ਐਡੀਲੇਡ, 12 ਨਵੰਬਰ (ਪੋਸਟ ਬਿਊਰੋ)- ਦੱਖਣੀ ਆਸਟਰੇਲੀਆ 'ਚ 9 ਨਵੰਬਰ ਨੂੰ ਕੌਂਸਲਰਾਂ ਅਤੇ ਮੇਅਰਾਂ ਲਈ ਹੋਈ ਵੋਟਿੰਗ ਦੇ ਨਤੀਜੇ 'ਚ ਪੰਜਾਬੀ ਭਾਈਚਾਰੇ ਦੇ ਸੰਨੀ ਸਿੰਘ ਪੋਰਟ ਅਗਸਤਾ, ਸਿਮਰਤਪਾਲ ਸਿੰਘ ਮੱਲ੍ਹੀ (ਸਿਮ) ਰੈਨਮਾਰਕ ਅਤੇ ਐਡੀਲੇਡ ਤੋਂ ਹਰਿਆਣਾ ਦੇ ਸੁਰਿੰਦਰ ਚਾਹਲ ਵੱਲੋਂ ਪਲਿਮਟਨ ਤੋਂ ਕੌਂਸਲ ਚੋਣਾਂ ਲਈ ਪਹਿਲੀ ਵਾਰ ਜਿੱਤਣ ਕਰਕੇ ਰਾਜਨੀਤਕ ਖੇਤਰ 'ਚ ਦਾਖਲ ਹੋਣ 'ਤੇ ਪੰਜਾਬੀ ਭਾਈਚਾਰੇ 'ਚ ਖੁਸ਼ੀ ਦੀ ਲਹਿਰ ਹੈ। ਨੌਜਵਾਨਾਂ ਨੇ ਭਾਰਤੀ-ਪੰਜਾਬੀਆਂ ਲਈ ਰਾਜਨੀਤਕ ਖੇਤਰ 'ਚ ਦਰਵਾਜ਼ਾ ਖੋਲ੍ਹ ਕੇ ਮੱਲਾਂ ਮਾਰਨ ਲਈ ਸੁਨੇਹਾ ਦਿੱਤਾ ਹੈ। ਭਾਰਤੀ-ਪੰਜਾਬੀਆਂ ਦੀ ਵਧ ਰਹੀ ਗਿਣਤੀ ਕਰਕੇ ਰਾਜਨੀਤਕ ਖੇਤਰ 'ਚ ਅੱਗੇ ਵਧਣ ਲਈ ਭਵਿੱਖ 'ਚ ਹੋਰ ਵੀ ਨਿੱਤਰ ਕੇ ਸ਼ਿਰਕਤ ਕਰਨਗੇ।
ਵਰਨਣ ਯੋਗ ਹੈ ਕਿ ਇਨ੍ਹਾਂ ਚੋਣਾਂ 'ਚ ਉਮੀਦਵਾਰ ਆਜ਼ਾਦ ਤੌਰ 'ਤੇ ਚੋਣ ਲੜਦੇ ਹਨ ਤੇ ਕੋਈ ਪੋਲੀਟਿਕਲ ਪਾਰਟੀ ਸਿੱਧੇ ਤੌਰ 'ਤੇ ਇਨ੍ਹਾਂ ਦੀ ਮਦਦ ਨਹੀਂ ਕਰਦੀ। ਸੰਨੀ ਸਿੰਘ ਦੀ ਚੋਣ 'ਚ ਗੋਰੇ ਵੱਲੋਂ ਕੀਤੀ ਨਸਲੀ ਟਿੱਪਣੀ 'ਤੇ ਉਨ੍ਹਾਂ ਨੇ ਸ਼ਾਂਤਮਈ ਢੰਗ ਨਾਲ ਚੋਣ ਲੜੀ ਹੈ, ਸਭ ਕਮਿਊਨਿਟੀਜ਼ ਵੱਲੋਂ ਉਨ੍ਹਾਂ ਦੀ ਸ਼ਲਾਘਾ ਤੇ ਵੱਡੀ ਗਿਣਤੀ 'ਚ ਸਹਿਯੋਗ ਮਿਲਿਆ, ਜਿਸ ਕਰਕੇ ਸੰਨੀ ਸਿੰਘ ਨੇ ਵੱਡੀ ਗਿਣਤੀ 'ਚ ਵੋਟਾਂ ਲੈ ਕੇ ਜਿੱਤ ਦਰਜ ਕੀਤੀ। ਸੰਨੀ ਸਿੰਘ ਦਾ ਨਾਂਅ ਡਿਪਟੀ ਮੇਅਰ ਲਈ ਵੀ ਆ ਰਿਹਾ ਹੈ। ਇਨ੍ਹਾਂ ਸਭ ਉਮੀਦਵਾਰਾਂ ਦੀ ਮਾਣਮੱਤੀ ਪ੍ਰਾਪਤੀ ਭਾਰਤੀ-ਪੰਜਾਬੀ ਭਾਈਚਾਰੇ ਲਈ ਮਾਣ ਵਾਲੀ ਗੱਲ ਹੈ। ਐਡੀਲੇਡ ਸ਼ਹਿਰ 'ਚ ਗਿਣਤੀ ਡਾਕ ਰਾਹੀਂ ਆਈਆਂ ਵੋਟਾਂ ਦੀ ਜਾਰੀ ਹੈ, ਜਿਸ ਦੇ ਨਤੀਜੇ ਕੱਲ੍ਹ ਤੱਕ ਸਭ ਐਲਾਨੇ ਜਾਣਗੇ।