ਓਨਟਾਰੀਓ, 12 ਨਵੰਬਰ (ਪੋਸਟ ਬਿਊਰੋ) : ਕੈਬਨਿਟ ਮੰਤਰੀ ਤੇ ਦੋ ਸੀਨੀਅਰ ਸਟਾਫਰਜ਼ ਦੇ ਜਾਣ ਤੋਂ ਬਾਅਦ ਪਹਿਲੀ ਵਾਰੀ ਵਿਧਾਨਸਭਾ ਵਿੱਚ ਮੁੜ ਢੁਕੇ ਐਮਪੀਪੀਜ਼ ਵਿੱਚੋਂ ਕੁੱਝ ਵੱਲੋਂ ਇਹ ਦੋਸ਼ ਲਾਇਆ ਜਾ ਰਿਹਾ ਹੈ ਕਿ ਪ੍ਰੀਮੀਅਰ ਡੱਗ ਫੋਰਡ ਵੱਲੋਂ ਸੈਕਸ ਸਕੈਂਡਲ ਉੱਤੇ ਪਰਦਾ ਪਾਉਣ ਦੀ ਕੋਸਿ਼ਸ਼ ਕੀਤੀ ਜਾ ਰਹੀ ਹੈ।
ਗ੍ਰੀਨਜ਼ ਤੇ ਲਿਬਰਲਾਂ ਨੇ ਐਨਡੀਪੀ ਦੀ ਸੁਰ ਵਿੱਚ ਸੁਰ ਮਿਲਾ ਕੇ ਇਹ ਦੋਸ਼ ਲਾਉਣੇ ਸ਼ੁਰੂ ਕੀਤੇ ਹਨ ਕਿ ਫੋਰਡ ਨੇ ਦਸ ਦਿਨ ਪਹਿਲਾਂ ਆਰਥਿਕ ਵਿਕਾਸ ਮੰਤਰੀ ਜਿੰਮ ਵਿਲਸਨ ਵੱਲੋਂ ਅਚਾਨਕ ਹੀ ਆਪਣਾ ਅਹੁਦਾ ਛੱਡਣ ਦੇ ਅਸਲ ਕਾਰਨਾਂ ਨੂੰ ਲੁਕੋ ਕੇ ਓਨਟਾਰੀਓ ਵਾਸੀਆਂ ਨੂੰ ਗੁੰਮਰਾਹ ਕਰਨ ਦੀ ਕੋਸਿ਼ਸ਼ ਕੀਤੀ ਹੈ। ਸੋਮਵਾਰ ਨੂੰ ਗ੍ਰੀਨ ਆਗੂ ਮਾਈਕ ਸ਼ਰੇਨਰ ਨੇ ਆਖਿਆ ਕਿ ਇਹ ਸੱਭ ਸਿਆਸੀ ਖੇਡਾਂ ਹਨ। ਉਹ ਲੋਕਾਂ ਨੂੰ ਗੁੰਮਰਾਹ ਕਰਨ ਦੀ ਕੋਸਿ਼ਸ਼ ਕਰ ਰਹੇ ਹਨ ਤਾਂ ਕਿ ਉਹ ਮੰਤਰੀ ਦੇ ਅਸਤੀਫਾ ਦੇਣ ਦੇ ਅਸਲ ਕਾਰਨਾਂ ਦਾ ਪਤਾ ਨਾ ਲਾ ਸਕੇ। ਇਹ ਸਵੀਕਾਰਨਯੋਗ ਨਹੀਂ ਹੈ। ਇਸ ਮਾਮਲੇ ਵਿੱਚ ਪ੍ਰੀਮੀਅਰ ਅਸਫਲ ਰਹੇ ਹਨ।
1990 ਤੋਂ ਪ੍ਰੋਗਰੈਸਿਵ ਕੰਜ਼ਰਵੇਟਿਵ ਆਗੂ ਰਹੇ ਤੇ ਮਾਈਕ ਹੈਰਿਸ ਤੇ ਅਰਨੀ ਈਵਜ਼ ਤਹਿਤ ਸਾਬਕਾ ਮੰਤਰੀ ਰਹੇ ਵਿਲਸਨ ਨੇ ਅਚਾਨਕ ਹੀ 2 ਨਵੰਬਰ ਨੂੰ ਫੋਰਡ ਦੀ ਕੈਬਨਿਟ ਤੇ ਕਾਕਸ ਤੋਂ ਅਸਤੀਫਾ ਦੇ ਦਿੱਤਾ। ਪ੍ਰੀਮੀਅਰ ਦੇ ਆਫਿਸ ਵੱਲੋਂ ਜਾਰੀ ਕੀਤੇ ਗਏ ਬਿਆਨ ਵਿੱਚ ਆਖਿਆ ਗਿਆ ਕਿ ਵਿਲਸਨ ਆਪਣੀ ਸ਼ਰਾਬ ਦੀ ਲਤ ਤੋਂ ਖਹਿੜਾ ਛੁਡਾਉਣਾ ਚਾਹੁੰਦੇ ਹਨ। ਪਰ ਬਾਅਦ ਵਿੱਚ ਸਾਹਮਣੇ ਆਇਆ ਕਿ ਵਿਲਸਨ ਨੂੰ ਅਸਤੀਫਾ ਦੇਣ ਤੋਂ ਇੱਕ ਰਾਤ ਪਹਿਲਾਂ ਹੀ ਸਾਰਨੀਆ ਦੇ ਟਰਿੱਪ ਉੱਤੇ ਜਿਨਸੀ ਸੋ਼ਸ਼ਣ ਸਬੰਧੀ ਲੱਗੇ ਦੋਸ਼ਾਂ ਕਾਰਨ ਅਸਤੀਫਾ ਦੇਣ ਲਈ ਆਖਿਆ ਗਿਆ ਸੀ। ਉਹ ਸ਼ਰਾਬ ਛੱਡਣ ਲਈ ਰੀਹੈਬ ਸੈਂਟਰ ਦਾਖਲ ਹੋ ਚੁੱਕੇ ਹਨ।
ਚਾਰ ਮਹੀਨੇ ਪੁਰਾਣੀ ਸਰਕਾਰ ਵਿੱਚ ਪਿਛਲੇ ਹਫਤੇ ਫੇਰਬਦਲ ਕਰਨ ਤੋਂ ਬਾਅਦ ਸੋਮਵਾਰ ਨੂੰ ਫੋਰਡ ਨੇ ਫੜ੍ਹ ਮਾਰਦਿਆਂ ਆਖਿਆ ਕਿ ਇਹ ਬਿਹਤਰੀਨ ਕੈਬਨਿਟ ਹੈ ਜਿਹੜਾ ਓਨਟਾਰੀਓ ਨੂੰ ਹੁਣ ਤੱਕ ਮਿਲਿਆ ਹੋਵੇਗਾ। ਫੋਰਡ ਨੇ ਆਖਿਆ ਕਿ ਆਪਣੇ ਮੰਤਰੀਆਂ ਤੇ ਆਪਣੀ ਟੀਮ ਉੱਤੇ ਉਨ੍ਹਾਂ ਨੂੰ 10,000 ਫੀ ਸਦੀ ਗੁਣਾਂ ਭਰੋਸਾ ਹੈ। ਦੂਜੇ ਪਾਸੇ ਲਿਬਰਲਾਂ ਦੇ ਅੰਤਰਿਮ ਆਗੂ ਜੌਹਨ ਫਰੇਜ਼ਰ ਦਾ ਕਹਿਣਾ ਹੈ ਕਿ ਪ੍ਰੀਮੀਅਰ ਨੇ ਵਿਲਸਨ ਦੇ ਇਸ ਤਰ੍ਹਾਂ ਅਚਾਨਕ ਜਾਣ ਬਾਰੇ ਸੱਚਾਈ ਨਾ ਦੱਸ ਕੇ ਮਾਮਲੇ ਨੂੰ ਹੋਰ ਗੁੰਝਲਦਾਰ ਬਣਾ ਦਿੱਤਾ ਹੈ ਤੇ ਇਸੇ ਲਈ ਅਸੀਂ ਅੱਜ ਵੀ ਇਸ ਮੁੱਦੇ ਉੱਤੇ ਗੱਲ ਕਰ ਰਹੇ ਹਾਂ।