ਓਟਵਾ, 4 ਜੂਨ (ਪੋਸਟ ਬਿਊਰੋ) : ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦਾ ਕਹਿਣਾ ਹੈ ਕਿ ਕੋਵਿਡ-19 ਵੈਕਸੀਨ ਦੁਨੀਆ ਭਰ ਵਿੱਚ ਸੇ਼ਅਰ ਕੀਤੀ ਜਾਣੀ ਚਾਹੀਦੀ ਹੈ ਤਾਂ ਕਿ ਇਸ ਵਾਇਰਸ ਦਾ ਸਫਾਇਆ ਕੀਤਾ ਜਾ ਸਕੇ।
ਇੱਕ ਹਫਤੇ ਦੇ ਅੰਦਰ ਆਪਣੀ ਤੀਜੀ ਕੌਮਾਂਤਰੀ ਸਿਖਰ ਵਾਰਤਾ ਵਿੱਚ ਹਿਸਾ ਲੈਂਦਿਆਂ ਟਰੂਡੋ ਨੇ ਅੱਜ ਇਹ ਸੁਨੇਹਾ ਦਿੱਤਾ। ਕੈਨੇਡਾ ਸੰਯੁਕਤ ਰਾਸ਼ਟਰ ਦੀ ਸੁਰੱਖਿਆ ਕਾਉਂਸਲ ਵਿੱਚ ਅਸਥਾਈ ਸੀਟ ਲਈ ਕੋਸਿ਼ਸ਼ ਕਰ ਰਿਹਾ ਹੈ। ਅੱਜ ਵਾਲੀ ਸਿਖਰ ਵਾਰਤਾ ਦੀ ਮੇਜ਼ਬਾਨੀ ਬ੍ਰਿਟੇਨ ਦੇ ਪ੍ਰਧਾਨ ਮੰਤਰੀ ਬੌਰਿਸ ਜੌਹਨਸਨ ਵੱਲੋਂ ਕੀਤੀ ਗਈ ਤੇ ਇਸ ਦਾ ਟੀਚਾ ਗਰੀਬ ਦੇਸ਼ਾਂ ਤੱਕ ਕੋਵਿਡ-19 ਦੀ ਵੈਕਸੀਨ ਯਕੀਨੀ ਬਣਾਉਣਾ ਸੀ।
ਟਰੂਡੋ ਨੇ ਆਖਿਆ ਕਿ ਗਲੋਬਲ ਭਾਈਚਾਰੇ ਨਾਤੇ ਸਾਨੂੰ ਰਲ ਕੇ ਕੰਮ ਕਰਨਾ ਹੋਵੇਗਾ ਤਾਂ ਕਿ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਦੁਨੀਆਂ ਭਰ ਦੇ ਸਾਰੇ ਲੋਕਾਂ ਦੀ ਵੈਕਸੀਨੇਸ਼ਨ ਤੱਕ ਪਹੁੰਚ ਹੋਵੇ। ਖਾਸ ਤੌਰ ਉੱਤੇ ਕਮਜ਼ੋਰ ਲੋਕਾਂ ਤੱਕ ਇਸ ਵੈਕਸੀਨ ਦੀ ਪਹੁੰਚ ਜ਼ਰੂਰ ਹੋਵੇ। ਉਨ੍ਹਾਂ ਆਖਿਆ ਕਿ ਸਾਡੇ ਲੋਕਾਂ ਦੀ ਸਿਹਤ ਹੋਰਨਾਂ ਸਾਰਿਆਂ ਦੀ ਸਿਹਤ ਉੱਤੇ ਨਿਰਭਰ ਕਰਦੀ ਹੈ।
ਇਸ ਸਿਖਰ ਵਾਰਤਾ ਵਿੱਚ 50 ਦੇਸ਼ਾਂ ਤੇ ਵੱਡੀਆਂ ਆਰਗੇਨਾਈਜ਼ੇਸ਼ਨ ਦੇ ਆਗੂਆਂ, ਜਿਨ੍ਹਾਂ ਵਿੱਚ ਬਿੱਲ ਤੇ ਮਲਿੰਡਾ ਗੇਟਸ ਵੀ ਸ਼ਾਮਲ ਸਨ, ਨੇ ਹਿੱਸਾ ਲਿਆ। ਇਸ ਕਾਨਫਰੰਸ ਰਾਹੀਂ 10 ਬਿਲੀਅਨ ਡਾਲਰ ਗੈਵੀ, ਜੋ ਕਿ ਵੈਕਸੀਨ ਅਲਾਇੰਸ ਹੈ, ਵਾਸਤੇ ਇੱਕਠੇ ਹੋਣ ਦੀ ਉਮੀਦ ਹੈ। ਇਹ ਏਜੰਸੀ ਘੱਟ ਵਿਕਸਤ ਦੇਸ਼ਾਂ ਤੱਕ ਵੈਕਸੀਨ ਪਹੁੰਚਾਉਂਦੀ ਹੈ।