ਟੋਰਾਂਟੋ, 4 ਜੂਨ (ਪੋਸਟ ਬਿਊਰੋ) : ਅੱਜ ਤੋਂ ਟੋਰਾਂਟੋ ਵਿੱਚ ਲਾਇਸੰਸਸ਼ੁਦਾ ਸਟਰੀਟ ਫੂਡ ਵੈਂਡਰਜ਼ ਤੇ ਆਈਸ ਕ੍ਰੀਮ ਟਰੱਕਸ ਨੂੰ ਆਪਰੇਟ ਕਰਨ ਦੀ ਇਜਾਜ਼ਤ ਮਿਲ ਜਾਵੇਗੀ। ਇਹ ਐਲਾਨ ਮੇਅਰ ਜੌਹਨ ਟੋਰੀ ਨੇ ਕੀਤਾ।
ਸਾਰੇ ਆਪਰੇਟਰਜ਼ ਨੂੰ ਫਿਜ਼ੀਕਲ ਡਿਸਟੈਂਸਿੰਗ ਵਾਲੇ ਨਿਯਮਾਂ ਦੀ ਪਾਲਣਾ ਕਰਨੀ ਹੋਵੇਗੀ ਤੇ ਆਪਣੇ ਸਟਾਫ ਨੂੰ ਬਿਲਕੁਲ ਸਹੀ ਹੈਲਥ ਤੇ ਸੇਫਟੀ ਗਾਈਡਲਾਈਨਜ਼ ਮੁਹੱਈਆ ਕਰਵਾਉਣੀਆਂ ਹੋਣਗੀਆਂ। ਟੋਰੀ ਨੇ ਇਹ ਵੀ ਆਖਿਆ ਕਿ ਅਗਲੇ ਕੁੱਝ ਦਿਨਾਂ ਵਿੱਚ ਹੀ ਅਸੀਂ ਇਹ ਜਾਣਕਾਰੀ ਵੀ ਦੇਵਾਂਗੇ ਕਿ ਜਦੋਂ ਰੈਸਟੋਰੈਂਟਸ ਨੂੰ ਮੁੜ ਖੋਲ੍ਹੇ ਜਾਣ ਦੀ ਇਜਾਜ਼ਤ ਦਿੱਤੀ ਜਾਵੇਗੀ ਤਾਂ ਉਹ ਕਿਸ ਤਰ੍ਹਾਂ ਆਪਣੇ ਕਸਟਮਰਜ਼ ਲਈ ਖੁੱਲ੍ਹੀ ਥਾਂ ਮੁਹੱਈਆ ਕਰਵਾ ਸਕਣਗੇ ਤਾਂ ਕਿ ਸੋਸ਼ਲ ਡਿਸਟੈਂਸਿੰਗ ਵਾਲੇ ਨਿਯਮ ਦੀ ਪਾਲਣਾ ਹੋ ਸਕੇ।
ਬੱੁਧਵਾਰ ਨੂੰ ਟੋਰਾਂਟੋ ਵਿੱਚ ਕਰੋਨਾਵਾਇਰਸ ਦੇ 139 ਹੋਰ ਮਾਮਲੇ ਸਾਹਮਣੇ ਆਏ। ਹੁਣ ਇੱਥੇ ਕੋਵਿਡ-19 ਮਾਮਲਿਆਂ ਦੀ ਗਿਣਤੀ 11,652 ਹੋ ਗਈ ਹੈ। ਦਸ ਹੋਰ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ ਤੇ ਇੱਥੇ ਮਰਨ ਵਾਲਿਆਂ ਦੀ ਕੁੱਲ ਗਿਣਤੀ 845 ਤੱਕ ਅੱਪੜ ਚੱੁਕੀ ਹੈ। 8948 ਲੋਕ ਸਿਹਤਯਾਬ ਹੋ ਚੁੱਕੇ ਹਨ।