ਹੈਮਿਲਟਨ, 12 ਨਵੰਬਰ (ਪੋਸਟ ਬਿਊਰੋ) : ਇਸ ਹਫਤੇ ਦੇ ਸ਼ੁਰੂ ਵਿੱਚ ਹੈਮਿਲਟਨ ਦੇ ਗਰੌਸਰੀ ਸਟੋਰ ਤੋਂ ਬ੍ਰੈੱਡ ਖਰੀਦਣ ਜਾ ਰਹੀ ਮਹਿਲਾ ਨੂੰ ਉਸ ਵਿੱਚ ਚੂਹਾ ਮਿਲਣ ਤੋਂ ਬਾਅਦ ਲੋਬਲਾਅ ਕੰਪਨੀਜ਼ ਲਿਮਟਿਡ ਵੱਲੋਂ ਮੁਆਫੀ ਮੰਗੀ ਗਈ ਹੈ। ਲੋਬਲਾਅ ਦੀ ਤਰਜ਼ਮਾਨ ਕੈਰਨ ਗੰਬਜ਼ ਨੇ ਇੱਕ ਈਮੇਲ ਵਿੱਚ ਲਿਖਿਆ ਕਿ ਅਸੀਂ ਇਸ ਮਾਮਲੇ ਨੂੰ ਬੜੀ ਗੰਭੀਰਤਾ ਨਾਲ ਲੈ ਰਹੇ ਹਾਂ ਤੇ ਇਸ ਦੀ ਹਰ ਸੰਭਾਵੀ ਜਾਂਚ ਕਰ ਰਹੇ ਹਾਂ। ਸਾਡੇ ਵੱਲੋਂ ਸਬੰਧਤ ਗਾਹਕ ਤੋਂ ਵੀ ਇਸ ਸਬੰਧ ਵਿੱਚ ਮੁਆਫੀ ਮੰਗ ਲਈ ਗਈ ਹੈ। ਮੰਗਲਵਾਰ ਨੂੰ ਇੱਕ ਮਹਿਲਾ ਨੇ ਫੇਸਬੁੱਕ ਉੱਤੇ ਪੋਸਟ ਕੀਤਾ ਕਿ ਨੋ ਫਰਿੱਲਜ਼ ਉੱਤੇ ਉਹ ਕੈਸ਼ ਰਜਿਸਟਰ ਕੋਲ ਸੀ ਜਦੋਂ ਉਸ ਨੇ ਬ੍ਰੈੱਡ ਵਿੱਚ ਜਿਊਂਦਾ ਚੂਹਾ ਵੇਖਿਆ। ਉਸ ਨੇ ਅੱਗੇ ਲਿਖਿਆ ਕਿ ਇਸ ਨਾਲ ਉਸ ਨੂੰ ਕਾਫੀ ਝਟਕਾ ਲੱਗਿਆ ਤੇ ਉਸ ਨੂੰ ਘਿਣ ਵੀ ਆਈ। ਉਸ ਨੇ ਆਖਿਆ ਕਿ ਹੁਣ ਉਹ ਆਪਣੀ ਗਰੌਸਰੀ ਦੀਆਂ ਆਈਟਮਾਂ ਨੂੰ ਹੋਰ ਧਿਆਨ ਨਾਲ ਵੇਖਣ ਲੱਗੀ ਹੈ।
ਗੰਬਜ਼ ਨੇ ਆਖਿਆ ਕਿ ਸਟੋਰ ਥਰਡ ਪਾਰਟੀ ਪੈਸਟ ਕੰਟਰੋਲ ਟੀਮ ਨਾਲ ਰਲ ਕੇ ਹੁਣ ਬੇਕਰੀ ਦੀਆਂ ਚੀਜ਼ਾਂ ਦਾ ਰੋਜ਼ਾਨਾ ਹੋਰ ਚੰਗੀ ਤਰ੍ਹਾਂ ਮੁਆਇਨਾ ਕਰਦਾ ਹੈ। ਉਨ੍ਹਾਂ ਇਹ ਵੀ ਆਖਿਆ ਕਿ ਸਟੋਰ ਇਹ ਯਕੀਨੀ ਬਣਾਉਣਾ ਚਾਹੁੰਦਾ ਹੈ ਕਿ ਭਵਿੱਖ ਵਿੱਚ ਇਸ ਤਰ੍ਹਾਂ ਦੀ ਗੜਬੜੀ ਦੁਬਾਰਾ ਨਾ ਹੋਵੇ। ਅਸੀਂ ਆਪਣੇ ਸਪਲਾਇਰ ਨਾਲ ਇਸ ਦਾ ਸਰੋਤ ਪਤਾ ਲਾਉਣ ਲਈ ਵਚਨਬੱਧ ਹਾਂ।