ਵਾਸਿੰ਼ਗਟਨ, 3 ਜੂਨ (ਪੋਸਟ ਬਿਊਰੋ) : ਅਮਰੀਕਾ ਦੇ ਰੱਖਿਆ ਮੰਤਰੀ ਮਾਰਕ ਐਸਪਰ ਨੂੰ ਆਪਣੇ ਕਾਰਜਕਾਲ ਦੇ ਸਭ ਤੋਂ ਮੁਸ਼ਕਲ ਦੌਰ ਵਿੱਚੋਂ ਲੰਘਣਾ ਪੈ ਰਿਹਾ ਹੈ। ਉਨ੍ਹਾਂ ਨੂੰ ਮੁਜ਼ਾਹਰਾਕਾਰੀਆਂ ਨਾਲ ਭਰੀਆਂ ਸੜਕਾਂ ਨੂੰ ਫੌਜ ਵਾਸਤੇ ਜੰਗ ਦਾ ਮੈਦਾਨ ਦੱਸਣ ਤੇ ਫੌਜ ਨੂੰ ਸਿਆਸਤ ਤੋਂ ਦੂਰ ਰੱਖਣ ਵਿੱਚ ਨਾਕਾਮ ਰਹਿਣ ਲਈ ਆਲੋਚਨਾ ਦਾ ਸਿ਼ਕਾਰ ਹੋਣਾ ਪੈ ਰਿਹਾ ਹੈ।
ਇਸ ਦੇ ਨਾਲ ਹੀ ਐਸਪਰ ਨੂੰ ਅਜੇ ਰੱਖਿਆ ਮੰਤਰੀ ਬਣਿਆ ਗਿਆਰਾਂ ਮਹੀਨਿਆਂ ਦਾ ਹੀ ਸਮਾਂ ਹੋਇਆ ਹੈ ਤੇ ਹੁਣੇ ਹੀ ਜਾਰਜ ਫਲੌਇਡ ਦੇ ਕਤਲ ਤੋਂ ਬਾਅਦ ਅਮਰੀਕਾ ਦੇ ਰਾਸ਼ਟਰਪਤੀ ਡੌਨਲਡ ਟਰੰਪ ਨਾਲ ਉਨ੍ਹਾਂ ਦੇ ਸਬੰਧਾਂ ਲਈ ਪਰਖ ਦੀ ਘੜੀ ਆ ਗਈ ਹੈ। ਐਸਪਰ ਵੱਲੋਂ ਫੌਜ ਦੀ ਵਰਤੋਂ ਅਜਿਹੇ ਕੰਮ ਵਿੱਚ ਕਰਨ ਲਈ ਰਾਸ਼ਟਰਪਤੀ ਨੂੰ ਅਹਿਤਿਆਤ ਤੋਂ ਕੰਮ ਲੈਣ ਦੀ ਨਸੀਹਤ ਦਿੱਤੀ ਗਈ ਹੈ।
ਫੌਜ ਦੇ ਸਾਬਕਾ ਮੈਂਬਰ ਤੇ ਸਾਬਕਾ ਆਰਮੀ ਸੈਕਟਰੀ ਐਸਪਰ ਪਹਿਲਾਂ ਵੀ ਟਰੰਪ ਦੇ ਫੈਸਲਿਆਂ ਉੱਤੇ ਇਤਰਾਜ਼ ਪ੍ਰਗਟਾਅ ਚੁੱਕੇ ਹਨ ਜਿਵੇਂ ਕਿ ਜਦੋਂ ਟਰੰਪ ਨੇ ਪਿਛਲੇ ਸਾਲ ਫੌਜ ਦੇ ਨਿਆਂ ਸਿਸਟਮ ਵਿੱਚ ਦਖਲ ਦੇ ਕੇ ਵਾਰ ਕ੍ਰਾਈਮਜ਼ ਦੇ ਦੋਸ਼ੀ ਦੋ ਸੈਨਿਕਾਂ ਨੂੰ ਮੁਆਫੀ ਦੇ ਦਿੱਤੀ ਸੀ। ਪਰ ਉਹ ਰਾਸ਼ਟਰਪਤੀ ਦੀਆਂ ਕੌਮੀ ਸਕਿਊਰਿਟੀ ਨੀਤੀਆਂ ਦੇ ਕਾਇਲ ਹਨ।
ਬੱੁਧਵਾਰ ਨੂੰ ਐਸਪਰ ਨੇ ਟਰੰਪ ਵੱਲੋਂ ਦਿੱਤੀ ਧਮਕੀ, ਦੇਸ਼ ਭਰ ਵਿੱਚ ਜਾਰੀ ਮੁਜ਼ਾਹਰਿਆਂ ਨੂੰ ਖ਼ਤਮ ਕਰਨ ਲਈ ਫੌਜ ਦੀ ਵਰਤੋਂ ਕੀਤੀ ਜਾਵੇਗੀ, ਤੋਂ ਖੁਦ ਨੂੰ ਪਾਸੇ ਕਰ ਲਿਆ। ਐਸਪਰ ਨੇ ਪੱਤਰਕਾਰਾਂ ਨੂੰ ਆਖਿਆ ਕਿ ਦ ਇਨਸਰੈਕਸ਼ਨ ਐਕਟ ਉਦੋਂ ਹੀ ਲਿਆਂਦਾ ਜਾਣਾ ਚਾਹੀਦਾ ਹੈ ਜਦੋਂ ਕੋਈ ਐਮਰਜੰਸੀ ਹੋਵੇ ਜਾਂ ਹਾਲਾਤ ਕਾਬੂ ਤੋਂ ਬਾਹਰ ਹੋਣ। ਇਸ ਸਮੇਂ ਇਨ੍ਹਾਂ ਦੋਵਾਂ ਵਿੱਚੋਂ ਸਾਨੂੰ ਕਿਸੇ ਦਾ ਵੀ ਸਾਹਮਣਾ ਨਹੀਂ ਕਰਨਾ ਪੈ ਰਿਹਾ।