ਥਾਊਜ਼ੈਂਡ ਓਕਸ, ਕੈਲੇਫੋਰਨੀਆ, 8 ਨਵੰਬਰ (ਪੋਸਟ ਬਿਊਰੋ) : ਦੱਖਣੀ ਕੈਲੇਫੋਰਨੀਆ ਵਿੱਚ ਸਥਿਤ ਇੱਕ ਮਿਊਜਿ਼ਕ ਬਾਰ ਵਿੱਚ ਚੱਲ ਰਹੀ ਕਾਲਜ ਨਾਈਟ ਦੌਰਾਨ ਕਾਲੇ ਰੰਗ ਦੇ ਕੱਪੜਿਆਂ ਵਿੱਚ ਪਹੁੰਚੇ ਮਰੀਨ ਨੇ ਸਮੋਕ ਬੰਬ ਤੇ ਹੈਂਡਗੰਨ ਦੀ ਮਦਦ ਨਾਲ 12 ਵਿਅਕਤੀਆਂ ਨੂੰ ਮੌਤ ਦੇ ਘਾਟ ਉਤਾਰ ਦਿੱਤਾ ਤੇ ਫਿਰ ਆਪਣੀ ਜਾਨ ਵੀ ਲੈ ਲਈ। ਇਸ ਦੌਰਾਨ ਦਹਿਸ਼ਤ ਕਾਰਨ ਭੱਜਨੱਠ ਮਚ ਗਈ ਤੇ ਸੈਂਕੜੇ ਲੋਕ ਭੱਜਣ ਵਿੱਚ ਕਾਮਯਾਬ ਵੀ ਹੋ ਗਏ। ਇਹ ਜਾਣਕਾਰੀ ਅਧਿਕਾਰੀਆਂ ਨੇ ਦਿੱਤੀ।
ਅਧਿਕਾਰੀਆਂ ਨੇ ਆਖਿਆ ਕਿ ਇਸ ਹਮਲੇ ਸਬੰਧੀ ਕਾਰਨਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਹਮਲਾਵਰ ਦੀ ਪਛਾਣ 28 ਸਾਲਾ ਇਆਨ ਡੇਵਿਡ ਲੌਂਗ ਵਜੋਂ ਹੋਈ ਹੈ, ਜੋ ਕਿ ਅਫਗਾਨਿਸਤਾਨ ਵਿੱਚ ਸਾਬਕਾ ਮਸ਼ੀਨਗੰਨਰ ਤੇ ਸੀਨੀਅਰ ਸੈਨਿਕ ਸੀ। ਪਿਛਲੀ ਬਹਾਰ ਵਿੱਚ ਵੀ ਗੁੱਸੇ ਵਾਲੇ ਵਿਵਹਾਰ ਕਾਰਨ ਘਟੀ ਘਟਨਾ ਕਰਕੇ ਉਸ ਦੇ ਘਰ ਉੱਤੇ ਪੁਲਿਸ ਵੱਲੋਂ ਉਸ ਤੋਂ ਪੁੱਛਗਿੱਛ ਕੀਤੀ ਗਈ ਸੀ। ਵੈਂਚੂਰਾ ਕਾਊਂਟੀ ਸ਼ੈਰਿਫ ਸਾਰਜੈਂਟ ਜੈਫ ਡੀਨ ਨੇ ਦੱਸਿਆ ਕਿ ਇਸ ਦੌਰਾਨ ਬਾਰ ਵਿੱਚ 11 ਲੋਕ ਮਾਰੇ ਗਏ ਤੇ ਸੱਭ ਤੋਂ ਪਹਿਲਾਂ ਮੌਕੇ ਉੱਤੇ ਪਹੁੰਚਣ ਵਾਲਾ ਸੀਨੀਅਰ ਸੈ਼ਰਿਫ ਸਾਰਜੈਂਟ ਵੀ ਮਾਰਿਆ ਗਿਆ।
ਅਮਰੀਕਾ ਦੇ ਰਾਸ਼ਟਰਪਤੀ ਡੌਨਲਡ ਟਰੰਪ ਨੇ ਹਮਲੇ ਦੌਰਾਨ ਹਿੰਮਤ ਵਿਖਾਏ ਜਾਣ ਉੱਤੇ ਪੁਲਿਸ ਦੀ ਸ਼ਲਾਘਾ ਕੀਤੀ ਤੇ ਮ੍ਰਿਤਕਾਂ ਦੇ ਸਨਮਾਨ ਵਿੱਚ ਝੰਡੇ ਅੱਧੇ ਝੁਕੇ ਰਹਿਣ ਦਾ ਹੁਕਮ ਜਾਰੀ ਕੀਤਾ।