ਮਿਨੀਆਪੋਲਿਸ, 4 ਜੂਨ (ਪੋਸਟ ਬਿਊਰੋ) : ਮਿਨੀਆਪੋਲਿਸ ਪੁਲਿਸ ਵੱਲੋਂ ਮਾਰੇ ਗਏ ਸਿਆਹ ਨਸਲ ਦੇ ਵਿਅਕਤੀ ਜਾਰਜ ਫਲੌਇਡ ਦੇ ਪੋਸਟ ਮਾਰਟਮ ਤੋਂ ਬਾਅਦ ਇਹ ਖੁਲਾਸਾ ਹੋਇਆ ਹੈ ਕਿ ਉਹ ਕਰੋਨਾਵਾਇਰਸ ਪਾਜ਼ੀਟਿਵ ਸੀ। ਇਹ ਵੀ ਪਤਾ ਲੱਗਿਆ ਹੈ ਕਿ ਫਲੌਇਡ ਦੇ ਪਹਿਲਾਂ ਹੋਏ ਕੋਵਿਡ-19 ਟੈਸਟ ਵਿੱਚ ਉਹ ਪਾਜ਼ੀਟਿਵ ਆਇਆ ਸੀ।
ਪਰਿਵਾਰ ਦੀ ਇਜਾਜ਼ਤ ਤੋਂ ਬਾਅਦ ਹੈਨੇਪਿਨ ਕਾਊਂਟੀ ਮੈਡੀਕਲ ਐਗਜ਼ਾਮੀਨਰ ਆਫਿਸ ਵੱਲੋਂ 20 ਸਫਿਆਂ ਦੀ ਜਾਰੀ ਕੀਤੀ ਗਈ ਰਿਪੋਰਟ ਅਤੇ ਕੌਰੋਨਰ ਆਫਿਸ ਵੱਲੋਂ ਜਾਰੀ ਸਮਰੀ ਵਿੱਚ ਸਪਸ਼ਟ ਕੀਤਾ ਗਿਆ ਹੈ ਕਿ ਜਦੋਂ ਪੁਲਿਸ ਅਧਿਕਾਰੀ ਵੱਲੋਂ ਫਲੌਇਡ ਨੂੰ ਗੋਡੇ ਥੱਲੇ ਦਬਾਅ ਕੇ ਰੱਖਿਆ ਗਿਆ ਸੀ ਤਾਂ ਉਸ ਨੂੰ ਹਾਰਟ ਅਟੈਕ ਵੀ ਆਇਆ ਸੀ। ਇਸ ਰਿਪੋਰਟ ਵਿੱਚ ਫਲੌਇਡ ਦੀ ਮੌਤ ਨੂੰ ਕਤਲ ਦੱਸਿਆ ਗਿਆ ਹੈ।
ਕੁੱਝ ਰਾਹਗੀਰਾਂ ਵੱਲੋਂ ਇਸ ਘਟਨਾ ਦੀ ਬਣਾਈ ਗਈ ਵੀਡੀਓ ਤੋਂ ਵੀ ਇਹ ਸਾਹਮਣੇ ਆਇਆ ਹੈ ਕਿ ਮਿਨੀਆਪੋਲਿਸ ਦੇ ਪੁਲਿਸ ਅਧਿਕਾਰੀ ਡੈਰੇਕ ਚੌਵਿਲ ਵੱਲੋਂ ਫਲੌਇਡ ਦੀ ਧੌਣ ਉੱਤੇ ਗੋਡਾ ਰੱਖ ਕੇ ਉਸ ਨੂੰ ਪੂਰੇ ਜ਼ੋਰ ਨਾਲ ਨੱਪਿਆ ਜਾ ਰਿਹਾ ਹੈ ਤੇ ਫਲੌਇਡ ਵੱਲੋਂ ਲਗਾਤਾਰ ਉਸ ਨੂੰ ਖੁਦ ਨੂੰ ਛੱਡਣ ਦੀ ਅਪੀਲ ਕੀਤੀ ਜਾ ਰਹੀ ਹੈ ਕਿਉਂਕਿ ਉਹ ਸਾਹ ਨਹੀਂ ਸੀ ਲੈ ਪਾ ਰਿਹਾ। ਲਗਾਤਾਰ ਫਲੌਇਡ ਵੱਲੋਂ ਅਫਸਰ ਨੂੰ ਉਸ ਨੂੰ ਛੱਡਣ ਲਈ ਆਖਿਆ ਜਾਂਦਾ ਰਿਹਾ ਪਰ ਪੁਲਿਸ ਅਧਿਕਾਰੀ ਨੇ ਉਸ ਦੀ ਇੱਕ ਨਾ ਸੁਣੀ ਤੇ ਆਖਿਰਕਾਰ ਫਲੌਇਡ ਦੇ ਸਾਹ ਸਤ ਮੁੱਕ ਗਏ ਤੇ ਉਸ ਨੇ ਹਿੱਲਣਾ ਵੀ ਬੰਦ ਕਰ ਦਿੱਤਾ। ਇਸ ਮਗਰੋਂ ਦੇਸ਼ ਭਰ ਵਿੱਚ ਅਜਿਹੇ ਮੁਜ਼ਾਹਰੇ ਭਖੇ ਜਿਹੜੇ ਅੱਜ ਵੀ ਜਾਰੀ ਹਨ ਤੇ ਇਨ੍ਹਾਂ ਵਿੱਚੋਂ ਕੱੁਝ ਹਿੰਸਕ ਵੀ ਸਨ।
ਚੀਫ ਮੈਡੀਕਲ ਐਗਜ਼ਾਮਿਨਰ ਐਂਡਰਿਊ ਬੇਕਰ ਦੀ ਰਿਪੋਰਟ ਵਿੱਚ ਆਖਿਆ ਗਿਆ ਹੈ ਕਿ 3 ਅਪਰੈਲ ਨੂੰ ਕੋਵਿਡ-19 ਬਾਰੇ ਫਲੌਇਡ ਦੇ ਹੋਏ ਟੈਸਟ ਵਿੱਚ ਉਹ ਪਾਜ਼ੀਟਿਵ ਆਇਆ ਸੀ ਪਰ ਬਾਅਦ ਵਿੱਚ ਏਸਿੰਪਟੋਮੈਟਿਕ ਹੋ ਗਿਆ। ਰਿਪੋਰਟ ਵਿੱਚ ਇਹ ਵੀ ਆਖਿਆ ਗਿਆ ਕਿ ਫਲੌਇਡ ਦੇ ਫੇਫੜੇ ਤਾਂ ਸਿਹਤਮੰਦ ਹੀ ਲੱਗਦੇ ਸਨ ਪਰ ਉਸ ਦੀਆਂ ਆਰਟਰੀਜ਼ ਤੰਗ ਸਨ।