ਓਟਵਾ, 25 ਮਈ (ਪੋੋਸਟ ਬਿਊਰੋ) : ਫੈਡਰਲ ਸਰਕਾਰ ਨੇ ਪ੍ਰੋਵਿੰਸਾਂ ਤੇ ਟੈਰੇਟਰੀਜ਼ ਨਾਲ ਗੱਲਬਾਤ ਨੂੰ ਅੱਗੇ ਵਧਾਉਂਦਿਆਂ ਇਹ ਯਕੀਨੀ ਬਣਾਉਣ ਉੱਤੇ ਜ਼ੋਰ ਦਿੱਤਾ ਕਿ ਕੈਨੇਡਾ ਦੇ ਹਰ ਵਰਕਰ ਨੂੰ ਲੋੜ ਪੈਣ ਉੱਤੇ ਸਾਲ ਵਿੱਚ ਇੱਕ ਵਾਰੀ 10 ਦਿਨ ਦੀ ਪੇਡ ਸਿੱਕ ਲੀਵ ਦਿੱਤੀ ਜਾਵੇ। ਇਸ ਨਵੇਂ ਮਾਪਦੰਡ ਨੂੰ ਕੋਵਿਡ-19 ਮਹਾਂਮਾਰੀ ਦੇ ਰਿਕਵਰੀ ਫੇਜ਼ ਵਾਸਤੇ ਅਹਿਮ ਮੰਨਿਆ ਜਾ ਰਿਹਾ ਹੈ।
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਆਪਣੀ ਰੋਜ਼ਾਨਾ ਬ੍ਰੀਫਿੰਗ ਵਿੱਚ ਇਸ ਬਾਰੇ ਵਚਨਬੱਧਤਾ ਪ੍ਰਗਟਾਈ। ਆਉਣ ਵਾਲੇ ਸਮੇਂ ਵਿੱਚ ਵਧੇਰੇ ਦਮਦਾਰ ਸਿੱਕ ਲੀਵ ਪਾਲਿਸੀ ਅਪਨਾਉਣ ਲਈ ਲਿਬਰਲਾਂ ਵੱਲੋਂ ਲਿਆਂਦੇ ਪ੍ਰਸਤਾਵ ਦਾ ਐਨਡੀਪੀ ਆਗੂ ਜਗਮੀਤ ਸਿੰਘ ਤੇ ਉਨ੍ਹਾਂ ਦੇ ਕਾਕਸ ਵੱਲੋਂ ਜ਼ੋਰਦਾਰ ਸਮਰਥਨ ਕੀਤਾ ਗਿਆ। ਪਾਰਲੀਆਮੈਂਟ ਦੀਆਂ ਨਿਯਮਿਤ ਸਿਟਿੰਗਜ਼ ਹਾਲ ਦੀ ਘੜੀ ਸਤੰਬਰ ਤੱਕ ਸਸਪੈਂਡ ਕਰ ਦਿੱਤੀਆਂ ਗਈਆਂ ਹਨ ਤੇ ਇਸ ਨਵੇਂ ਸਮਝੌਤੇ ਉੱਤੇ ਵੋਟਿੰਗ ਵੀ ਇਨ੍ਹਾਂ ਸਿਟਿੰਗਜ਼ ਦੇ ਸ਼ੁਰੂ ਹੋਣ ਉਤੇ ਹੀ ਕਰਵਾਈ ਜਾਵੇਗੀ। ਨਿਯਮਿਤ ਸਿਟਿੰਗਜ਼ ਦੀ ਥਾਂ ਉੱਤੇ ਲਿਬਰਲ ਜੂਨ ਦੇ ਮੱਧ ਤੱਕ ਹਫਤੇ ਵਿੱਚ ਚਾਰ ਸਪੈਸ਼ਲ ਆਲ ਪਾਰਟੀ ਕਮੇਟੀ ਮੀਟਿੰਗਾਂ ਤੇ ਚਾਰ ਵਾਰੀ ਗਰਮੀਆਂ ਵਿੱਚ ਮੀਟਿੰਗਾਂ ਕਰਵਾਉਣ ਉੱਤੇ ਜੋ਼ਰ ਦੇ ਰਹੇ ਹਨ।
ਇੱਕ ਇੰਟਰਵਿਊ ਵਿੱਚ ਐਨਡੀਪੀ ਆਗੂ ਜਗਮੀਤ ਸਿੰਘ ਨੇ ਆਖਿਆ ਕਿ ਜਦੋਂ ਮੰਗਲਵਾਰ ਦੇ ਅੰਤ ਤੱਕ ਇਸ ਸਬੰਧੀ ਵੋਟ ਕਰਵਾਈ ਜਾਵੇਗੀ ਤਾਂ ਉਨ੍ਹਾਂ ਦੇ ਕਾਕਸ ਵੱਲੋਂ ਇਸ ਦਾ ਸਮਰਥਨ ਕੀਤਾ ਜਾਵੇਗਾ। ਉਨ੍ਹਾਂ ਆਖਿਆ ਕਿ ਇਹ ਪ੍ਰਸਤਾਵ ਐਨਡੀਪੀ ਵੱਲੋਂ ਕੀਤੀ ਗਈ ਗੱਲਬਾਤ ਦਾ ਹੀ ਨਤੀਜਾ ਹੈ।