ਵਾਸ਼ਿੰਗਟਨ, 27 ਮਈ (ਪੋਸਟ ਬਿਊਰੋ)- ਇਲੈਕਟ੍ਰਾਨਿਕ ਇੰਡਸਟਰੀ ਨੂੰ ਹੋਰ ਅੱਗੇ ਵਧਾਉਣ ਅਤੇ ਆਰਟੀਫੀਸ਼ਲ ਇੰਟੈਲੀਜੈਂਸ ਨੂੰ ਬਿਹਤਰ ਬਣਾਉਣ ਵਿੱਚ ਯੋਗਦਾਨ ਲਈ ਭਾਰਤੀ ਮੂਲ ਦੇ ਇੱਕ ਅਮਰੀਕੀ ਵਿਗਿਆਨੀ ਰਾਜੀਵ ਜੋਸ਼ੀ ਨੂੰ ਨਾਮੀ ਇਨਵੈਂਟਰ ਆਫ ਯੀਅਰ ਪੁਰਸਕਾਰ ਦਿੱਤਾ ਗਿਆ ਹੈ।
ਡਾਕਟਰ ਜੋਸ਼ੀ ਦੇ ਨਾਂਅ 250 ਤੋਂ ਜ਼ਿਆਦਾ ਪੇਟੈਂਟ ਦਰਜ ਹਨ ਅਤੇ ਉਹ ਨਿਊ ਯਾਰਕ ਵਿੱਚ ਆਈ ਬੀ ਐੱਮ ਥਾਮਸਨ ਵਾਟਸਨ ਖੋਜ ਕੇਂਦਰ ਵਿੱਚ ਕੰਮ ਕਰਦੇ ਹਨ। ਉਨ੍ਹਾਂ ਨੂੰ ਮਈ ਦੇ ਸ਼ੁਰੂ ਵਿੱਚ ਨਿਊ ਯਾਰਕ ਇੰਟਲੈਕਚੂਅਲ ਪ੍ਰਾਪਰਟੀ ਲਾਅ ਐਸੋਸੀਏਸ਼ਨ ਨੇ ਇੱਕ ਵਰਚੂਅਲ ਸਮਾਗਮ ਵਿੱਚ ਨਾਮੀ ਸਾਲਾਨਾ ਇਨਾਮ ਦਿੱਤਾ ਸੀ। ਆਈ ਆਈ ਟੀ ਮੁੰਬਈ ਦੇ ਵਿਦਿਆਰਥੀ ਰਹੇ ਜੋਸ਼ੀ ਨੇ ਮੈਸਾਚੂਸੈਟਸ ਇੰਸਟੀਚਿਊਟ ਆਫ ਟੈਕਨਾਲੋਜੀ (ਐੱਮ ਆਈ ਟੀ) ਤੋਂ ਐੱਮ ਐੱਸ ਦੀ ਡਿਗਰੀ ਅਤੇ ਕੋਲੰਬੀਆ ਯੂਨੀਵਰਸਿਟੀ, ਨਿਊ ਯਾਰਕ ਤੋਂ ਮਕੈਨੀਕਲ, ਇਲੈਕਟ੍ਰੀਕਲ ਇੰਜੀਨੀਅਰਿੰਗ ਵਿੱਚ ਪੀ ਐੱਚ ਡੀ ਦੀ ਡਿਗਰੀ ਹਾਸਲ ਕੀਤੀ ਹੈ। ਜੋਸ਼ੀ ਨੇ ਪਿੱਛੇ ਜਿਹੇ ਇੱਕ ਇੰਟਰਵਿਊ ਦੌਰਾਨ ਦੱਸਿਆ ਸੀ ਕਿ ਉਨ੍ਹਾਂ ਨੂੰ ਜ਼ਰੂਰਤ ਅਤੇ ਜਿਗਿਆਸਾ ਪ੍ਰੇਰਿਤ ਕਰਦੇ ਹਨ। ਉਨ੍ਹਾਂ ਨੇ ਕਿਹਾ ਸੀ ਕਿ ਕਿਸੇ ਸਮੱਸਿਆ ਦੀ ਪਛਾਣ ਕਰਨ ਅਤੇ ਕੁਝ ਹਟ ਕੇ ਸੋਚਣ ਨਾਲ ਉਨ੍ਹਾਂ ਨੂੰ ਨਵੇਂ ਵਿਚਾਰਾਂ ਤੱਕ ਪੁੱਜਣ ਵਿੱਚ ਮਦਦ ਮਿਲਦੀ ਹੈ। ਜੋਸ਼ੀ ਨੇ ਕਿਹਾ ਕਿ ਉਨ੍ਹਾਂ ਦੇ ਮਾਤਾ-ਪਿਤਾ ਨੇ ਉਨ੍ਹਾਂ ਨੂੰ ਹਮੇਸ਼ਾ ਮਰਕੋਨੀ, ਮੈਡਮ ਕਿਊਰੀ, ਰਾਈਟ ਬ੍ਰਦਰਜ਼, ਜੇਮਜ ਵਾਟ, ਅਲੈਗਜ਼ੈਂਡਰ ਬੈਲ, ਥਾਮਸ ਐਡੀਸਨ ਤੇ ਹੋਰ ਮਹਾਨ ਹਸਤੀਆਂ ਅਤੇ ਉਨ੍ਹਾਂ ਦੀਆਂ ਖੋਜਾਂ ਦੀਆਂ ਕਹਾਣੀਆਂ ਸੁਣਾਈਆਂ। ਉਨ੍ਹਾਂ ਦੀ ਸਫਲਤਾ ਦੀਆਂ ਕਹਾਣੀਆਂ ਅਤੇ ਖੋਜਾਂ ਨੇ ਅਸਲ ਵਿੱਚ ਜੋਸ਼ੀ ਦੀ ਵਿਚਾਰ ਪ੍ਰਕਿਰਿਆ ਨੂੰ ਆਕਾਰ ਦਿੱਤਾ।