ਸਾਓ ਪਾਓਲੋ (ਬਰਾਜ਼ੀਲ), 12 ਨਵੰਬਰ (ਪੋਸਟ ਬਿਊਰੋ)- ਬਰਾਜ਼ੀਲ ਦੇ ਸੂਬੇ ਰੀਓ ਡੀ ਜਿਨੇਰਿਓ 'ਚ ਬੀਤੇ ਦਿਨ ਜ਼ਮੀਨ ਖਿਸਕਣ ਨਾਲ ਘੱਟੋ-ਘੱਟ 10 ਲੋਕਾਂ ਦੀ ਮੌਤ ਹੋ ਗਈ ਅਤੇ 11 ਹੋਰ ਜ਼ਖਮੀ ਹੋ ਗਏ।
ਮਿਲੀ ਜਾਣਕਾਰੀ ਅਨੁਸਾਰ ਰੀਓ ਦੇ ਆਫਤ ਪ੍ਰਬੰਧ ਕਰਮੀਆਂ ਨੇ ਕਿਹਾ ਕਿ ਨੀਤੇਰੋਈ ਦੇ ਮੋਰੋ ਡੋ ਬੋਆ ਸਪੇਰੈਂਸਾ ਇਲਾਕੇ ਵਿੱਚ 11 ਲੋਕਾਂ ਨੂੰ ਸੁਰੱਖਿਅਤ ਕੱਢ ਲਿਆ ਹੈ ਅਤੇ ਅਜੇ ਚਾਰ ਹੋਰ ਲੋਕ ਲਾਪਤਾ ਦੱਸੇ ਗਏ ਹਨ। ਗਲੋਬੋ ਨਿਊਜ਼ ਨਾਲ ਮੁਲਾਕਾਤ ਦੌਰਾਨ ਰੀਓ ਅੱਗ ਬੁਝਾਊ ਅਮਲੇ ਦੇ ਵਿਭਾਗ ਕਮਾਂਡਰ ਰਾਬਰਟੋ ਰੋਬਾਡੋ ਨੇ ਕਿਹਾ ਕਿ ਇਕ ਨਵ ਜਨਮੇ, ਦੋ ਬੱਚਿਆਂ ਅਤੇ ਇਕ 33 ਸਾਲਾ ਵਿਅਕਤੀ ਨੂੰ ਬਚਾਇਆ ਗਿਆ ਹੈ। ਇਨ੍ਹਾਂ ਲੋਕਾਂ ਨੂੰ ਕਈ ਸੱਟਾਂ ਲੱਗੀਆਂ ਹਨ, ਜਿਸ ਕਰਕੇ ਇਨ੍ਹਾਂ ਨੂੰ ਸਥਾਨਕ ਹਸਪਤਾਲ 'ਚ ਭਰਤੀ ਕਰਾਇਆ ਗਿਆ। ਮ੍ਰਿਤਕਾਂ 'ਚ ਇਕ ਲੜਕਾ, ਦੋ ਬਜ਼ੁਰਗ ਮਹਿਲਾਵਾਂ, 37 ਸਾਲ ਦਾ ਇਕ ਵਿਅਕਤੀ, ਇਕ ਮਹਿਲਾ ਤੇ 10 ਮਹੀਨੇ ਦਾ ਇਕ ਬੱਚਾ ਸ਼ਾਮਲ ਹੈ। ਰੋਬਾਡੋ ਨੇ ਕਿਹਾ ਕਿ ਸਿਵਲ ਰੱਖਿਆ ਕਰਮੀ ਅਤੇ ਰਾਹਤ ਕਰਮੀਆਂ ਸਮੇਤ ਕਰੀਬ 200 ਰਾਹਤ ਕਰਮੀ ਇਲਾਕੇ 'ਚ ਬਚਾਅ ਕਾਰਜ ਚਲਾ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਰਾਹਤ ਕਾਰਜ ਅਜੇ 48 ਘੰਟੇ ਹੋਰ ਚੱਲਣਗੇ।