ਕਰਾਚੀ, 25 ਮਈ (ਪੋਸਟ ਬਿਊਰੋ)- ਪਾਕਿਸਤਾਨ ਵਿੱਚ ਸ਼ੁੱਕਰਵਾਰ ਹੋਏ ਜਹਾਜ਼ ਹਾਦਸੇ ਦੀ ਜਾਂਚ ਸ਼ੁਰੂੁ ਹੋ ਗਈ ਹੈ। ਇਸ ਗੱਲ ਦਾ ਪਤਾ ਲਾਇਆ ਜਾ ਰਿਹਾ ਹੈ ਕਿ ਕੀ ਦੁਰਘਟਨਾ ਪਾਇਲਟ ਦੀ ਗਲਤੀ ਨਾਲ ਹੋਈ ਜਾਂ ਤਕਨੀਕੀ ਗੜਬੜੀ ਕਾਰਨ ਹੋਈ ਹੈ। ਹਾਦਸੇ ਦੀ ਜਾਂਚ ਦੀ ਜੋ ਸ਼ੁਰੂ ਦੀ ਰਿਪੋਰਟ ਆਈ ਹੈ ਉਸ ਵਿੱਚ ਪਾਇਲਟ ਦੇ ਜਹਾਜ਼ ਸੰਚਾਲਨ ਦੇ ਬਾਰੇ ਵਿੱਚ ਗੰਭੀਰ ਸਵਾਲ ਉਠਾਏ ਗਏ ਹਨ। ਸ਼ੁਰੂ ਦੀ ਰਿਪੋਰਟ 'ਚ ਕਿਹਾ ਗਿਆ ਹੈ ਕਿ ਕੀ ਕਾਕਪਿਟ 'ਚ ਪਾਇਲਟ ਦਲ ਦੇ ਮੈਂਬਰਾਂ ਨੂੰ ਸੰਕਟ ਦੇ ਬਾਰੇ ਵਿੱਚ ਹਵਾਈ ਆਵਾਜਾਈ ਕੰਟਰੋਲਰ ਨੂੰ ਸੂਚਿਤ ਕਰਨ ਤੋਂ ਰੋਕਿਆ ਗਿਆ ਸੀ।
ਵਰਨਣ ਯੋਗ ਹੈ ਕਿ ਪਾਕਿਸਤਾਨ ਇੰਟਰਨੈਸ਼ਨਲ ਏਅਰਲਾਈਨਜ਼ (ਪੀ ਆਈ ਏ) ਦੀ ਉਡਾਣ ਦੇ ਹਾਦਸੇ ਦਾ ਸ਼ਿਕਾਰ ਹੋਣ ਨਾਲ ਨੌਂ ਬੱਚਿਆਂ ਸਣੇ 97 ਲੋਕਾਂ ਦੀ ਮੌਤ ਹੋ ਗਈ ਸੀ। ਦੋ ਯਾਤਰੀ ਇਸ ਹਾਦਸੇ ਵਿੱਚ ਚਮਤਕਾਰੀ ਢੰਗ ਨਾਲ ਬਚ ਗਏ ਸਨ। ਰਿਪੋਰਟ ਮੁਤਾਬਕ ਜਦੋਂ ਜਹਾਜ਼ ਨੇ ਲੈਂਡਿੰਗ ਦੇ ਪਹਿਲੇ ਅਸਫਲ ਯਤਨ ਵਿੱਚ ਜ਼ਮੀਨ ਨੂੰ ਛੂਹਿਆ ਤਾਂ ਸੰਭਵ ਹੈ ਕਿ ਇੰਜਣ ਦਾ ਤੇਲ ਟੈਂਕ ਅਤੇ ਤੇਲ ਪੰਪ ਨੁਕਸਾਨਿਆ ਗਿਆ ਹੋਵੇ ਜਿਸ ਨਾਲ ਪਾਇਲਟ ਜਹਾਜ਼ ਨੂੰ ਸੁਰੱਖਿਅਤ ਨਹੀਂ ਕਰ ਸਕਿਆ। ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਕਈ ਸਵਾਲ ਬਹੁਤ ਗੰਭੀਰ ਹਨ ਕਿ ਕਾਕਪਿਟ ਵਿੱਚ ਅਲਾਰਮ ਸਿਸਟਮ ਪਾਇਲਟਾਂ ਨੂੰ ਹੰਗਾਮੀ ਸਥਿਤੀ ਬਾਰੇ ਜਾਣਕਾਰੀ ਦੇਣ ਵਿੱਚ ਕਿਉਂ ਤੇ ਕਿਵੇਂ ਅਸਫਲ ਰਹੇ। ਪੀ ਆਈ ਏ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਅਰਸ਼ਦ ਮਲਿਕ ਨੇ ਕਿਹਾ ਕਿ ਜਹਾਜ਼ ਦਾ ਬਲੈਕ ਬਾਕਸ ਜਾਂਚ ਟੀਮ ਨੂੰ ਸੌਂਪ ਦਿੱਤਾ ਗਿਆ ਹੈ। ਪੀ ਆਈ ਏ ਦੇ ਇੰਜੀਨੀਅਰਿੰਗ ਅਤੇ ਰੱਖ-ਰਖਾਅ ਵਿਭਾਗ ਅਨੁਸਾਰ ਹਾਦਸਾਗ੍ਰਸਤ ਜਹਾਜ਼ ਦੀ ਦੋ ਮਹੀਨੇ ਪਹਿਲੇ ਜਾਂਚ ਕੀਤੀ ਗਈ ਸੀ ਅਤੇ ਇਸ ਨੇ ਹਾਦਸੇ ਤੋਂ ਇੱਕ ਦਿਨ ਪਹਿਲਾਂ ਮਸਕਟ ਤੋਂ ਲਾਹੌਰ ਲਈ ਉਡਾਣ ਭਰੀ ਸੀ। ਪਾਕਿਸਤਾਨ ਇੰਟਰਨਸ਼ਨਲ ਏਅਰਲਾਈਨਜ਼ (ਪੀ ਆਈ ਏ ਏ) ਦਾ ਹਾਦਸਿਆਂ ਨਾਲ ਪੁਰਾਣਾ ਨਾਤਾ ਹੈ। ਇਸ ਤੋਂ ਪਹਿਲੇ ਵੀ ਕਈ ਵੱਡੇ ਹਵਾਈ ਹਾਦਸਿਆਂ ਵਿੱਚ ਸੈਂਕੜੇ ਲੋਕਾਂ ਦੀਆਂ ਜਾਨਾਂ ਜਾ ਚੁੱਕੀਆਂ ਹਨ। ਹਾਦਸਿਆਂ ਦਾ ਕਾਰਨ ਪੁਰਾਣੇ ਜਹਾਜ਼ ਅਤੇ ਜਹਾਜ਼ਾਂ ਦੀ ਦੇਖਭਾਲ ਦੀ ਘਾਟ ਦੱਸੀ ਜਾ ਰਹੀ ਹੈ। ਦੇਸ਼ ਦੀ ਸ਼ਹਿਰੀ ਹਵਾਬਾਜ਼ੀ ਅਥਾਰਟੀ (ਸੀ ਏ ਏ) ਵੱਲੋਂ ਬਣਾਈ ਰਿਪੋਰਟ ਅਨੁਸਾਰ ਏਅਰਬਸ ਏ 320 ਦੇ ਇੰਜਣਾਂ ਨੇ ਪਾਇਲਟ ਵੱਲੋਂ ਜਹਾਜ਼ ਉਤਾਰਨ ਦੇ ਪਹਿਲੇ ਯਤਨ ਵਿੱਚ ਤਿੰਨ ਵਾਰ ਰਨਵੇ ਨੂੰ ਛੂਹਿਆ ਸੀ।
ਦ ਨਿਊਜ਼ ਇੰਟਰਨੈਸ਼ਨਲ ਨੇ ਸੀ ਏ ਏ ਦੇ ਸੂਤਰਾਂ ਦੇ ਹਵਾਲੇ ਨਾਲ ਦੱਸਿਆ ਕਿ ਇਸ ਦੇ ਬਾਅਦ ਪਾਇਲਟ ਨੇ ਫਿਰ ਤੋਂ ਉਡਾਣ ਭਰੀ ਜਿਸ ਨਾਲ ਅਧਿਕਾਰੀਆਂ ਨੂੰ ਇਹ ਕਾਫੀ ਅਜੀਬ ਲੱਗਾ ਕਿ ਕਾਕਪਿਟ 'ਚ ਚਾਲਕ ਦਲ ਦੇ ਮੈਂਬਰਾਂ ਨੇ ਜਿਨਾਹ ਅੰਤਰਰਾਸ਼ਟਰੀ ਹਵਾਈ ਅੱਡੇ 'ਤੇ ਹਵਾਈ ਆਵਾਜਾਈ ਕੰਟਰੋਲ (ਏ ਟੀ ਸੀ) ਨੂੰ ਲੈਂਡਿੰਗ ਗੀਅਰ ਦੇ ਸੰਬੰਧ ਵਿੱਚ ਕਿਸੇ ਸਮੱਸਿਆ ਦੇ ਬਾਰੇ ਵਿੱਚ ਸੂਚਿਤ ਨਹੀਂ ਕੀਤਾ।