ਸ੍ਰੀ ਮਾਛੀਵਾੜਾ ਸਾਹਿਬ, 3 ਜੂਨ (ਪੋਸਟ ਬਿਊਰੋ)- ਕੋਰੋਨਾ ਵਾਇਰਸ ਦੌਰਾਨ ਲੱਗੇ ਲਾਕਡਾਊਨ ਕਾਰਨ ਹਾਲੇ ਤੱਕ ਕਈ ਲੋਕ ਦੂਜੇ ਰਾਜਾਂ 'ਚ ਫਸੇ ਹੋਏ ਹਨ। ਇਸ ਨਾਲ ਜਿੱਥੇ ਰਿਸ਼ਤਿਆਂ 'ਚ ਦੂਰੀਆਂ ਬਣੀਆਂ, ਉਥੇ ਮੁਸੀਬਤ ਦੀ ਘੜੀ ਵਿੱਚ ਕਈ ਲੋਕ ਮਸੀਹਾ ਬਣ ਕੇ ਵੀ ਸਾਹਮਣੇ ਆਏ ਹਨ।
ਲੁਧਿਆਣਾ ਜ਼ਿਲੇ ਦੇ ਮਾਛੀਵਾੜਾ ਇਲਾਕੇ ਵਿੱਚ ਵਿਆਹ ਦੀ ਇੱਕ ਅਜਿਹੀ ਭਾਈਚਾਰਕ ਸਾਂਝ ਦੇਖਣ ਨੂੰ ਮਿਲੀ, ਜਿੱਥੇ ਇੱਕ ਮੁਸਲਿਮ ਪਰਵਾਰ ਨੇ ਹਿੰਦੂ ਕੁੜੀ ਦਾ ਕੰਨਿਆ ਦਾਨ ਕੀਤਾ ਹੈ। ਏਥੋਂ ਨੇੜੇ ਪਿੰਡ ਭੱਟੀਆਂ ਵਿਖੇ ਹਿੰਦੂ ਲੜਕੀ ਪੂਜਾ ਦੇ ਮਾਤਾ-ਪਿਤਾ ਲਾਕਡਾਊਨ ਕਾਰਨ ਮੁਰਾਦਾਬਾਦ (ਯੂ ਪੀ) ਵਿੱਚ ਫਸੇ ਹੋਏ ਹਨ। ਉਹ ਇਥੇ ਆਪਣੇ ਪਿਤਾ ਦੇ ਇੱਕ ਕਰੀਬੀ ਮੁਸਲਿਮ ਪਰਵਾਰ ਨਾਲ ਰਹਿ ਰਹੀ ਸੀ। ਪੂਜਾ ਦੀ ਮੰਗਣੀ ਲਾਕਡਾਊਨ ਤੋਂ ਪਹਿਲਾਂ ਨੇੜਲੇ ਪਿੰਡ ਸਾਹਨੇਵਾਲ ਦੇ ਸੁਦੇਸ਼ ਕੁਮਾਰ ਸੋਨੂੰ ਨਾਲ ਤੈਅ ਹੋਈ ਸੀ। ਵਿਆਹ ਦੀ ਤਰੀਕ ਦੋ ਜੂਨ ਮਿਥੀ ਗਈ ਅਤੇ ਵੀ ਸ਼ੁਰੂ ਕਰ ਦਿੱਤੀ ਗਈ। ਪੂਜਾ ਦੇ ਮਾਪੇ ਉੱਤਰ ਪ੍ਰਦੇਸ਼ ਦੇ ਮੁਰਾਦਾਬਾਦ ਜ਼ਿਲੇ 'ਚ ਕਿਸੇ ਰਿਸ਼ਤੇਦਾਰ ਦੇ ਘਰ ਗਏ ਤੇ ਲਾਕਡਾਊਨ ਹੋਣ ਕਾਰਨ ਉਥੇ ਫਸ ਗਏ। ਪੂਜਾ ਅਤੇ ਉਸ ਦੇ ਪਿਤਾ ਵਰਿੰਦਰ ਸ਼ਰਮਾ ਤੇ ਮਾਤਾ ਅਦਮਾ ਪ੍ਰੇਸ਼ਾਨ ਹੋ ਗਏ। ਵਿਆਹ ਦੀ ਤਰੀਕ ਨੇੜੇ ਆਈ ਤਾਂ ਵਰਿੰਦਰ ਸ਼ਰਮਾ ਨੇ ਫੈਸਲਾ ਕੀਤਾ ਕਿ ਉਹ ਤਰੀਕ ਅੱਗੇ ਨਹੀਂ ਵਧਾਉਣਗੇ। ਉਨ੍ਹਾਂ ਨੇ ਆਪਣੇ ਦੋਸਤ ਸਾਜਿਦ ਨਾਲ ਗੱਲ ਕੀਤੀ ਤਾਂ ਸਾਜਿਦ ਨੇ ਕਿਹਾ ਕਿ ਫਿਕਰ ਨਾ ਕਰਨ, ਪੂਜਾ ਦੇ ਵਿਆਹ ਦੀਆਂ ਤਿਆਰੀਆਂ ਉਹ ਖੁਦ ਕਰਨਗੇ। ਵਿਆਹ ਦੀ ਤਰੀਕ ਦੋ ਜੂਨ ਆ ਗਈ। ਸਾਰੀਆਂ ਤਿਆਰੀਆਂ ਕਰਦੇ ਹੋਏ ਸਾਜਿਦ ਤੇ ਉਨ੍ਹਾਂ ਦੀ ਪਤਨੀ ਸੋਨੀਆ ਨੇ ਹਿੰਦੂ ਧਰਮ ਦੀਆਂ ਸਾਰੀਆਂ ਰਸਮਾਂ ਨਿਭਾਈਆਂ ਤੇ ਪੂਜਾ ਦਾ ਕੰਨਿਆ ਦਾਨ ਕਰਨ ਤੋਂ ਬਾਅਦ ਉਸ ਦੀ ਡੋਲੀ ਵਿਦਾ ਕੀਤੀ।
ਕੰਨਿਆ ਦਾਨ ਕਰ ਕੇ ਪਿਤਾ ਦਾ ਫਰਜ਼ ਨਿਭਾਉਣ ਵਾਲੇ ਸਾਜਿਦ ਨੇ ਕਿਹਾ ਕਿ ਪੂਜਾ ਉਸ ਨੂੰ ਮਾਮਾ ਮੰਨਦੀ ਹੈ। ਉਹ ਕੰਨਿਆ ਦਾਨ ਕਰ ਕੇ ਮਾਣ ਮਹਿਸੂਸ ਕਰ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਬੇਸ਼ੱਕ ਪੂਜਾ ਨਾਲ ਖੂਨ ਦਾ ਰਿਸ਼ਤਾ ਨਹੀਂ ਹੈ, ਪਰ ਇਨਸਾਨੀਅਤ ਦਾ ਧਰਮ ਸਭ ਤੋਂ ਉਪਰ ਹੈ। ਪੂਜਾ ਨੇ ਕਿਹਾ ਕਿ ਬੇਸ਼ੱਕ ਉਸ ਦੇ ਵਿਆਹ ਮੌਕੇ ਉਸ ਦੇ ਮਾਪੇ ਸ਼ਾਮਲ ਨਹੀਂ ਹੋ ਸਕੇ, ਪਰ ਉਸ ਦੇ ਮਾਮਾ ਸਾਜਿਦ ਤੇ ਮਾਮੀ ਸੋਨੀਆ ਨੇ ਕੰਨਿਆ ਦਾਨ ਕਰ ਕੇ ਉਨ੍ਹਾਂ ਦੀ ਕਮੀ ਮਹਿਸੂਸ ਨਹੀਂ ਹੋਣ ਦਿੱਤੀ। ਪਿੰਡ ਭੱਟੀਆਂ 'ਚ ਕੱਲ੍ਹ ਦੁਪਹਿਰ ਸਾਦੇ ਢੰਗ ਨਾਲ ਪੂਜਾ ਤੇ ਸੁਦੇਸ਼ ਦੇ ਵਿਆਹ ਦੀਆਂ ਰਸਮਾਂ ਹੋ ਗਈਆਂ। ਲੜਕੇ ਵਾਲਿਆਂ ਵੱਲੋਂ ਪਰਵਾਰ ਦੇ ਛੇ ਮੈਂਬਰ ਤੇ ਲੜਕੀ ਵਾਲਿਆਂ ਵੱਲੋਂ 10 ਮੈਂਬਰ ਵਿਆਹ 'ਚ ਸ਼ਾਮਲ ਹੋਏ ਸਨ।