ਵਾਸ਼ਿੰਗਟਨ, 27 ਮਈ (ਪੋਸਟ ਬਿਊਰੋ)- ਭਾਰਤੀ ਮੂਲ ਦੇ ਇੱਕ ਅਮਰੀਕੀ ਜੋੜੇ ਨੇ ਸਸਤਾ ਪੋਰਟੇਬਲ ਐਮਰਜੈਂਸੀ ਵੈਂਟੀਲੇਟਰ ਬਣਾ ਲਿਆ ਹੈ। ਸਭ ਕੁਝ ਠੀਕ ਰਿਹਾ ਤਾਂ ਛੇਤੀ ਹੀ ਇਸ ਦਾ ਉਤਪਾਦਨ ਸ਼ੁਰੂ ਹੋ ਜਾਵੇਗਾ ਤੇ ਭਾਰਤ ਸਮੇਤ ਸਾਰੇ ਵਿਕਾਸਸ਼ੀਲ ਦੇਸ਼ਾਂ ਵਿੱਚ ਘੱਟ ਕੀਮਤ 'ਤੇ ਇਹ ਮਿਲ ਸਕੇਗਾ।
ਮਸ਼ਹੂਰ ਜਾਰਜੀਆ ਟੈਕ ਵੁਡਰਫ ਸਕੂਲ ਆਫ ਮਕੈਨੀਕਲ ਇੰਜੀਨੀਅਰਿੰਗ ਦੇ ਪ੍ਰੋਫੈਸਰ ਦੇਵੇਸ਼ ਰੰਜਨ ਅਤੇ ਅਟਲਾਂਟਾਂ ਵਿੱਚ ਫਿਜ਼ੀਸ਼ੀਅਨ ਵਜੋਂ ਕੰਮ ਕਰਦੀ ਉਨ੍ਹਾਂ ਦੀ ਪਤਨੀ ਕੁਮੁਦ ਰੰਜਨ ਨੇ ਸਿਰਫ ਤਿੰਨ ਹਫਤੇ ਦੇ ਅੰਦਰ ਇਹ ਐਮਰਜੈਂਸੀ ਵੈਂਟੀਲੇਟਰ ਬਣਾ ਲਿਆ ਹੈ। ਪ੍ਰੋਫੈਸਰ ਰੰਜਨ ਨੇ ਦੱਸਿਆ ਕਿ ਜੇ ਤੁਸੀਂ ਵੱਡੇ ਪੱਧਰ 'ਤੇ ਇਸ ਦਾ ਉਤਪਾਦਨ ਕਰਦੇ ਹੋ ਤਾਂ ਇਹ 100 ਡਾਲਰ ਤੋਂ ਵੀ ਘੱਟ ਉੱਤੇ ਤਿਆਰ ਕੀਤਾ ਜਾ ਸਕਦਾ ਹੈ। ਜੇ ਇਸ ਨੂੰ ਬਣਾਉਣ ਵਾਲੀ ਕੰਪਨੀ 500 ਡਾਲਰ ਵਿੱਚ ਵੀ ਇਸ ਨੂੰ ਵੇਚਦੀ ਹੈ ਤਾਂ ਇਸ ਨੂੰ ਚੰਗਾ ਮੁਨਾਫਾ ਹੋਵੇਗਾ। ਰੰਜਨ ਨੇ ਦੱਸਿਆ ਕਿ ਇਸ ਤਰ੍ਹਾਂ ਦੇ ਵੈਂਟੀਲੇਟਰ ਦੀ ਅਮਰੀਕਾ 'ਚ ਕੀਮਤ ਕਰੀਬ ਦਸ ਹਜ਼ਾਰ ਡਾਲਰ ਹੈ। ਉਨ੍ਹਾਂ ਨੇ ਸਾਫ ਕੀਤਾ ਕਿ ਵਿਕਸਤ ਵੈਂਟੀਲੇਟਰ ਆਈ ਸੀ ਯੂ ਵੈਂਟੀਲੇਟਰ ਨਹੀਂ, ਜਿਹੜਾ ਨਾ ਸਿਰਫ ਵਧੇਰੇ ਆਧੁਨਿਕ ਹੁੰਦਾ ਹੈ ਸਗੋਂ ਉਸ ਦੀ ਕੀਮਤ ਵੀ ਵੱਧ ਹੁੰਦੀ ਹੈ। ਉਨ੍ਹਾਂ ਦੱਸਿਆ ਕਿ ਇਹ ਓਪਨ-ਏਅਰਵੈਂਟਜੀਟੀ ਵੈਂਟੀਲੇਟਰ ਸਾਹ ਦੀ ਬਿਮਾਰੀ ਨਾਲ ਨਜਿੱਠਣ ਲਈ ਬਣਾਇਆ ਗਿਆ ਹੈ ਜਿਹੜਾ ਕੋਰੋਨਾ ਮਰੀਜ਼ਾਂ ਵਿੱਚ ਆਮ ਲੱਛਣ ਹੈ। ਇਸ ਬਿਮਾਰੀ ਨਾਲ ਮਰੀਜ਼ ਦੇ ਫੇਫੜੇ ਆਕੜ ਜਾਂਦੇ ਹਨ ਤੇ ਉਨ੍ਹਾਂ ਨੂੰ ਸਾਹ ਲੈਣ ਲਈ ਵੈਂਟੀਲੇਟਰ 'ਤੇ ਰੱਖਣ ਦੀ ਲੋੜ ਪੈਂਦੀ ਹੈ।
ਜਾਰਜੀਆ ਇੰਸਟੀਚਿਊਟ ਆਫ ਟੈਕਨਾਲੋਜੀ ਵਿੱਚ ਬਣਾਏ ਗਏ ਇਸ ਵੈਂਟੀਲੇਟਰ 'ਚ ਇਲੈਕਟ੍ਰਾਨਿਕ ਸੈਂਸਰ ਤੇ ਕੰਪਿਊਟਰ ਕੰਟਰੋਲ ਦੀ ਵਰਤੋਂ ਕੀਤੀ ਗਈ ਹੈ, ਜਿਹੜੇ ਅਹਿਮ ਕਲੀਨੀਕਲ ਮਾਪਦੰਡਾਂ ਜਿਵੇਂ ਸਾਹ ਚੱਲਣ ਦੀ ਰਫਤਾਰ, ਹਰੇਕ ਚੱਕਰ 'ਚ ਫੇਫੜਿਆਂ 'ਚ ਆਉਣ-ਜਾਣ ਵਾਲੀ ਹਵਾ, ਸਾਹ ਲੈਣਾ-ਛੱਡਣਾ ਅਤੇ ਫੇਫੜਿਆਂ 'ਤੇ ਦਬਾਅ ਨੂੰ ਦੇਖਦੇ ਹਨ। ਰੰਜਨ ਨੇ ਦੱਸਿਆ ਕਿ ਘਾਨਾ ਤੇ ਭਾਰਤ ਵਿੱਚ ਮੈਨੂਫੈਕਚਰਿੰਗ ਪਲਾਂਟ ਲਾਉਣ ਲਈ ਜਾਰਜੀਆ ਟੈਕ ਦੇ ਸਾਬਕਾ ਵਿਦਿਆਰਥੀਆਂ ਨਾਲ ਸੰਪਰਕ ਕੀਤਾ ਹੈ। ਜੋੜੇ ਦਾ ਮੰਨਣਾ ਹੈ ਕਿ ਭਾਰਤ ਕੋਲ ਘੱਟ ਕੀਮਤ ਵਾਲੇ ਵੈਂਟੀਲੇਟਰ ਬਣਾਉਣ ਤੇ ਵਿਸ਼ਵ ਭਰ ਵਿੱਚ ਸਸਤੇ ਦਰਾਂ 'ਤੇ ਉਸ ਦੀ ਬਰਾਮਦ ਕਰਨ ਦੀ ਸਮਰੱਥਾ ਹੈ।
ਬਿਹਾਰ ਦੀ ਰਾਜਧਾਨੀ ਪਟਨਾ 'ਚ ਪਲੇ ਹੋਏ ਰੰਜਨ ਨੇ ਤਿ੍ਰਚੀ ਦੇ ਰੀਜਨਲ ਇੰਜੀਨੀਅਰਿੰਗ ਕਾਲਜ ਬਿਹਾਰ ਤੋਂ ਇੰਜੀਨੀਅਰਿੰਗ ਵਿੱਚ ਗ੍ਰੈਜੂਏਸ਼ਨ ਅਤੇ ਪੋਸਟ ਗ੍ਰੈਜੂਏਸ਼ਨ ਡਿਗਰੀ ਲੈਣ ਪਿੱਛੋਂ ਯੂਨੀਵਰਸਿਟੀ ਆਫ ਵਿਸਕਾਨਸਨ-ਮੈਡੀਸਨ ਤੋਂ ਪੀ ਐਚ ਡੀ ਕੀਤੀ ਅਤੇ ਪਿਛਲੇ ਛੇ ਸਾਲ ਤੋਂ ਜਾਰਜੀਆ ਟੈੱਕ ਵਿੱਚ ਪੜ੍ਹਾ ਰਹੇ ਹਨ। ਉਨ੍ਹਾਂ ਦੀ ਪਤਨੀ ਕੁਮੁਦ ਛੇ ਸਾਲ ਦੀ ਉਮਰ ਵਿੱਚ ਰਾਂਚੀ ਤੋਂ ਆਪਣੇ ਮਾਤਾ-ਪਿਤਾ ਨਾਲ ਅਮਰੀਕਾ ਗਈ ਸੀ। ਉਨ੍ਹਾਂ ਨੇ ਆਪਣੀ ਮੈਡੀਕਲ ਟਰੇਨਿੰਗ ਤੇ ਰੈਜ਼ੀਡੈਂਸੀ ਨਿਊਜਰਸੀ 'ਚ ਪੂਰੀ ਕੀਤੀ ਹੈ।