ਕੈਨਬਰਾ, 27 ਮਈ (ਪੋਸਟ ਬਿਊਰੋ)- ਅਮਰੀਕਾ ਦੀ ਇੱਕ ਬਾਉਟੈਕਨੋਲਾਜੀ ਕੰਪਨੀ ਨੋਵਾਵੈਕਸ ਨੇ ਕੋਰੋਨਾ ਵਾਇਰਸ ਦੀ ਵੈਕਸੀਨ ਬਣਾਉਣ ਦਾ ਦਾਅਵਾ ਕੀਤਾ ਹੈ। ਇਸ ਕੰਪਨੀ ਨੇ ਆਸਟਰੇਲੀਆ ਵਿੱਚ ਕੋਰੋਨਾ ਇਨਫੈਕਸ਼ਨ ਦੇ ਟੀਕੇ ਦਾ ਮਨੁੱਖਾਂ 'ਤੇ ਤਜਰਬਾ ਸ਼ੁਰੂ ਕਰਨ ਦਾ ਐਲਾਨ ਕੀਤਾ ਹੈ।
ਸੰਬੰਧਤ ਕੰਪਨੀ ਦਾ ਕਹਿਣਾ ਹੈ ਕਿ ਇਸ ਸਾਲ ਕੋਰੋਨਾ ਦਾ ਟੀਕਾ ਆਉਣ ਦੀ ਉਮੀਦ ਹੈ। ਕੰਪਨੀ ਦੇ ਪ੍ਰਮੁੱਖ ਖੋਜ ਕਰਤਾ ਡਾ. ਗਰੀਗੋਰੀ ਗਲੇਨ ਨੇ ਦੱਸਿਆ ਕਿ ਕੰਪਨੀ ਨੇ ਪਹਿਲੇ ਪੜਾਅ ਦਾ ਟੈੱਸਟ ਸ਼ੁਰੂ ਕਰ ਦਿੱਤਾ ਹੈ। ਪਹਿਲੇ ਪੜਾਅ ਦੇ ਤਹਿਤ ਮੈਲਬਰਨ ਅਤੇ ਬ੍ਰਿਸਬੇਨ ਦੇ 131 ਵਾਲੰਟੀਅਰਸ 'ਤੇ ਇਸ ਦਾ ਤਜਰਬਾ ਕੀਤਾ ਜਾਵੇਗਾ।
ਕੰਪਨੀ ਦੇ ਮੈਰੀਲੈਂਡ ਵਿਚਲੇ ਹੈਡਕੁਆਰਟਰ ਤੋਂ ਆਨਲਾਈਨ ਪ੍ਰੈਸ ਕਾਨਫਰੰਸ ਵਿੱਚ ਗਲੇਨ ਨੇ ਕਿਹਾ, ‘‘ਅਸੀਂ ਟੈੱਸ ਦੇ ਨਾਲ ਦਵਾਈ ਅਤੇ ਟੀਕਾ ਵੀ ਬਣਾ ਰਹੇ ਹਾਂ, ਜਿਸ ਨਾਲ ਅਸੀਂ ਲੋਕਾਂ ਨੂੰ ਇਹ ਵਿਸ਼ਵਾਸ ਦਿਵਾ ਸਕਾਂਗੇ ਕਿ ਇਹ ਕਾਰਗਰ ਹੈ ਅਤੇ ਸਾਲ ਦੇ ਅੰਤ ਤੱਕ ਇਸ ਨੂੰ ਉਪਲਬਧ ਕਰਵਾ ਸਕਾਂਗੇ।''
ਵਰਨਣ ਯੋਗ ਹੈ ਕਿ ਚੀਨ, ਅਮਰੀਕਾ ਅਤੇ ਯੁੂਰਪ ਵਿੱਚ ਕਰੀਬ ਦਰਜਨ ਭਰ ਦਵਾਈਆਂ ਦਾ ਟੈੱਸਟ ਮੁਢਲੇ ਦੌਰ ਵਿੱਚ ਹੈ ਅਤੇ ਉਨ੍ਹਾਂ ਦਾ ਮਨੁੱਖਾਂ ਉੱਤੇ ਟੈੱਸਟ ਸ਼ੁਰੂ ਹੋਣ ਵਾਲਾ ਹੈ। ਅਜੇ ਤੱਕ ਇਹ ਸਪੱਸ਼ਟ ਨਹੀਂ ਕਿ ਉਨ੍ਹਾਂ ਦੀ ਕੋਈ ਵੀ ਦਵਾ ਸੁਰੱਖਿਅਤ ਅਤੇ ਕਾਰਗਰ ਸਾਬਿਤ ਹੋਵੇਗੀ ਜਾਂ ਨਹੀਂ। ਨੋਵਾਵੈਕਸ ਨੇ ਪਿਛਲੇ ਮਹੀਨੇ ਕਿਹਾ ਸੀ ਕਿ ਅਸੀਂ ਜੋ ਦਵਾ ਬਣਾਉਂਦੇ ਹਨ, ਉਸ ਵਿੱਚ ਅਸੀਂ ਵਾਇਰਸ ਨੂੰ ਹੱਥ ਵੀ ਨਹੀਂ ਲਾਉਂਦੇ, ਪਰ ਅੰਤ ਇਹ ਰੋਗ ਪ੍ਰਤੀਰੋਧਕ ਸਮਰੱਥਾ ਲਈ ਕਿਸੀ ਵਾਇਰਸ ਵਾਂਗ ਹੀ ਜਾਪਦਾ ਹੈ। ਇਹ ਉਹੀ ਤਰੀਕਾ ਹੈ, ਜਿਸ ਨਾਲ ਨੋਵਾਵੈਕਸ ਨੈਨੋਪਾਰਟਿਕਲ ਜੁਕਾਮ ਦੀ ਦਵਾ ਤਿਆਰ ਕਰਦੀ ਹੈ। ਇਸ ਤਰ੍ਹਾਂ ਕੁਝ ਹੋਰ ਕੰਪਨੀਆਂ ਵੀ ਕਰ ਰਹੀਆਂ ਹਨ।