ਚੰਡੀਗੜ੍ਹ, 3 ਜੂਨ (ਪੋਸਟ ਬਿਊਰੋ)- ਪੰਜਾਬ ਦੇ ਬਹੁਚਰਚਿਤ ਬੀਜ ਘੋਟਾਲੇ ਸਮੇਤ ਪਿਛਲੇ 13 ਸਾਲਾਂ ਵਿੱਚ ਹੋਏ ਖੇਤੀ ਨਾਲ ਸੰਬੰਧਤ ਘੋਟਾਲਿਆਂ ਬਾਰੇ ਆਮ ਆਦਮੀ ਪਾਰਟੀ ਨੇ ਹਾਈ ਕੋਰਟ ਦੀ ਨਿਗਰਾਨੀ ਵਿੱਚ ਜੁਡੀਸ਼ਲ ਕਮਿਸ਼ਨ ਵੱਲੋਂ ਸਮਾਂ ਬੱਧ ਜਾਂਚ ਕਰਵਾਏ ਜਾਣ ਦੀ ਮੰਗ ਪੇਸ਼ ਕਰ ਦਿੱਤੀ ਹੈ।
ਇਸ ਸੰਬੰਧ ਵਿੱਚ ਪੰਜਾਬ ਵਿਧਾਨ ਸਭਾ ਵਿੱਚ ਵਿਰੋਧੀ ਧਿਰ ਦੇ ਨੇਤਾ ਅਤੇ ਆਮ ਆਦਮੀ ਪਾਰਟੀ ਦੇ ਵਿਧਾਇਕ ਹਰਪਾਲ ਸਿੰਘ ਚੀਮਾ ਅਤੇ ਕਿਸਾਨ ਵਿੰਗ ਦੇ ਪ੍ਰਦੇਸ਼ ਪ੍ਰਧਾਨ ਵਿਧਾਇਕ ਕੁਲਤਾਰ ਸਿੰਘ ਸੰਧਵਾਂ ਨੇ ਕਿਹਾ ਹੈ ਕਿ ਸਾਬਕਾ ਅਕਾਲੀ ਮੰਤਰੀ ਬਿਕਰਮ ਸਿੰਘ ਮਜੀਠੀਆ ਵੱਲੋਂ ਬੀਜ ਘੋਟਾਲੇ ਵਿੱਚ ਪੰਜਾਬ ਦੇ ਕਿਸਾਨਾਂ ਨੂੰ 4,000 ਕਰੋੜ ਰੁਪਏ ਦੇ ਨੁਕਸਾਨ ਬਾਰੇ ਦਿੱਤੇ ਅੰਕੜੇ ਰੱਦ ਨਹੀਂ ਕੀਤੇ ਜਾ ਸਕਦੇ, ਪਰ ਮਜੀਠੀਆ 2007 ਤੋਂ 2017 ਤੱਕ ਅਕਾਲੀ-ਭਾਜਪਾ ਸਰਕਾਰ ਦੌਰਾਨ ਓਦੋਂ ਦੇ ਖੇਤੀ ਮੰਤਰੀ ਸੂਚਾ ਸਿੰਘ ਲੰਗਾਹ ਵੱਲੋਂ ਕੀਤੇ ਬੀਜ ਸਬਸਿਡੀ ਘੋਟਾਲੇ ਤੇ ਓਦੋਂ ਦੇ ਖੇਤੀ ਮੰਤਰੀ ਤੋਤਾ ਸਿੰਘ ਵੱਲੋਂ ਬਾਦਲ ਪਰਵਾਰ ਦੇ ਚਹੇਤੇ ਖੇਤੀਬਾੜੀ ਅਧਿਕਾਰੀ ਮੰਗਲ ਸਿੰਘ ਸੰਧੂ ਨਾਲ ਮਿਲ ਕੇ ਕੀਤੇ ਚਿੱਟੀ ਮਖੀ ਵਾਲੇ ਮਾਮਲੇ ਵਿੱਚ ਨਕਲੀ ਪੈਸਟੀਸਾਈਡ ਘੋਟਾਲੇ ਅਤੇ ਨਕਲੀ ਬੀ ਟੀ ਕਾਟਨ ਬੀਜ ਘੋਟਾਲੇ ਤੋਂ ਕਿਸਾਨਾਂ ਨੂੰ ਹੋਏ ਅਰਬਾਂ ਰੁਪਏ ਦੇ ਨੁਕਸਾਨ ਦੇ ਵੇਰਵੇ ਵੀ ਦੇ ਦੇਣ। ਉਨ੍ਹਾਂ ਕਿਹਾ ਕਿ ਮਜੀਠੀਆ ਮਾਲਵਾ ਪਟੀ ਦੇ ਉਨ੍ਹਾਂ ਕਿਸਾਨਾਂ ਦੀ ਗਿਣਤੀ ਵੀ ਦੱਸਣ, ਜਿਨ੍ਹਾਂ ਨੇ ਨਕਲੀ ਪੈਸਟੀਸਾਈਡ ਕਾਰਨ ਚਿੱੱਟੀ ਮਖੀ ਦਾ ਸ਼ਿਕਾਰ ਹੋਏ ਨਰਮੇ ਦੇ ਨੁਕਸਾਨ ਨੂੰ ਨਾ ਸਹਿਦੇ ਹੋਏ ਅੱਕ ਕੇ ਖੁਦਕੁਸ਼ੀਆਂ ਕਰ ਲਈਆਂ ਸਨ।