ਪੈਰਿਸ, 12 ਨਵੰਬਰ (ਪੋਸਟ ਬਿਊਰੋ) : ਪਹਿਲੀ ਵਿਸ਼ਵ ਜੰਗ ਖਤਮ ਹੋਣ ਦੇ ਪੈਰਿਸ ਵਿੱਚ ਆਯੋਜਿਤ 100 ਸਾਲਾ ਯਾਦਗਾਰੀ ਸਮਾਰੋਹ ਵਿੱਚ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਤੇ ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਐਤਵਾਰ ਨੂੰ ਇੱਕਠੇ ਬੈਠੇ।
ਪ੍ਰਧਾਨ ਮੰਤਰੀ ਦੇ ਆਫਿਸ ਦਾ ਕਹਿਣਾ ਹੈ ਕਿ ਟਰੂਡੋ ਨੇ ਪੁਤਿਨ ਨਾਲ ਗੱਲ ਕੀਤੀ ਤੇ ਪੁਤਿਨ ਨੇ ਰੂਸ ਦੇ ਲੋਕਾਂ ਵੱਲੋਂ ਦੋਵਾਂ ਵਿਸ਼ਵ ਜੰਗਾਂ ਵਿੱਚ ਨਿਭਾਈ ਗਈ ਭੂਮਿਕਾ ਤੇ ਦਿੱਤੇ ਗਏ ਬਲੀਦਾਨਾਂ ਦਾ ਜਿ਼ਕਰ ਕੀਤਾ। ਉਨ੍ਹਾਂ ਆਖਿਆ ਕਿ ਇਸੇ ਲਈ ਹੀ ਰੂਸ ਇੱਥੇ ਸ਼ਾਂਤੀ ਦੀ ਗੱਲ ਕਰਨ ਲਈ ਪਹੁੰਚਿਆ ਹੈ। ਟਰੂਡੋ ਲਈ ਸਥਿਤੀ ਕਾਫੀ ਅਜੀਬ ਹੋ ਗਈ ਕਿਉਂਕਿ ਇਸ ਤੋਂ ਪਹਿਲਾਂ ਉਹ ਪੁਤਿਨ ਦੀਆਂ ਕਾਰਵਾਈਆਂ ਦੀ ਨਿਖੇਧੀ ਕਰਦੇ ਰਹੇ ਹਨ। ਕ੍ਰਿਮੀਆ ਨੂੰ ਧੱਕੇ ਨਾਲ ਆਪਣੇ ਕਬਜੇ ਵਿੱਚ ਲੈਣ, ਯੂਕਰੇਨ ਵਿੱਚ ਬਾਗੀ ਸੈਨਾਵਾਂ ਨੂੰ ਮਾਲੀ ਮਦਦ ਦੇਣ ਤੇ ਸੀਰੀਆ ਦੇ ਹਾਕਮ ਬਸ਼ਰ ਅਲ ਅਸਦ ਦਾ ਸਮਰਥਨ ਕੀਤੇ ਜਾਣ ਤੋਂ ਯੂਨਾਇਟਿਡ ਕਿੰਗਡਮ ਵਿੱਚ ਰੂਸ ਵੱਲੋਂ ਜ਼ਹਿਰ ਦੇਣ ਵਰਗੀਆਂ ਕੀਤੀਆਂ ਹਰਕਤਾਂ ਦੀ ਖੁੱਲ੍ਹੇਆਮ ਨਿਖੇਧੀ ਕੀਤੀ ਜਾਂਦੀ ਰਹੀ ਹੈ।
ਇਸ ਤੋਂ ਪਹਿਲਾਂ ਟਰੂਡੋ ਇਹ ਸੱ਼ਕ ਵੀ ਪ੍ਰਗਟਾਅ ਚੁੱਕੇ ਹਨ ਕਿ ਕੈਨੇਡੀਅਨ ਨਾਗਰਿਕ ਪਯੋਤਰ ਵਰਜੀਲੋਵ ਨੂੰ ਵੀ ਮਾਸਕੋ ਵਿੱਚ ਜ਼ਹਿਰ ਦੇ ਕੇ ਮਾਰਿਆ ਗਿਆ ਹੋ ਸਕਦਾ ਹੈ। ਇਹ ਵੀ ਦੱਸਣਾ ਬਣਦਾ ਹੈ ਕਿ ਅਮਰੀਕਾ ਦੇ ਰਾਸ਼ਟਰਪਤੀ ਡੌਨਲਡ ਟਰੰਪ ਨਾਲੋਂ ਵੀ ਟਰੂਡੋ ਦਾ ਨਜ਼ਰੀਆ ਵੱਖਰਾ ਹੈ। ਪੈਰਿਸ ਵਿੱਚ ਹੀ ਪੁਤਿਨ ਨੇ ਟਰੰਪ ਦੇ ਪਹੁੰਚਣ ਉੱਤੇ ਉਨ੍ਹਾਂ ਦਾ ਗਰਮਜੋਸ਼ੀ ਨਾਲ ਸਵਾਗਤ ਕੀਤਾ ਸੀ। ਪੁਤਿਨ ਵਾਂਗ ਹੀ ਟਰੰਪ ਵੀ ਖੁਦ ਨੂੰ ਰਾਸ਼ਟਰਵਾਦੀ ਆਗੂ ਦੱਸਦਾ ਹੈ। ਪਰ ਸ਼ਾਂਤੀ ਫੋਰਮ ਉੱਤੇ ਟਰੂਡੋ ਫਰਾਂਸ ਦੇ ਰਾਸ਼ਟਰਪਤੀ ਇਮੈਨੂਅਲ ਮੈਕਰੌਨ ਤੇ ਜਰਮਨੀ ਦੀ ਚਾਂਸਲਰ ਐਂਜੇਲਾ ਮਾਰਕਲ ਦੇ ਨਾਲ ਰਾਸ਼ਟਰਵਾਦ ਖਿਲਾਫ ਬਿਆਨ ਦੇ ਚੁੱਕੇ ਹਨ।