ਤਰਨ ਤਾਰਨ, 3 ਜੂਨ (ਪੋਸਟ ਬਿਊਰੋ)- ਜ਼ਮੀਨੀ ਝਗੜਿਆਂ ਵਿੱਚ ਰਿਸ਼ਤੇਦਾਰਾਂ ਅਤੇ ਸਕੇ ਭਰਾਵਾਂ ਦੇ ਕਤਲ ਅੱਜਕੱਲ੍ਹ ਆਮ ਹੋਣ ਲੱਗ ਪਏ ਹਨ। ਤਰਨ ਤਾਰਨ ਨੇੜਲੇ ਪਿੰਡ ਕੋਟ ਧਰਮਚੰਦ ਕਲਾਂ ਵਿੱਚ ਰੁੱਖ ਵੱਢਣ ਦੇ ਝਗੜੇ ਤੋਂ ਦੋ ਭਰਾਵਾਂ ਨੰੁ ਛੋਟੇ ਭਰਾ ਨੇ ਹੀ ਗੋਲੀਆਂ ਮਾਰ ਕੇ ਮਾਰ ਦਿੱਤਾ ਹੈ। ਪੁਲਸ ਨੇ ਇਸ ਬਾਰੇ ਮ੍ਰਿਤਕ ਦੇ ਛੋਟੇ ਭਰਾ, ਉਸ ਦੀ ਪਤਨੀ ਸਣੇ ਕੁੱਲ ਛੇ ਜਣਿਆਂ 'ਤੇ ਕੇਸ ਦਰਜ ਕਰ ਕੇ ਉਨ੍ਹਾਂ ਦੀ ਗ੍ਰਿਫਤਾਰੀ ਲਈ ਛਾਪੇਮਾਰੀ ਸ਼ੁਰੂ ਕਰ ਦਿੱਤੀ ਹੈ।
ਡੀ ਐੱਸ ਪੀ ਸਿਟੀ ਸੁੱਚਾ ਸਿੰਘ ਬਲ ਦਾ ਕਹਿਣਾ ਹੈ ਕਿ ਜਲਦੀ ਹੀ ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰ ਲਿਆ ਜਾਏਗਾ। ਉਨ੍ਹਾ ਦੱਸਿਆ ਕਿ ਦਿਲਬਾਗ ਸਿੰਘ (48), ਲਾਲ ਸਿੰਘ (46) ਅਤੇ ਮਨਜਿੰਦਰ ਸਿੰਘ ਤਿੰਨੇ ਪੁੱਤਰ ਬਹਾਲ ਸਿੰਘ ਵਾਸੀ ਕੋਟ ਧਰਮਚੰਦ ਕਲਾਂ ਸਕੇ ਭਰਾ ਸਨ। ਇਨ੍ਹਾਂ ਦਾ ਆਪੋ ਵਿੱਚ ਪਹਿਲਾਂ ਵੀ ਜ਼ਮੀਨੀ ਝਗੜਾ ਚੱਲਦਾ ਸੀ। ਦਿਲਬਾਗ ਸਿੰਘ ਅਤੇ ਲਾਲ ਸਿੰਘ ਇਕੱਠੇ ਰਹਿੰਦੇ ਸਨ ਅਤੇ ਮਨਜਿੰਦਰ ਸਿੰਘ ਵੱਖ ਰਹਿੰਦਾ ਹੈ। ਇਨ੍ਹਾਂ ਦੇ ਖੇਤਾਂ ਵਿਚਾਲੇ ਸਰਕਾਰੀ ਜ਼ਮੀਨ ਵੀ ਹੈ ਜਿਸ 'ਤੇ ਮਨਜਿੰਦਰ ਸਿੰਘ ਅਤੇ ਦਿਲਬਾਗ ਸਿੰਘ ਆਪੋ-ਆਪਣਾ ਹੱਕ ਜਤਾਉਂਦੇ ਸਨ। ਕੱਲ੍ਹ ਸਵੇਰੇ ਜਦ ਦਿਲਬਾਗ ਸਿੰਘ ਅਤੇ ਉਸ ਦਾ ਭਰਾ ਲਾਲ ਸਿੰਘ ਆਪਣੇ ਖੇਤਾਂ ਵਿੱਚ ਰੁੱਖ ਵੱਢ ਰਹੇ ਸਨ ਤਾਂ ਮਨਜਿੰਦਰ ਸਿੰਘ ਉਥੇ ਆ ਕੇ ਕਹਿਣ ਲੱਗਾ ਕਿ ਇਹ ਰੁੱਖ ਉਸ ਦੀ ਹੱਦ ਵਿੱਚ ਪੈਂਦਾ ਹੈ ਜਿਸ ਤੋਂ ਉਨ੍ਹਾਂ ਦਾ ਝਗੜਾ ਹੋ ਗਿਆ। ਇਸੇ ਦੌਰਾਨ ਮਨਜਿੰਦਰ ਸਿੰਘ ਨੇ ਘਰੋਂ ਪਿਸਤੌਲ ਲਿਆ ਕੇ ਦਿਲਬਾਗ ਸਿੰਘ ਅਤੇ ਲਾਲ ਸਿੰਘ 'ਤੇ ਗੋਲੀਆਂ ਚਲਾ ਦਿੱਤੀਆਂ। ਦੋਵਾਂ ਨੂੰ ਜਦ ਹਸਪਤਾਲ ਲਿਜਾਇਆ ਜਾ ਰਿਹਾ ਸੀ ਤਾਂ ਦਿਲਬਾਗ ਸਿੰਘ ਦੀ ਰਸਤੇ ਵਿੱਚ ਅਤੇ ਲਾਲ ਸਿੰਘ ਦੀ ਹਸਪਤਾਲ ਵਿੱਚ ਮੌਤ ਹੋ ਗਈ।