* ਮੁੱਖ ਮਕਬਰੇ ਦੀ ਰੇਲਿੰਗ ਟੁੱਟੀ, ਦਰੱਖਤ ਉਖੜੇ
ਆਗਰਾ, 31 ਮਈ (ਪੋਸਟ ਬਿਊਰੋ)- ਆਗਰਾ 'ਚ ਕੱਲ੍ਹ ਰਾਤ ਤੂਫਾਨ ਕਰ ਕੇ ਵਿਸ਼ਵ ਪ੍ਰਸਿੱਧ ਤਾਜ ਮਹਿਲ ਦੀ ਇਮਾਰਤ ਨੂੰ ਕਾਫੀ ਨੁਕਸਾਨ ਹੋਇਆ। ਇਸ ਦੌਰਾਨ ਤਾਜ ਮਹਿਲ ਦੇ ਮੁੱਖ ਮਕਬਰੇ ਦੀ ਸੰਗਮਰਮਰ ਦੀ ਰੇਲਿੰਗ ਟੁੱਟ ਗਈ ਅਤੇ ਉਸ ਦੀਆਂ ਜਾਅਲੀਆ ਵੀ ਡਿੱਗ ਪਈਆਂ।
ਭਾਰਤੀ ਪੁਰਾਤੱਤਵ ਵਿਭਾਗ ਦੇ ਡਾਕਟਰ ਬਸੰਤ ਸਵਰਨਕਾਰ ਨੇ ਦੱਸਿਆ ਕਿ ਤਾਜ ਮਹਿਲ ਦਾ ਇੱਕ ਦਰਵਾਜ਼ਾ ਉਖੜ ਗਿਆ ਹੈ। ਉਨ੍ਹਾਂ ਕਿਹਾ, ਇਸ ਤੋਂ ਬਿਨਾ ਤਾਜ ਮਹਿਲ 'ਚ ਟੂਰਿਸਟਾਂ ਦੀ ਸਹੂਲਤ ਲਈ ਬਣਾਈ ਸ਼ੈੱਡ ਦੀ ਫਾਲਸ ਸੀਲਿੰਗ ਉਖੜ ਗਈ ਹੈ। ਤਾਜ ਮਹਿਲ ਤੋਂ ਇਲਾਵਾ ਮਹਿਤਾਬ ਬਾਗ ਦੀ ਕੰਧ ਦਾ ਦਰੱਖਤ ਡਿੱਗ ਗਿਆ ਅਤੇ ਮਰੀਅਮ ਦੇ ਮਕਬਰੇ 'ਚ ਵੀ ਦਰੱਖਤ ਡਿੱਗਾ ਹੈ। ਅਧਿਕਾਰੀਆਂ ਨੇ ਕਿਹਾ ਕਿ ਤੇਜ਼ ਹਨੇਰੀ ਕਰ ਕੇ ਆਗਰਾ 'ਚ ਤਿੰਨ ਜਣਿਆਂ ਦੀ ਮੌਤ ਹੋ ਗਈ ਤੇ ਕਈ ਜ਼ਖਮੀ ਹੋਏ ਹਨ। ਕਈ ਥਾਵਾਂ 'ਤੇ ਮਕਾਨ ਤੇ ਰੁੱਖ ਡਿੱਗਣ ਦੀ ਵੀ ਸੂਚਨਾ ਹੈ। ਤਾਲਾਬੰਦੀ ਕਰ ਕੇ ਤਾਜ ਮਹਿਲ ਪਿਛਲੇ 68 ਦਿਨਾਂ ਤੋਂ ਬੰਦ ਹੈ। ਪਹਿਲੀ ਵਾਰ ਤਾਜ ਮਹਿਲ ਨੂੰ ਏਨੇ ਦਿਨਾਂ ਲਈ ਬੰਦ ਰੱਖਿਆ ਗਿਆ ਹੈ।