ਸਿੰਗਾਪੁਰ, 13 ਨਵੰਬਰ (ਪੋਸਟ ਬਿਊਰੋ) : ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਆਸੀਆਨ ਸਿਖਰ ਵਾਰਤਾ ਵਿੱਚ ਹਿੱਸਾ ਲੈਣ ਲਈ ਸਿੰਗਾਪੁਰ ਪਹੁੰਚ ਚੁੱਕੇ ਹਨ। ਟਰੂਡੋ ਇਸ ਆਸ ਨਾਲ ਉੱਥੇ ਗਏ ਹਨ ਕਿ ਜਦੋਂ ਤੱਕ ਉਹ ਇਸ ਵਾਰਤਾ ਵਿੱਚ ਹਿੱਸਾ ਲੈ ਕੇ ਕੈਨੇਡਾ ਪਰਤਣਗੇ ਉਦੋਂ ਤੱਕ 10 ਮੇਜਰ ਸਪਲਾਇਰ ਤੇ ਗਾਹਕਾਂ ਦੇ 10 ਮੁਲਕਾਂ ਦੇ ਬਲਾਕ ਨਾਲ ਉਨ੍ਹਾਂ ਦਾ ਮੁਕਤ ਵਪਾਰ ਸਮਝੌਤਾ ਸਿਰੇ ਚੜ੍ਹ ਚੁੱਕਿਆ ਹੋਵੇਗਾ।
ਐਸੋਸਿਏਸ਼ਨ ਆਫ ਸਾਊਥਈਸਟ ਏਸ਼ੀਅਨ ਨੇਸ਼ਨਜ਼ ਦੇ ਕਈ ਮੈਂਬਰ ਦੇ ਗਾਹਕਾਂ ਦੀ ਗਿਣਤੀ ਲਗਾਤਾਰ ਵੱਧਦੀ ਜਾ ਰਹੀ ਹੈ ਤੇ ਬਾਕੀ ਦੁਨੀਆਂ ਨਾਲੋਂ ਇਨ੍ਹਾਂ ਦੀ ਅਬਾਦੀ ਵੀ ਜਿ਼ਆਦਾ ਹੈ। ਆਸੀਆਨ ਮੁਲਕਾਂ ਜਿਨ੍ਹਾਂ ਵਿੱਚ ਫਿਲੀਪੀਨਜ਼, ਇੰਡੋਨੇਸ਼ੀਆ, ਬਰੂਨੇਈ, ਸਿੰਗਾਪੁਰ, ਮਲੇਸ਼ੀਆ, ਥਾਈਲੈਂਡ, ਵਿਅਤਨਾਮ, ਲਾਓਸ, ਕੰਬੋਡੀਆ ਤੇ ਬਰਮਾ ਸ਼ਾਮਲ ਹਨ, ਦੀ ਸਾਂਝੀ ਆਬਾਦੀ 650 ਮਿਲੀਅਨ ਹੈ ਤੇ ਇਹ ਪਹਿਲਾਂ ਹੀ ਕੈਨੇਡਾ ਦਾ ਛੇਵਾਂ ਸੱਭ ਤੋਂ ਵੱਡਾ ਕਾਰੋਬਾਰੀ ਭਾਈਵਾਲ ਹੈ।
ਇਹ ਸਿਖਰ ਵਾਰਤਾ ਪੂਰਬੀ ਏਸ਼ੀਆ ਦਾ ਸੱਭ ਤੋਂ ਅਹਿਮ ਇੱਕਠ ਹੈ ਤੇ ਟਰੂਡੋ ਲਗਾਤਾਰ ਦੂਜੇ ਸਾਲ ਉੱਥੇ ਗਏ ਹਨ। ਪਿਛਲੀ ਵਾਰੀ ਉਹ ਪਹਿਲੇ ਕੈਨੇਡੀਅਨ ਸਨ ਜਿਨ੍ਹਾਂ ਵੱਲੋਂ ਇਸ ਸਿਖਰ ਵਾਰਤਾ ਵਿੱਚ ਹਿੱਸਾ ਲਿਆ ਗਿਆ ਸੀ। ਪਰ ਮਾਹਿਰਾਂ ਦਾ ਕਹਿਣਾ ਹੈ ਕਿ ਕੈਨੇਡਾ ਲਈ ਇਹ ਸੌਖਾ ਨਹੀਂ ਹੈ। ਆਸੀਆਨ ਮੁਲਕ ਅਜੇ ਤੱਕ ਪਰਵਾਨ ਕੀਤੀ ਜਾ ਚੁੱਕੀ ਪੈਸੇਫਿਕ ਰਿਮ ਟਰੇਡ ਡੀਲ, ਜਿਸ ਨੂੰ ਕਾਂਪਰੀਹੈਂਸਿਵ ਐਂਡ ਪ੍ਰੋਗਰੈਸਿਵ ਅਗਰੀਮੈਂਟ ਫੌਰ ਟਰਾਂਸ ਪੈਸੇਫਿਕ ਪਾਰਟਨਰਸਿ਼ਪ (ਸੀਪੀਟੀਪੀਪੀ) ਆਖਿਆ ਜਾਂਦਾ ਹੈ, ਉੱਤੇ ਦਸਤਖ਼ਤ ਕਰਨ ਲਈ ਵੀ ਸਹਿਮਤ ਨਹੀਂ ਹੋਏ ਹਨ।
ਕਿਊਬਿਕ ਦੇ ਸਾਬਕਾ ਪ੍ਰੀਮੀਅਰ ਜੀਨ ਚਾਰੈਸਟ ਦਾ ਕਹਿਣਾ ਹੈ ਕਿ ਯੂਰਪ ਤੇ ਪੈਸੇਫਿਕ ਰਿੰਮ ਦੇਸ਼ਾਂ ਨਾਲ ਕੈਨੇਡਾ ਦੀ ਫਾਈਨਲ ਹੋ ਚੁੱਕੀ ਟਰੇਡ ਡੀਲ, ਮੈਕਸਿਕੋ ਤੇ ਅਮਰੀਕਾ ਨਾਲ ਸਿਰੇ ਚੜ੍ਹੀ ਕੈਨੇਡਾ ਦੀ ਡੀਲ ਤੋਂ ਇਲਾਵਾ ਅਮਰੀਕਾ ਦੇ ਰਾਸ਼ਟਰਪਤੀ ਡੌਨਲਡ ਟਰੰਪ ਵੱਲੋਂ ਹੋਰਨਾਂ ਦੇਸ਼ਾਂ ਨਾਲ ਪਾਏ ਗਏ ਕਾਰੋਬਾਰੀ ਅੜਿੱਕਿਆਂ ਨਾਲ ਕੈਨੇਡਾ ਨੂੰ ਫਾਇਦਾ ਜ਼ਰੂਰ ਹੋ ਸਕਦਾ ਹੈ।