ਰੋਮ, 26 ਮਈ (ਪੋਸਟ ਬਿਊਰੋ)- ਨੋਬਲ ਇਨਾਮ ਜੇਤੂ ਵਿਗਿਆਨੀ ਮਾਈਕਲ ਲੇਵਿਟ ਨੇ ਦਾਅਵਾ ਕੀਤਾ ਹੈ ਕਿ ਕੋਰੋਨਾ ਵਾਇਰਸ ਲਾਕਡਾਊਨ ਕਾਰਨ ਮੌਤਾਂ ਦੀ ਗਿਣਤੀ ਤੇਜ਼ੀ ਨਾਲ ਵਧ ਸਕਦੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਲੋਕਾਂ ਨੂੰ ਘਰਾਂ ਦੇ ਅੰਦਰ ਕੈਦ ਰੱਖਣ ਦਾ ਫੈਸਲਾ ਉਨ੍ਹਾਂ ਦੇ ਅੰਦਰ ਤਨਾਅ ਪੈਦਾ ਕਰਨ ਵਰਗਾ ਹੈ।
ਵਰਨਣ ਯੋਗ ਹੈ ਕਿ ਸਟੈਨਫੋਰਡ ਯੂਨੀਵਰਸਿਟੀ ਦੇ ਇਸ ਵਿਗਿਆਨੀ ਨੇ ਕੋਰੋਨਾ ਵਾਇਰਸ ਮਹਾਮਾਰੀ ਦੇ ਸ਼ੁਰੁੂ ਦੇ ਦੌਰ ਬਾਰੇ ਇਕਦਮ ਸਹੀ ਭਵਿੱਖਬਾਣੀ ਕੀਤੀ ਸੀ। ਪ੍ਰੋਫੈਸਰ ਲੇਵਿਟ ਨੇ ਇਹ ਕਿਹਾ ਕਿ ਪ੍ਰੋਫੈਸਰ ਨੀਲ ਫਰਗੂਸਨ ਦੀ ਇੱਕ ਥਿਓਰੀ ਮੁਤਾਬਕ ਇਸ ਨਾਲ ਮੌਤ ਦਾ ਅੰਦਾਜ਼ਾ 10 ਤੋਂ 12 ਗੁਣਾ ਵੱਧ ਗਿਆ ਹੈ। ਉਨ੍ਹਾਂ ਨੇ ਇਹ ਦਾਅਵਾ ਕੀਤਾ ਕਿ ਲਾਕਡਾਊਨ ਨਾਲ ਮਹਾਮਾਰੀ ਦੇ ਪ੍ਰਸਾਰ 'ਤੇ ਰੋਕ ਨਹੀਂ ਲੱਗੀ ਜਦੋਂ ਕਿ ਇਸ ਦੇ ਕਾਰਨ ਲੱਖਾਂ ਲੋਕਾਂ ਦੀ ਰੋਜ਼ੀ-ਰੋਟੀ ਨਸ਼ਟ ਹੋ ਗਈ ਹੈ। ਪ੍ਰੋਫੈਸਰ ਲੇਵਿਟ ਨੇ ਕਿਹਾ ਕਿ ਲਾਕਡਾਊਨ ਨੇ ਕੋਰੋਨਾ ਵਾਇਰਸ ਤੋਂ ਮਨੁੱਖੀ ਜੀਵਨ ਦੀ ਰੱਖਿਆ ਨਹੀਂ ਕੀਤੀ, ਸਗੋਂ ਇਸ ਦਾ ਨੁਕਸਾਨ ਹੋਇਆ ਹੈ। ਇਸ ਨਾਲ ਸੜਕ ਦੁਰਘਟਨਾ ਨਾਲ ਹੋਣ ਵਾਲੀਆਂ ਮੌਤਾਂ 'ਚ ਕਮੀ ਆਈ ਹੈ ਪਰ ਘਰੇਲੂ ਅਪਰਾਧ ਵਧੇ ਹਨ। ਪ੍ਰੋਫੈਸਰ ਲੇਵਿਟ ਨੂੰ 2013 'ਚ ਕੈਮਿਸਟਰੀ ਦਾ ਨੋਬਲ ਇਨਾਮ ਮਿਲਿਆ ਸੀ। ਉਨ੍ਹਾਂ ਨੇ ਕਿਹਾ ਕਿ ਲਾਕਡਾਊਨ ਨੂੰ ਹਟਾਏ ਜਾਣ ਤੋਂ ਬਾਅਦ ਤੋਂ ਇਨਫੈਕਸ਼ਨ ਦੀ ਦਰ 'ਚ ਗਿਰਾਵਟ ਆਈ ਹੈ।