ਵਾਸਿ਼ੰਗਟਨ, 4 ਜੂਨ (ਪੋਸਟ ਬਿਊਰੋ)- ਗੈਰ-ਗੋਰੇ ਜਾਰਜ ਫਲਾਇਡ ਦੀ ਮੌਤ ਦੇ ਬਾਅਦ ਜਾਰੀ ਹਿੰਸਾ ਤੇ ਲੁੱਟ ਖੋਹ ਤੋਂ ਪ੍ਰੇਸ਼ਾਨ ਅਮਰੀਕੀਆਂ ਨੂੰ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦਾ ਵਿਹਾਰ ਜ਼ਰਾ ਵੀ ਚੰਗਾ ਨਹੀਂ ਲੱਗਦਾ।
ਵ੍ਹਾਈਟ ਹਾਊਸ ਦੇ ਨੇੜੇ ਭੰਨ ਤੋੜ ਦਾ ਸ਼ਿਕਾਰ ਹੋਏ 200 ਸਾਲ ਪੁਰਾਣੇ ਸੇਂਟ ਜੌਨ ਚਰਚ ਦੇ ਨੇੜੇ ਕਰੀਬੀਆਂ ਦੇ ਨਾਲ ਡੋਨਾਲਡ ਟਰੰਪ ਦਾ ਫੋਟੋ ਖਿਚਵਾਉਣਾ ਬਹੁਤੇ ਲੋਕਾਂ ਨੂੰ ਰਾਸ ਨਹੀਂ ਆ ਰਿਹਾ। ਲੋਕ ਇਸ ਫੋਟੋ ਨੂੰ ਬਹੁਤ ਭੱਦਾ ਦੱਸ ਰਹੇ ਹਨ। ਕਿਹਾ ਜਾ ਰਿਹਾ ਹੈ ਕਿ ਟਰੰਪ ਦਾ ਅਕਸ ਚਮਕਾਉਣ ਲਈ ਬੇਟੀ ਈਵਾਂਕਾ ਨੇ ਏਦਾਂ ਦੀ ਫੋਟੋ ਸ਼ੂਟ ਦੀ ਸਲਾਹ ਦਿੱਤੀ ਹੈ। ਈਸਾਈ ਧਰਮ ਗੁਰੂਆਂ ਨੇ ਵੀ ਟਰੰਪ ਦੀ ਇਸ ਗੱਲ ਲਈ ਤਿੱਖੀ ਆਲੋਚਨਾ ਕੀਤੀ ਹੈ।
ਅਸਲ ਵਿੱਚ ਫਲਾਇਡ ਦੀ ਮੌਤ ਦੇ ਬਾਅਦ ਟਰੰਪ ਨੇ ਜਿਸ ਤਰ੍ਹਾਂ ਇਸ ਮਾਮਲੇ ਨੂੰ ਲਿਆ ਹੈ, ਉਸ ਤੋਂ ਨਾ ਕੇਵਲ ਆਮ ਅਮਰੀਕੀ ਬਲਕਿ ਦੇਸ਼ ਦੀ ਮੀਡੀਆ ਵੀ ਉਨ੍ਹਾਂ ਤੋਂ ਨਾਰਾਜ਼ ਹੈ। ਪੂਰੇ ਰੌਲੇ ਦੌਰਾਨ ਉਨ੍ਹਾਂ ਦੇ ਬਿਆਨਾਂ ਤੇ ਟਵੀਟ ਨਾਲ ਗੱਲ ਸੰਭਲਣ ਦੀ ਥਾਂ ਲਗਾਤਾਰ ਵਿਗੜਦੀ ਗਈ ਹੈ। ਸ਼ੁੱਕਰਵਾਰ ਰਾਤ ਭੜਕੇ ਪ੍ਰਦਰਸ਼ਨਕਾਰੀ ਵ੍ਹਾਈਟ ਹਾਊਸ ਦੇ ਕਾਫੀ ਨੇੜੇ ਪਹੁੰਚ ਗਏ ਤਾਂ ਟਰੰਪ ਨੂੰ ਪਰਵਾਰ ਸਮੇਤ ਬੰਕਰ ਵਿੱਚ ਪਨਾਹ ਲੈਣੀ ਪਈ। ਇਸ ਨਮੋਸ਼ੀ ਨੂੰ ਮਿਟਾਉਣ ਲਈ ਟਰੰਪ ਨੇ ਵ੍ਹਾਈਟ ਹਾਊਸ ਦੇ ਨੇੜੇ 200 ਸਾਲ ਪੁਰਾਣੇ ਸੇਂਟ ਜਾਨ ਚਰਚ ਦਾ ਦੌਰਾ ਕਰ ਕੇ ਸ਼ਾਨ ਦਿਖਾਉਣ ਦੀ ਨੀਤੀ ਬਣਾਈ। ਲੋਕਾਂ ਨੂੰ ਜਦ ਇਸ ਦੀ ਜਾਣਕਾਰੀ ਹੋਈ ਤਾਂ ਸੋਸ਼ਲ ਮੀਡੀਆ 'ਤੇ ਟਰੰਪ ਦੇ ਖਿਲਾਫ ਗੁੱਸਾ ਫੁੱਟ ਪਿਆ।