ਟੋਕੀਓ, 26 ਮਈ (ਪੋਸਟ ਬਿਊਰੋ)- ਜਾਪਾਨ ਦੇ ਪ੍ਰਧਾਨ ਮੰਤਰੀ ਸ਼ਿਜੋ ਆਬੇ ਨੇ ਕੋਰੋਨਾ ਵਾਇਰਸ ਕਾਰਨ ਲਾਗੂ ਕੀਤੀ ਐਮਰਜੈਂਸੀ ਕੱਲ੍ਹ ਟੋਕੀਓ ਅਤੇ ਚਾਰ ਹੋਰ ਹਿੱਸਿਆਂ 'ਚੋਂ ਖਤਮ ਕਰ ਦਿੱਤੀ ਹੈ। ਇਸਦੇ ਨਾਲ ਹੀ ਜਾਪਾਨ 'ਚ ਲਾਗੂ ਦੇਸ਼ ਵਿਆਪੀ ਪਾਬੰਦੀਆਂ ਵੀ ਖਤਮ ਹੋ ਗਈਆਂ ਹਨ।
ਮਿਲੀ ਜਾਣਕਾਰੀ ਅਨੁਸਾਰ ਸਰਕਾਰ ਵੱਲੋਂ ਬਣਾਏ ਹੋਏ ਇੱਕ ਪੈਨਲ ਦੇ ਮਾਹਿਰਾਂ ਨੇ ਟੋਕੀਓ ਅਤੇ ਗੁਆਂਢੀ ਰਾਜਾਂ ਕਾਨਗਾਵਾ, ਚਿਥਾ ਤੇ ਸੈਤਾਮਾ ਅਤੇ ਦੇਸ਼ ਦੇ ਉਤਰੀ ਭਾਗ 'ਚ ਹੋਕਾਈਦੋ ਤੋਂ ਐਮਰਜੈਂਸੀ ਹਟਾਉਣ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ। ਵਰਨਣ ਯੋਗ ਹੈ ਕਿ ਜਾਪਾਨ ਦੇ ਬਾਕੀ ਹਿੱਸਿਆਂ 'ਚੋਂ ਐਮਰਜੈਂਸੀ ਮਈ ਦੇ ਸ਼ੁਰੂ 'ਚ ਹਟਾਈ ਗਈ ਸੀ। ਜਾਪਾਨ 'ਚ ਲਗੱਭਗ 16,550 ਲੋਕ ਕੋਰੋਨਾ ਵਾਇਰਸ ਨਾਲ ਇਨਫੈਕਟਿਡ ਹੋਏ ਹਨ ਅਤੇ ਇਨਫੈਕਸ਼ਨ ਨਾਲ ਲਗੱਭਗ 850 ਲੋਕਾਂ ਦੀ ਮੌਤ ਹੋਈ ਹੈ। ਇਸ ਪਿੱਛੋਂ ਪ੍ਰਧਾਨ ਮੰਤਰੀ ਵੱਲੋਂ ਕਾਰੋਬਾਰਾਂ ਨੂੰ ਹੌਲੀ-ਹੌਲੀ ਫਿਰ ਤੋਂ ਸ਼ੁਰੂ ਕਰਨ ਦੀ ਇਜਾਜ਼ਤ ਦੇ ਕੇ ਐਮਰਜੈਂਸੀ ਹਟਾਉਣ ਦਾ ਰਸਤਾ ਸਾਫ਼ ਹੋ ਗਿਆ ਸੀ। ਐਮਰਜੈਂਸੀ ਦਾ ਐਲਾਨ ਸੱਤ ਅਪ੍ਰੈਲ ਨੂੰ ਕੀਤਾ ਗਿਆ ਸੀ।