ਪਹਿਲਾਂ ਮਾਂਡਲਿੰਗ, ਫਿਰ ਐਕਟਿੰਗ ਤੇ ਉਸ ਤੋਂ ਬਾਅਦ ਫਿਲਮ ਨਿਰਮਾਤਰੀ ਵਜੋਂ ਸਫਲਤਾ ਦੇ ਝੰਡੇ ਗੱਡ ਚੁੱਕੀ ਅਨੁਸ਼ਕਾ ਸ਼ਰਮਾ ਹੌਲੀ ਹੌਲੀ ਸਫਲਤਾ ਦੀਆਂ ਪੌੜੀਆਂ ਚੜ੍ਹੀ ਅਤੇ ਅੱਜ ਉਹ ਸਿਖਰ ਉੱਤੇ ਵੀ ਪਹੁੰਚ ਚੁੱਕੀ ਹੈ। ਮਾਇਆ ਨਗਰੀ ਵਿੱਚ 10 ਸਾਲ ਦਾ ਸਫਰ ਪੂਰਾ ਕਰਨ ਤੋਂ ਬਾਅਦ ਅਨੁਸ਼ਕਾ ਲਈ ਇੱਕ ਨਵੇਂ ਦੌਰ ਦੀ ਸ਼ੁਰੂਆਤ ਹੈ ਤੇ ਉਸ ਦਾ ਕਹਿਣਾ ਹੈ ਕਿ ਸਮੇਂ ਨਾਲ ਉਹ ਜ਼ਿਆਦਾ ਸ਼ਾਂਤ ਇਨਸਾਨ ਬਣ ਚੁੱਕੀ ਹੈ। ਸਾਲ 2008 ਵਿੱਚ ਸ਼ਾਹਰੁਖ ਖਾਨ ਦੇ ਆਪੋਜ਼ਿਟ ਫਿਲਮ ‘ਰੱਬ ਨੇ ਬਨਾ ਦੀ ਜੋੜੀ’ ਨਾਲ ਐਕਟਿੰਗ ਕਰੀਅਰ ਸ਼ੁਰੂ ਕਰਨ ਵਾਲੀ ਅਨੁਸ਼ਕਾ ਨੇ ਕਿਹਾ ਕਿ ਖੁਦ ਨੂੰ ਬਿਹਤਰ ਢੰਗ ਨਾਲ ਵਿਕਸਿਤ ਕਰਨਾ ਹਮੇਸ਼ਾ ਉਸ ਦਾ ਟੀਚਾ ਰਿਹਾ ਹੈ। ਇਸੇ ਨੇ ਉਸ ਨੂੰ ਬਿਹਤਰੀਨ ਅਭਿਨੇਤਰੀ ਬਣਾਇਆ ਹੈ।
ਅਭਿਨੇਤਰੀ ਤੇ ਫਿਲਮਕਾਰ ਦੇ ਰੂਪ ਵਿੱਚ ਖੁਦ ਨੂੰ ਖੁਸ਼ ਦੱਸਣ ਵਾਲੀ ਅਨੁਸ਼ਕਾ ਕਹਿੰਦੀ ਹੈ, ‘‘ਮੇਰੇ ਵਿੱਚ ਅਨੋਖਾ ਬਦਲਾਅ ਆਇਆ ਹੈ, ਮੈਂ ਪਹਿਲਾਂ ਦੇ ਮੁਕਾਬਲੇ ਬਹੁਤ ਸ਼ਾਂਤ ਹੋ ਗਈ ਹਾਂ। ਮੇਰੀ ਲਗਾਤਾਰ ਕੋਸ਼ਿਸ਼ ਵਿਅਕਤੀ ਦੇ ਰੂਪ 'ਚ ਆਪਣਾ ਵਿਕਾਸ ਕਰਨਾ ਰਹੀ ਹੈ। ਮੈਂ ਦਿ੍ਰੜ੍ਹਤਾ ਨਾਲ ਮੰਨਦੀ ਹਾਂ ਕਿ ਵਿਅਕਤੀ ਦੇ ਰੂਪ ਵਿੱਚ ਤੁਹਾਡੇ ਆਪਣੇ ਵਿਕਾਸ 'ਚ ਤੁਹਾਡਾ ਭਾਵਨਾਤਮਕ ਵਿਕਾਸ ਸ਼ਾਮਲ ਹੁੰਦਾ ਹੈ। ਇਹ ਤੁਹਾਨੂੰ ਬਿਹਤਰ ਬਣਾਉਂਦਾ ਹੈ। ਮੇਰੇ 'ਚ ਬਦਲਾਅ ਨੂੰ ਜੇ ਮੇਰੇ ਪ੍ਰਦਰਸ਼ਨ ਵਜੋਂ ਦਰਸ਼ਕਾਂ ਨੂੰ ਸੁਧਾਰ ਨਜ਼ਰ ਆਵੇ ਤਾਂ ਇਸ ਦਾ ਮਤਲਬ ਹੈ ਕਿ ਮੇਰੇ ਵਿੱਚ ਸੁਧਾਰ ਆਇਆ ਹੈ। ਮੈਨੂੰ ਲੱਗਦਾ ਹੈ ਕਿ ਮੇਰੇ ਵਿੱਚ ਕੁਝ ਠਹਿਰਾਅ ਆ ਗਿਆ ਹੈ। ਮੈਂ ਦੁਨੀਆ ਨੂੰ ਸਮਝਣ ਲੱਗੀ ਹਾਂ। ਇਹੀ ਹੁੰਦਾ ਹੈ ਵਿਕਾਸ।”