ਟੋਰਾਂਟੋ, 26 ਮਈ (ਪੋਸਟ ਬਿਊਰੋ) : ਮੰਗਲਵਾਰ ਦੁਪਹਿਰ ਨੂੰ ਡਾਊਨਟਾਊਨ ਵਿੱਚ ਇੱਕ 16 ਸਾਲਾ ਲੜਕੇ ਨੂੰ ਗੋਲੀ ਮਾਰ ਕੇ ਹਲਾਕ ਕਰ ਦਿੱਤਾ ਗਿਆ ਤੇ ਦੋ ਹੋਰ ਜ਼ਖ਼ਮੀ ਹੋ ਗਏ। ਪੁਲਿਸ ਇਸ ਨੂੰ ਟਾਰਗੈਟਿਡ ਸੂ਼ਟਿੰਗ ਦੱਸ ਰਹੀ ਹੈ।
ਪੁਲਿਸ ਅਧਿਕਾਰੀਆਂ ਨੂੰ ਮੰਗਲਵਾਰ ਨੂੰ ਦੁਪਹਿਰੇ 4:00 ਵਜੇ ਤੋਂ ਬਾਅਦ ਗੋਲੀਆਂ ਚੱਲਣ ਤੇ ਲੋਕਾਂ ਦੇ ਘਬਰਾਹਟ ਵਿੱਚ ਇੱਧਰ ੳੱੁਧਰ ਭੱਜਣ ਮਗਰੋਂ ਕਿੰਗ ਸਟਰੀਟ ਤੇ ਬਲੂ ਜੇਅਜ਼ ਵੇਅ ੳੱੁਤੇ ਸੱਦਿਆ ਗਿਆ। ਇੱਕ 15 ਸਾਲਾ ਲੜਕਾ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋ ਗਿਆ ਤੇ ਉਸ ਦੀ ਹਾਲਤ ਨਾਜ਼ੁਕ ਦੱਸੀ ਜਾਂਦੀ ਹੈ ਤੇ ਇਕ ਔਰਤ ਵੀ ਇਸ ਦੌਰਾਨ ਗੰਭੀਰ ਜ਼ਖ਼ਮੀ ਹੋਈ ਪਰ ਉਸ ਦੀ ਹਾਲਤ ਖਤਰੇ ਤੋਂ ਬਾਹਰ ਦੱਸੀ ਜਾਂਦੀ ਹੈ।
ਚੀਫ ਮਾਰਕ ਸਾਂਡਰਸ ਨੇ ਆਖਿਆ ਕਿ ਮਹਿਲਾ ਕੋਈ ਰਾਹਗੀਰ ਸੀ। ਮੌਕੇ ਉੱਤੇ ਚੌਥੇ ਵਿਅਕਤੀ ਦਾ ਮੁਆਇਨਾ ਕਰਨ ਉੱਤੇ ਪਾਇਆ ਗਿਆ ਕਿ ਉਸ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਜੋ ਕਿ ਗੋਲੀਕਾਂਡ ਨਾਲ ਸਬੰਧਤ ਨਹੀਂ ਸਨ। ਚੀਫ ਸਾਂਡਰਸ ਨੇ ਦੱਸਿਆ ਕਿ ਮਸ਼ਕੂਕ ਦੀ ਗੱਡੀ ਦੀ ਪਛਾਣ ਨੀਲੀ ਟਾਇਗੁਆਨ ਵਜੋਂ ਕੀਤੀ ਗਈ ਹੈ।
ਇਸ ਗੱਡੀ, ਜੋ ਕਿ ਉੱਤਰ ਵੱਲ ਮੂੰਹ ਕਰਕੇ ਖੜ੍ਹਾਈ ਗਈ ਸੀ, ਨੇ ਇਨ੍ਹਾਂ ਟੀਨੇਜਰਜ਼ ਦੇ ਪਹੁੰਚਣ ਤੋਂ ਪਹਿਲਾਂ 40 ਮਿੰਟ ਤੱਕ ਉਡੀਕ ਕੀਤੀ। ਜਦੋਂ ਹੀ ਇਸ ਗੋਲੀਕਾਂਡ ਦਾ ਸਿ਼ਕਾਰ ਹੋਏ ਲੜਕੇ ਦੂਜੀ ਗੱਡੀ ਵਿੱਚ ਬੈਠਣ ਲੱਗੇ ਤਾਂ ਪਹਿਲਾਂ ਤੋਂ ਹੀ ਨੀਲੀ ਟਾਇਗੁਆਨ ਵਿੱਚ ਉਡੀਕ ਕਰ ਰਹੇ ਮਸ਼ਕੂਕ ਨੇ ਯੂ ਟਰਨ ਲਿਆ ਤੇ ਉਸ ਗੱਡੀ ਉੱਤੇ ਗੋਲੀਆਂ ਚਲਾਉਣੀਆਂ ਸ਼ੁਰੂ ਕਰ ਦਿੱਤੀਆਂ। ਇਹ ਲੜਕੇ ਦੱਖਣ ਵੱਲ ਭੱਜ ਗਏ ਤੇ ਮਸ਼ਕੂਕ ਨੇ ਗੋਲੀਆਂ ਚਲਾਉਂਦਿਆਂ ਚਲਾਉਂਦਿਆਂ ਹੀ ਉਨ੍ਹਾਂ ਦਾ ਪਿੱਛਾ ਕੀਤਾ। ਫਿਰ ਮਸ਼ਕੂਕ ਆਪਣੀ ਟਾਇਗੁਆਨ ਵਿੱਚ ਆ ਬੈਠਿਆ ਤੇ ਦੱਖਣ ਵੱਲ ਪੀਟਰ ਸਟਰੀਟ, ਫਿਰ ਫਰੰਟ ਸਟਰੀਟ ਵਿੱਚ ਪੱਛਮ ਵੱਲ ਤੇ ਫਿਰ ਸਪੈਡਿਨਾ ਐਵਨਿਊ ਉੱਤੇ ਉੱਤਰ ਵੱਲ ਚਲਾ ਗਿਆ।
ਦੂਜੀ ਗੱਡੀ ਵੀ ਮੌਕੇ ਤੋਂ ਚਲੀ ਗਈ ਤੇ ਪੁਲਿਸ ਦੋਵਾਂ ਦੀ ਤਲਾਸ਼ ਕਰ ਰਹੀ ਹੈ। ਇਹ ਅਜੇ ਤੱਕ ਪਤਾ ਨਹੀਂ ਲੱਗ ਸਕਿਆ ਹੈ ਕਿ ਦੋਵਾਂ ਗੱਡੀਆਂ ਅੰਦਰ ਕਿੰਨੇ ਲੋਕ ਸਨ। ਮਾਮਲੇ ਦੀ ਜਾਂਚ ਹੋਮੀਸਾਈਡ ਸਕੁਐਡ ਵੱਲੋਂ ਕੀਤੀ ਜਾ ਰਹੀ ਹੈ।