ਵਾਸ਼ਿੰਗਟਨ, 4 ਜੂਨ (ਪੋਸਟ ਬਿਊਰੋ)- ਜਾਰਜ ਫਲਾਇਡ ਦੀ ਮੌਤ ਕਾਰਨ ਚੱਲ ਰਹੇ ਹਿੰਸਕ ਪ੍ਰਦਰਸ਼ਨਾਂ ਦੌਰਾਨ ਇੱਕ ਭਾਰਤੀ-ਅਮਰੀਕੀ ਨੇ ਪ੍ਰਦਰਸ਼ਨਕਾਰੀ ਲੋਕਾਂ ਨੂੰ ਪਨਾਹ ਦੇ ਕੇ ਉਨ੍ਹਾਂ ਦਾ ਦਿਲ ਜਿੱਤ ਲਿਆ ਹੈ।
ਵਾਸ਼ਿੰਗਟਨ ਡੀ ਸੀ ਦੇ ਰਹਿਣ ਵਾਲੇ ਰਾਹੁਲ ਦਗੁਬੇ ਨੇ ਅਜਿਹੇ ਕਈ ਪ੍ਰਦਰਸ਼ਨਕਾਰੀਆਂ ਨੂੰ ਆਪਣੇ ਘਰ ਪਨਾਹ ਦਿੱਤੀ ਸੀ। ਐਕਸਵਾਇਰ ਰਸਾਲੇ ਨੂੰ ਦਿੱਤੀ ਇੰਟਰਵਿਊ 'ਚ 44 ਸਾਲਾ ਰਾਹੁਲ ਨੇ ਕਿਹਾ ਕਿ ਲਗੱਭਗ 75 ਲੋਕ ਮੇਰੇ ਘਰ 'ਚ ਸਨ। ਉਨ੍ਹਾਂ ਨੂੰ ਇੱਕ ਸੋਫੇ ਜਿੰਨੀ ਹੀ ਥਾਂ ਮਿਲ ਰਹੀ ਸੀ। ਇੱਕ ਮਾਂ ਅਤੇ ਬੇਟੀ ਦੇ ਪਰਵਾਰ ਨੂੰ ਮੈਂ ਆਪਣੇ ਬੇਟੇ ਦਾ ਕਮਰਾ ਦਿੱਤਾ ਤਾਂ ਕਿ ਉਹ ਆਰਾਮ ਕਰ ਸਕਣ। ਇਥੋਂ ਤੱਕ ਕਿ ਬਾਥਟੱਬ 'ਚ ਵੀ ਲੋਕ ਸਨ ਪਰ ਕੋਈ ਵੀ ਕਿਸੇ ਗੱਲ ਦੀ ਸ਼ਿਕਾਇਤ ਨਹੀਂ ਕਰਦਾ ਸੀ। ਉਹ ਸੁਰੱਖਿਅਤ ਸਨ ਅਤੇ ਇੱਕ-ਦੂਜੇ ਨੂੰ ਸਹਾਰਾ ਦੇ ਰਹੇ ਸਨ। ਰਾਹੁਲ ਕੱਲ੍ਹ ਦੇ ਪ੍ਰਦਰਸ਼ਨ ਤੋਂ ਬਾਅਦ ਚਰਚਾ 'ਚ ਆ ਗਏ ਅਤੇ ਉਨ੍ਹਾਂ ਦੇ ਇਸ ਕਦਮ ਲਈ ਸੋਸ਼ਲ ਮੀਡੀਆ 'ਤੇ ਵੀ ਉਨ੍ਹਾਂ ਦੀ ਕਾਫੀ ਸ਼ਲਾਘਾ ਕੀਤੀ ਗਈ ਹੈ। ਇੱਕ ਵਰਕਰ ਨੇ ਟਵੀਟ ਕੀਤਾ ਕਿ ਰਾਹੁਲ ਨੇ ਕੱਲ੍ਹ ਰਾਤ ਸਾਡੀ ਜਾਨ ਬਚਾਈ। ਇੱਕ ਹੋਰ ਐਲੀਸਨ ਲੇਨ ਨੇ ਲਿਖਿਆ ਕਿ ਪੇਪਰ ਸਪ੍ਰੇਅ ਨਾਲ ਪੁਲਸ ਨੇ ਮੈਨੂੰ ਜ਼ਖ਼ਮੀ ਕਰ ਦਿੱਤਾ ਸੀ। ਉਸ ਤੋਂ ਬਾਅਦ ਮੈਂ ਡੀ ਸੀ 'ਚ ਇੱਕ ਘਰ 'ਚ ਹਾਂ। ਘਰ ਨੂੰ ਪੁਲਸ ਨੇ ਘੇਰ ਰੱਖਿਆ ਹੈ ਅਤੇ ਅੰਦਰ ਅਸੀਂ ਲਗੱਭਗ 100 ਲੋਕ ਹਾਂ। ਸਾਰੇ ਲੋਕਾਂ ਨੇ ਆਪਣੇ ਘਰ ਦੇ ਦਰਵਾਜ਼ੇ ਖੋਲ੍ਹ ਦਿੱਤੇ ਹਨ ਅਤੇ ਪ੍ਰਦਰਸ਼ਨਕਾਰੀਆਂ ਦੀ ਦੇਖਭਾਲ ਕਰ ਰਹੇ ਹਨ।
ਰਾਹੁਲ ਦੁਬੇ ਨੇ ‘ਬਜਫੀਡ ਨਿਊਜ਼' ਨੂੰ ਕਿਹਾ ਕਿ ਜੇ ਤੁਸੀਂ ਦੇਖਿਆ ਹੁੰਦਾ ਕਿ ਮੇਰੀਆਂ ਅੱਖਾਂ ਮੂਹਰੇ ਕੀ ਹੋ ਰਿਹਾ ਸੀ। ਕੋਈ ਬਦਲ ਨਹੀਂ ਬਚਿਆ ਸੀ। ਲੋਕਾਂ 'ਤੇ ਪੇਪਰ ਸਪ੍ਰੇਅ ਕੀਤਾ ਜਾ ਰਿਹਾ ਸੀ ਅਤੇ ਉਨ੍ਹਾਂ ਨੂੰ ਕੁੱਟਿਆ ਜਾ ਰਿਹਾ ਸੀ।