ਨਵੀਂ ਦਿੱਲੀ, 3 ਜੂਨ (ਪੋਸਟ ਬਿਊਰੋ)- ਭਾਰਤ ਦੀ ਸਭ ਤੋਂ ਵੱਡੀ ਜਹਾਜ਼ ਕੰਪਨੀ ਇੰਡੀਗੋ ਨੇ ਲਾਗਤ ਘੱਟ ਕਰਨ ਲਈ ਮੁਲਾਜ਼ਮਾਂ 'ਤੇ ਹੁੰਦੇ ਖ਼ਰਚ 'ਚ ਕਟੌਤੀ ਅਤੇ ਪੁਰਾਣੇ ਜਹਾਜ਼ ਵਾਪਸ ਕਰਨ ਦੀ ਯੋਜਨਾ ਬਣਾਈ ਹੈ।
ਇੰਡੀਗੋ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਰੋਨੋਜਾਏ ਦੱਤਾ ਨੇ ਦੱਸਿਆ ਕਿ ਏਅਰਲਾਈਨ ਏਅਰਬੱਸ ਦੇ ਪੁਰਾਣੇ ‘ਕਰੇਂਟ ਇੰਜਣ ਆਪਸ਼ਨ' (ਸੀ ਈ ਓ) ਜਹਾਜ਼ਾਂ ਨੂੰ ਵਾਪਸ ਕਰਕੇ ਉਨ੍ਹਾਂ ਦੀ ਜਗ੍ਹਾ ਨਵੇਂ ‘ਨਿਊ ਇੰਜਣ ਆਪਸ਼ਨ' (ਨਿਊ) ਜਹਾਜ਼ਾਂ ਨੂੰ ਆਪਣੇ ਬੇੜੇ 'ਚ ਸ਼ਾਮਲ ਕਰੇਗੀ। ਸੀ ਈ ਓ ਜਹਾਜ਼ਾਂ ਦੀ ਤੁਲਣਾ 'ਚ ਨਿਓ ਜਹਾਜ਼ਾਂ ਦੀ ਤੇਲ ਖ਼ਪਤ ਘੱਟ ਹੋਣ ਕਰਕੇ ਉਹ ਸਸਤੇ ਹਨ। ਇਨ੍ਹਾਂ ਦੀ ਸੰਭਾਲ ਦਾ ਖ਼ਰਚ ਵੀ ਘੱਟ ਹੈ। ਸਾਲ 2019-20 ਦੇ ਵਿੱਤੀ ਨਤੀਜਿਆਂ ਦੇ ਐਲਾਨ ਤੋਂ ਬਾਅਦ ਨਿਵੇਸ਼ਕਾਂ ਦੇ ਨਾਲ ਕਾਨਫਰੰਸ ਕਾਲ 'ਚ ਕੰਪਨੀ ਦੇ ਮੁੱਖ ਵਿੱਤੀ ਅਧਿਕਾਰੀ ਆਦਿਤਿਆ ਪਾਂਡੇ ਨੇ ਦੱਸਿਆ ਕਿ ਕੰਪਨੀ ਜਹਾਜ਼ਾਂ ਦੀ ਲੀਜ਼ ਰਾਸ਼ੀ ਦੇ ਨਾਲ ਹੋਰ ਸਥਿਰ ਲਾਗਤ ਘੱਟ ਕਰਨ ਦੀ ਯੋਜਨਾ ਬਣਾ ਰਹੀ ਹੈ। ਇਹ ਸਥਿਰ ਲਾਗਤ 40 ਫ਼ੀਸਦੀ ਘੱਟ ਕਰਨ ਦਾ ਟੀਚਾ ਰੱਖਿਆ ਗਿਆ ਹੈ। ਚਾਲੂ ਸਾਲ ਦੇ ਪਹਿਲੇ ਨੌ ਮਹੀਨਿਆਂ 'ਚ ਉਹ ਲਾਗਤ ਘੱਟ ਕਰ ਕੇ 3-4 ਹਜ਼ਾਰ ਕਰੋੜ ਰੁਪਏ ਦੀ ਵਾਧੂ ਨਕਦੀ ਜੋੜਨ ਦੀ ਯੋਜਨਾ ਬਣਾ ਰਹੇ ਹਨ। ਇਸ 'ਚ ਕਰਮਚਾਰੀਆਂ ਦੀ ਤਨਖ਼ਾਹ 'ਚ ਕਟੌਤੀ, ਲਾਭ ਅੰਸ਼ ਨਾ ਦੇਣਾ ਅਤੇ ਜਹਾਜ਼ਾਂ ਦੇ ਲੀਜ਼ ਅਤੇ ਸੰਭਾਲ 'ਤੇ ਹੋਣ ਵਾਲਾ ਖ਼ਰਚ ਸ਼ਾਮਲ ਹੈ। ਉਨ੍ਹਾਂ ਦੱਸਿਆ ਕਿ ਮੌਜੂਦਾ ਸਾਲ 'ਚ ਕਰਮਚਾਰੀਆਂ 'ਤੇ ਹੋਣ ਵਾਲੇ ਖ਼ਰਚ 'ਚ 25 ਫ਼ੀਸਦੀ ਦੀ ਕਟੌਤੀ ਕੀਤੀ ਜਾਵੇਗੀ।
ਇੱਕ ਸਵਾਲ ਦੇ ਜਵਾਬ 'ਚ ਪਾਂਡੇ ਨੇ ਕਿਹਾ ਕਿ ਅਗਲੇ ਦੋ ਸਾਲਾਂ 'ਚ 120 ਸੀ ਈ ਓ ਜਹਾਜ਼ਾਂ ਦੀ ਲੀਜ਼ ਖ਼ਤਮ ਹੋ ਰਿਹਾ ਹੈ, ਜਿਨ੍ਹਾਂ ਨੂੰ ਕੰਪਨੀ ਅੱਗੇ ਨਹੀਂ ਵਧਾਏਗੀ।