਜ ਤੱਕ ਦਾ ਸਭ ਤੋਂ ਵੱਡਾ ਆਈ ਪੀ ਓ ਹੋ ਸਕਦਾ ਹੈ। ਇਸ ਤੋਂ ਮਿਲੀ ਰਕਮ ਨਾਲ ਸਮੂਹ ਨੂੰ ਕਰਜ਼ਾ ਮੋੜਨ 'ਚ ਮਦਦ ਮਿਲੇਗੀ ਅਤੇ ਕੰਪਨੀ ਨੂੰ ਨਵੇਂ ਦੌਰ ਦੇ ਇਨੋਵੇਸ਼ਨ 'ਚ ਨਿਵੇਸ਼ ਕਰਨ ਲਈ ਵਾਧੂ ਪੂੰਜੀ ਮਿਲ ਜਾਵੇਗੀ।
ਇਸ ਗਰੁੱਪ ਨੇ ਛੋਟੇ ਗੇਮਿੰਗ ਸਟਾਰਟਅਪ ਤੋਂ ਲੈ ਕੇ ਐਪ ਆਧਾਰਿਤ ਟੈਕਸੀ ਸੇਵਾ ਕੰਪਨੀ ਉਬਰ ਟੈਕਨਾਲੋਜੀ ਇੰਕ ਅਤੇ ਈ-ਕਾਮਰਸ ਕੰਪਨੀ ਅਲੀਬਾਬਾ ਗਰੁੱਪ ਹੋਲਡਿੰਗ ਲਿਮਟਿਡ ਤੱਕ ਕਈ ਇਨੋਵੇਟਿਵ ਕਾਰੋਬਾਰਾਂ 'ਚ ਨਿਵੇਸ਼ ਕੀਤਾ ਹੋਇਆ ਹੈ। ਜਾਪਾਨ ਦੇ ਵਿੱਤ ਮੰਤਰਾਲੇ 'ਚ ਕੱਲ੍ਹ ਆਈ ਇਕ ਸੂਚਨਾ ਮੁਤਾਬਕ ਆਈ ਪੀ ਓ ਤਹਿਤ ਸਾਫਟਬੈਂਕ ਕਾਰਪ ਦੇ 1.6 ਅਰਬ ਸ਼ੇਅਰ ਅਨੁਮਾਨਿਤ 1500 ਯੇਨ (13 ਹਜ਼ਾਰ) ਪ੍ਰਤੀ ਸ਼ੇਅਰ ਦੀ ਦਰ ਨਾਲ ਵਿਕਰੀ ਦੇ ਲਈ ਪੇਸ਼ ਕੀਤੇ ਜਾਣਗੇ। ਆਈ ਪੀ ਓ ਵਿੱਚ ਜੇ ਵੱਧ ਸ਼ੇਅਰਾਂ ਲਈ ਬੋਲੀ ਹਾਸਲ ਹੋਈ ਤਾਂ ਆਫਰ ਦਾ ਆਕਾਰ 240.6 ਅਰਬ ਯੇਨ ਹੋਰ ਵਧਾਇਆ ਜਾ ਸਕਦਾ ਹੈ, ਜਿਸ ਨਾਲ ਆਫਰ ਦਾ ਆਕਾਰ 25 ਅਰਬ ਡਾਲਰ ਤੱਕ ਪੁੱਜ ਸਕਦਾ ਹੈ। ਅੱਜ ਤੱਕ ਦੇ ਸਭ ਤੋਂ ਵੱਡੇ ਆਈ ਪੀ ਓ ਵਿੱਚ 2014 'ਚ ਅਲੀਬਾਬਾ ਨੇ ਲਗਭਗ 25 ਅਰਬ ਡਾਲਰ ਦੀ ਰਕਮ ਜੁਟਾਈ ਸੀ। ਆਈ ਪੀ ਓ ਦੀ ਕੀਮਤ 10 ਦਸੰਬਰ ਨੂੰ ਤੈਅ ਹੋਵੇਗੀ ਤੇ ਸਾਫਟਬੈਂਕ ਕਾਰਪ 19 ਦਸੰਬਰ ਨੂੰ ਟੋਕੀਓ ਸਟਾਕ ਐਕਸਚੇਂਜ 'ਤੇ ਲਗਭਗ 7.18 ਲੱਖ ਕਰੋੜ ਯੇਨ ਦੇ ਸ਼ੁਰੂ ਦੇ ਬਾਜ਼ਾਰ ਕੀਮਤ 'ਤੇ ਸੂਚੀਬੱਧ ਹੋਵੇਗੀ।